Binəqədinin başçısı ölkədən niyə getdi?; Başçının ailəsi 1 aydır Almaniyadadır; görüş yeri olaraq Paris seçilib; Məmmədov-İsgəndərov klanı haqda şok bilgilər...

Binəqədinin icra başçısı Xaləddin İsgəndərovun ölkədən qaçması haqda məlumat yayılıb. İlk öncə istiqlal.az saytı, daha sonra isə başqa saytlar yazdılar ki, vergilər naziri Fazil Məmmədovla qohumluq əlaqələrinə malik olan başçı ölkədən məzuniyyət adı ilə gedib. Bu iddiaya dair müsavat.com-un özəl bilgiləri var. Lakin onları ictimailəşdirməzdən öncə, istiqlal.az saytının X.İsgəndərovun fəaliyyətinə həsr olunan geniş tənqidi məqaləsindən müəyyən məqamları xatırladaq.

Sayt iddia edir ki, başçı yaddaşsızlıq sindromundan əziyyət çəkir və bu da onu hər dəfə pis durumlara salır : “Binəqədi sakinləri yaxşı bilir ki, Xaləddin İsgəndərovun iclasları həngaməsiz keçmir. Ancaq özünü tərifləyən icra başçısı vətəndaşa dəxli olmayan söhbətləri ilə də məşhurdur. O, soy-kökünün varlı-karlı olduğunu Binəqədi sakinlərinə ”tutuzdurmaq"dan ötrü ailəsindən oğurlanan hansısa qızılları tez-tez xatırladır.

Xaləddin İsgəndərovun başqa şakəri də onun yaddaş problemidir. Belə ki, 100-200 adamla keçirdiyi iclaslarda “sandığı açıb, pambığı tökən” Xaləddin İsgəndərov sonradan icra hakimiyyətində satqın ovuna çıxır. Müavinləri və yaxınları cəsarət edib “cənab başçı, siz bu sözü özünüz iclasda dediniz axı” deyəndə isə yumruğu ilə alnını döyəcləyir. Xaləddin İsgəndərovun iclaslarına bəzək olan sözlərdən biri də “kişi yalan danışmaz, xüsusən də vəzifəli adam yalan danışmaz” sözləridir. Amma təəssüf ki, özü bütün günü yalan danışır. Dərd odur ki, onun yalanlarını qəsəbə bələdiyyə sədrləri və icra nümayəndələri aforizmə çevirib, xalq arasında yayırlar".

Sayt yazır ki, X.İsgəndərovun başçı təyinatından sonra binəqədililər əvvəlki icra başçısı Alı Qocayevin ölənlərinə rəhmət oxuyurlar. Bu da Binəqədidə tikintiyə haqq qoyulması ilə əlaqəlidir: “Rayon ərazisindəki tikililərə qiymət vahid cədvəl əsasında qoyulub. Əgər Xaləddin İsgəndərovdan əvvəl - Milli Məclisin spikeri Oqtay Əsədovun qudası Alı Qocayevin icra başçısı işlədiyi dövrdə-daha çox Biləcəri, Binəqədi və Xocasən qəsəbələrində hasar çəkmək pulsuz, istənilən ölçüdə ev tikmək isə 500-1000 manat ”şirinliklə" baş tuturdusa, Xaləddin İsgəndərovun “zühuru” ilə qiymətlərdə qiyamət qopdu. Medianın müxtəlif vaxtlarda apardığı araşdırmalara görə, X.İsgəndərovun göstərişi ilə rayon ərazisində hasar çəkmək 2-3 min, kürsülü ev 8-10 min, iki mərtəbəli evin tikintisi üçün isə 12-15 min manat rüşvət tələb olunur. Sakinlərin verdiyi son məlumata görə, manatın devalvasiyası yaz aylarına - tikinti bumunun yaşandığı dövrə təsadüf etdiyindən X.İsgəndərovun “ağ nivalı”ları da xəracı dollarla toplayırlar".

Sayt rayon ərazisində yanan çoxmərtəbəli binanı üzləyən X.İsgəndərovun hazırda bütün məsuliyyəti FHN-in üzərinə yönləndirməyə çalışdığını da vurğulayır: “Bakı şəhəri, Binəqədi rayonu, Azadlıq prospekti, 200/36 ünvanında yerləşən çoxmərtəbəli yaşayış binasında baş vermiş yanğın Xaləddin İsgəndərovun onsuz da çətin olan vəziyyətini bir az da ağırlaşdırdı.

Bütün şəhər ictimaiyyəti çox gözəl bilir ki, poliuretandan kütləvi istifadəni ilk dəfə Binəqədidə Xaləddin İsgəndərov tətbiq edib. Düzü, cənab başçı bunu heç danmır da və günahı Fövqəladə Hallar Nazirliyinin üzərinə yıxır: “Onlar rəy veriblər...”

Hüquqşünasların dediyinə görə, məlum hadisəyə görə müvafiq maddə ilə cinayət işi açılırsa, buna binanın fəsadını dəyişən şirkətlə yanaşı, bu sifarişi verən və onun icrasına nəzarət etməli olan Binəqədi Rayon İcra Hakimiyyətinin məsul şəxsləri və şəxsən icra başçısı Xaləddin İsgəndərov məsuliyyət daşıyır. Buna görə hesab edilir ki, ilk məsuliyyət daşıyan şəxs Xaləddin İsgəndərov olmalıdır".

***
“Yeni Müsavat”a daxil olan məlumata görə, X.İsgəndərovun tezalışan materialla üzlətdiyi binadakı yanğınla bağlı istintaqda da başçının əleyhinə ifadə var. Belə bir ifadəni vaxtilə X.isgəndərovun müavini olmuş Qəzənfər Novruzovun verdiyi bildirilir. Qeyd olunur ki, başçının sabiq müavini bütün günahın onun ayağına yazılmasına razı deyil. O, işi aparan müstəntiqlərə X.İsgəndərovun əleyhinə ifadələr verib və ifadələrini rəsmiləşdirilməsini tələb edib. Nəticədə ifadələr rəsmiləşdirilib.

Yada salaq ki, yanğından dərhal sonra prezident İlham Əliyev hadisəsinin baş verməsində təqsirli bilinən şəxslər barədə cinayət işinin başlanılmasını və onların ciddi şəkildə cəzalandırılacağını deyib: "Əgər bütün işlər düzgün qurulsaydı, bu hadisə baş verməzdi. Azərbaycan vətəndaşları bilməlidir ki, günahkar və günahkarlar kimdir? Bu hadisəyə görə kim məsuliyyət daşıyacaq?.."

Nəzərə alsaq ki, Nazirlər Kabinetinin son toplantısında Xaləddin İsgəndərovun güvəndiyi nazir qohumu Fazil Məmmədov da sərt tənqidə məruz qalıb, onda icra başçısının ölkədən getməsi barədə iddiaların ortaya çıxmasının təsadüf olmadığını söyləyə bilərik.


Musavat.com-a məlum olub ki, X. İbrahimov bütün ailəsini bir aydan artıqdır ki, Azərbaycandan çıxarıb. İsgəndərovlar hazırda Almaniyadadırlar - onlar əvvəl Berlin, sonra isə Hamburq şəhərlərində məskunlaşıblar. Ailə bugünlərdə Fransaya da səfər edəcək. Mənbəmiz iddia edir ki, Xaləddin İsgəndərov ailəsinə Parisdə qatılacaq.

Xaləddin İsgəndərovun hazırda da xaricdə olduğu, lakin ölkədən qaçmadığı, 5 avqusta qədər məzuniyyət izni aldığı da müsavat.com-un dəqiqləşdirdiyi xəbərlər sırasındadır. Ailəsindən kənarda olsa da, hörmətli İsgəndərov Azərbaycandan kənardadır və onun özü də, ailəsi də həyəcanla Bakıdan xəbər gözləyir. Hər an onun işdən çıxarılması və cinayət məsuliyyətinə cəlb olunması xəbərləri gələ bilər.

Qaynaq deyir ki, X. Isgəndərovun, o cümlədən də digər qohumların əksəriyyətinin Azərbaycandan getməsi barədə təlimat vergilər naziri, bu klanın rəhbəri Fazil Məmmədov tərəfindən verilib. Cənab nazirin təlimatlarında klan üzvlərinə qəti tapşırılıb ki, bu aralar sizi küçədə söysələr də, döysələr də, səs çıxarmayın.

Böyük narahatlıq səbəbindən hazırda Məmmədov-İsgəndərov klanının gənc üzvlərinin hamısı xaricdədir.

Təbii ki, klanın bütün üzvləri həbs olunmayacaq. Lakin Xaləddin İsgəndərovun cəzalanacağı qəti qərar kimi görünür. Mənbə iddia edir ki, həm onun yanan bina ilə bağlı cinayət işində adı mərkəzi fiqur kimi keçir, həm də işdə ciddi yeyintilərə yol verdiyi məlum olub .

Özəl qaynaqlar iddia edirlər ki, X. İsgəndərov dünya zənginlərinin belə özünə rəva bilmədiyi təmtəraq içərisində yaşayır. Bəzi dəqiqləşdirilmiş rəqəmləri yazaq: Onun evində 3 sürücü çalışır. Özünün xidməti sürücüsü ilə birlikdə, İsgəndərovların sərəncamında 4 sürücü, 10-a yazın maşın var. Yalnız evdə çalışanlara verdiyi aylıq əmək haqları 17500 manatdır. Özəl qaynaqlar iddia edirlər ki, İsgəndərovların aylıq xərcləri 50 min manatdan yuxarıdır. Onlar Binəqədinin ən yaxşı torpaqlarına sahibləniblər. Rayonda çoxsaylı tikinti işlərinə də məhz İsgəndərovlar nəzarət edir. Lakin hazırda onlar bütün işlərini saxlayıblar və proseslərin sonunu gözləyirlər.