Sumqayıt camaatı oksigensiz qalıb, yaşıllıqlara kütləvi şəkildə divan tutulub; əhalinin kommunal problemlərinə, sosial müavinətlə bağlı etirazlarına, təhsil və səhiyyə sahəsində etdikləri şikayətlərə baxılmır

Eldar Əzizov təyin olunduğu vaxtdan Sumqayıtı viran qoyub. Dövlət başçısı onu “gənclər şəhəri”nə mer təyin edəndə əhalinin problemlərinin həllini tələb edirdi. E.Əzizov isə tez bir zamanda sakinlərin narazılığına səbəb olan addımları ilə yadda qalmağa başladı.

İcra başçısı özü ilə bərabər yeni çətinliklər gətirdi ki, bu da şəhər camaatının onsuz da əvvəldən yığılıb qalaqlanan problemlərinin üstünə gəldi.

Sumqayıt indi ən ağır günlərini yaşayır. Sahibkarlara divan tutulması, yaşıllıqların məhv edilməsi, küçələrin səki-səki satılması, evlərin qanunsuz sökülərək mülk sahiblərinin narazı qoyulması aşıb-daşan narazılıqları gərginlik həddinə çatdırdı.

“Gündəm-xəbər”in əldə etdiyi xəbərə görə, E.Əzizovun yaratdığı ekoloji bəlalar onsuz da sənaye şəhəri olan Sumqayıtı fəlakətə sürükləyir.

Əhalinin oksigensiz qoyan, insanları boğan icra başçısını meşəlikləri məhv edib pul qazanmaq düşündürür. Görünür, E.Əzizov bu şəhərdə müvəqqəti olduğunu hesab edərək mümkün qədər şəhəri səhralığa çevirməkdə iddialıdır.

Redaksiyamıza da sosial problemlər girdabında boğulan sumqayıtlı sakinlərin çoxsaylı şikayət məktubları daxil olmaqdadır. Vətəndaşlar narazılıq edirlər ki, onların kommunal problemlərinə, sosial müavinətlə bağlı etirazlarına, təhsil, səhiyyə sahəsində etdikləri şikayətlərə baxılmır.

İcra başçısının yaxın adamı kimi təqdim olunan Aslan Abbasov adlı sahibkarın daha çox gəlir əldə etmək üçün yaşıllıqları məhv etməsi də sumqayıtlıları narahat edən əsas problemlərdən biridir.

Ümumiyyətlə, Sumqayıtın və sumqayıtlıların o qədər problemləri var - saymaqla bitən deyil. Məsələn, Sumqayıt şəhərində qəbir yerlərinin vətəndaşlara heç də təmənnasız verilmədiyi, daha dəqiq desək, icra başçısı Eldar Əzizovun sağ əli sayılan Sumqayıt şəhər Mənzil Kommunal İstehsalat Departamentinin rəisi Abid Əliyevin nəzarətində olan qəbiristanlıqda qəbir yerlərinin əhaliyə pulla satıldığı artıq heç kimə sirr deyil.

Qeyd olunur ki, Sumqayıt Şəhər Təhsil Şöbəsinin müdiri Vaqif Ələsgərov, şəhər mədəniyyət və turizm idarəsinin rəisi Namiq Qafarov və səhiyyə şöbəsinin müdiri Ələkbər Tağıyev məhz Eldar Əzizovun himayəsinə arxalanırlar.

Ümumiyyətlə, onlar və digər iki nəfər - Sumqayıt şəhər Mənzil Kommunal İstehsalat Departamentinin rəisi Abid Əliyev və iş adamı Aslan Abbasov icra başçısının Sumqayıtdakı əsas dayaqları hesab olunur.

Sumqayıt şəhər 9-cu mikrorayon ev 35 və 36-nın sakinləri acınacaqlı, dözülməz şəraitdə yaşadıqlarını iddia edirlər: “Yollarımız çox bərbad vəziyyətdədir. Yağış yağanda dözülməz vəziyyət yaranır. Həyətdə işıq dirəklərinin əlindən tərpənmək mümkün deyil.

Bu yaxınlarda bu dirəklər yenilənib, ancaq köhnələri çıxarılmayıb. Həyətimizin işıqlandırılması yoxdur. Hava qaralan kimi sahibsiz itlərin əlindən uşaqlarımız çölə çıxa bilmir. Binanın zirzəmisi su ilə dolu olduğundan ağcaqanad, "krisa", milçək yuvasına çevrilib. İstilik sistemi də yoxdur ki, mənzillərimizi qızdıraq".

Qeyd edək ki, istilik sistemi olmadığından sakinlər qazdan istifadə edirlər. Bu isə böyük təhlükə yaradır. Tüstü bacalarının təmizlənməməsi bu təhlükəni daha da artırır. O da bildirilir ki, istər dövlət büdcəsindən, istərsə də prezidentin ehtiyat fondundan ayrılan vəsaitlərin demək olar ki, hamısı mənimsənilir.

Az-çox görülən işlər isə məhz Sumqayıt sahibkarlarının hesabına həyata keçirilir. Qəbir yerlərini əhaliyə pulla satan Sumqayıt şəhər Mənzil Kommunal İstehsalat Departamentinin rəisi Abid Əliyev Eldar Əzizovun köhnə kadrıdır.

İcra başçısı onu özü ilə birlikdə Gəncədən gətirib. Hazırda adıçəkilən departament rəisinin nəzarətində olan Sumqayıt şəhər qəbiristanlığında yerlər şəhər sakinlərinə təmənnasız verilmir. Halbuki, qəbir yerlərinin pulla satılması qanunsuzdur. Hətta bu yaxınlarda Dini Qurumlarla İş üzrə Dövlət Komitəsinin sədri Mübariz Qurbanlı da bildirdi ki, qəbir yerlərinin pulla satılması düzgün deyil.

Lakin görünən odur ki, nə qanun, nə də Mübariz Qurbanlının dedikləri Abid Əliyevə təsir etmək gücündə deyil. Çünki o, Sumqayıt Şəhər İcra Hakimiyyətinin başçısı Eldar Əzizovun himayəsinə arxalandığı üçün öz bildiyini etməkdədir.

Bu arada, Eldar Əzizovun gəlişindən sonra Sumqayıt şəhərində "yaşıllığın soyqırımı"nın geniş vüsət aldığını vurğulayan məlumatlı şəxs qeyd edir ki, bu işə icra başçısının yaxın adamlarından olan Aslan Abbasov rəhbərlik edir.

Eldar Əzizovun Sumqayıtdakı əməlləri sırasında kütləvi ağac kəsimi, parkların və səkilərin obyekt yerləri kimi satışa çıxarılması xüsusilə diqqət çəkir. Onun şəhərə rəhbərlik etdiyi ötən müddət ərzində Cəfər Cabbarlı adına Mədəniyyət Evinin yanında, 1-ci məhəllədə, Nəsimi adına parkda, Nəriman Nərimanov küçəsində "Sumqayıt" şadlıq evinin yanında, mərkəzi kitabxananın qarşısında, Azərbaycan prospektində və başqa yerlərdə ağaclar kəsilib.

Bütün bunlar Eldar Əzizovun və onun adamı Aslan Abbasovun Sumqayıtdakı "yaşıllığın soyqırımı"nın hamısı deyil sadəcə bir neçə faktdır. Onu da qeyd edək ki, Sumqayıt şəhərində 36-cı məhəllədə 20 yanvar küçəsində yerləşən 8 və 9 nömrəli yaşayış binaları arasında piyadaların gedişi üçün nəzərdə tutulmuş səkinin üzərində artıq istifadəyə verilmiş ikimərtəbəli obyekti misal çəkmək olar.