Buna 3-cü məhəllə sakinləri etiraz edir

Elektron poçtumuza məktub ünvanlayan Sumqayıt şəhər 3-cü məhəllə sakinlərinin şikayət məktubunda İH başçısı Eldar Əzizovun qanunsuz əməllərindən bəhs edilir.
Məktubda bildirilir ki, Eldar Əzizov Sumqayıta təyinatından sonra İH binasının ətrafında “özünəməxsus” mənzərə yaratmağa başladı. İşə başladığı ilk günlərdən Sumqayıt İH-nin binasının divarından binanın fasadına qalxan dekorativ sarmaşığı yoldurdu. Uzun illər idi ki Sumqayıt Yaşıllıq İdarəsinin qulluq etdiyi yaşıllıq İH binasına xüsusi gözəllik verirdi. Yaşıllıq yolunandan sonra, bina yoluq görkəm aldı. Sumqayıt İH-nin binasının fasadı yaşıllıq görkəmi baxımından “Ginnesin” rekordlarına düşəcək bir mənzərə idi. Sonradan başçının “yenidən qurmasında” məlum oldu ki, Eldar Əzizov yaşıllığı sevmir. Necə ki, özü ilə Gəncədən gətirdiyi dəstə (əlibaltalı müavinlər) yaşıllıq parklarına qənim kəsildi.
Az keçmədi ki, ölkənin hər yerində bayrağa “sevgidən” qaynaqlanan bayraq ucaltmaya Eldar Əzizov da qoşuldu. İH qarşısında dövlət bayrağı ucaltdı. Gəncədəki şəxsi zavodunda istehsal olunmuş səki daşlarını gətirtdirərək İH-nın qarşısındakı meydana düzdü. Bu “abadlıq”-dan sonra İH-nın qarşısında nəqliyyatın hərəkəti qadağan olundu. O, həm də öz yolunuda kəsmiş oldu. Maraqlıdır, Prezident Aparatının qarşısından avtomobillərin hərəkətinə icazə verildiyi halda, Eldar Əzizovun göstərişinə əsasən Sumqayıt İH-nın qarşısından avtomobillərin hərəkəti qadağan olunub. Bu qadağadan sonra nəqliyyat vasitələrinin hamısı mərkəzi bazara tərəf istiqamətləndi. Bazar ətrafında isə keçilməz tıxaclara səbəb oldu.
Sakinlərin dediyinə görə, hal-hazırda Sumqayıt İH başçısı işə gələrkən xidməti avtomobilini piyadalar üçün nəzərdə tutulmuş səkiyə qaldırır. BMW – 745, 50 AA 001 nömrə nişanlı avtomobili səki ilə şütüyərək E.Əzizovun “ağ evinin” qarşısına daxil olur. Başçının yol hərəkəti qaydalarını pozması 3-cü məhəllə sakinlərinin haqlı narazıçılığına səbəb olub. Sakinlər redaksiyamıza yazaraq E.Əzizovun yol hərəkəti qaydalarına hörmətsizliyini ictimailəşdirilməsini xahiş edirlər. E.Əzizovu yol hərəkəti qaydalarına hörmət etməyə çağırırlar.
“Gündəm xəbər” olaraq Sumqayıt 3-cü məhəllə sakinlərinə bildiririk ki, ağac kəsiminə, avtomobillə qudurğanlıq, avtoşluq , yol hərəkəti qaydalarını pozanlara qarşı ölkə başçısı İ.Əliyevin “münasibəti” hamıya bəllidir. Allah E.Əzizovu Prezidentin qəzəbindən hifz eləsin! AMİN!
Şakir Məmmədov