Azərbaycan Dövlət İqtisad Universitetində kütləvi narazılıq baş qaldırıb, təhsil ocağında yoxlamalar aparılacağı gözlənilir; Ədalət Muradov və komandası təşvişə düşüb - müdhiş detallar

Azərbaycan Dövlət İqtisad Universitetində (ADİU) Ədalət Muradov rüzgarı əsməkdədir. Rektor təyinatı ilə tələbələrin başına bəla olan Ə.Muradov xələfinə dua oxudur.

Onun təyinatı ilə ölkənin ən iri ali məktəbi uçuruma yuvarlanıb. Artıq rektorun və komandasının fəaliyyəti haqda cinayət dosyesi hazırlanaraq Prezident İlham Əliyev və Baş Prokurorluq yanında Korrupsiyaya qarşı Mübarizə İdarəsinin rəhbəri Kamran Əliyevi ünvanlanıb.

Bu barədə “Gündəm-xəbər”in əldə etdiyi məlumata görə, ADİU-da kütləvi narazılıq baş qaldırıb və rektordan saysız-hesabsız şikayətlər yuxarı dairələrə göndərilməkdədir.

Mənbənin qeydlərinə görə, rektordan narazılıq edən tələbələr öz təhlükəsizliyini təmin etmək üçün anonim məktubla çıxış ediblər. Onlar Ə.Muradovun ətrafındakı məmurlaşmış dekan və prorektorların əməllərindən bəhs ediblər.

Məktub müəllifləri qeyd ediblər ki, rektorun komandası artıq heç bir şikayət dinləmədən, tələbələrin biliklərinə hörmət etmədən özfəaliyyət dərnəyi açıblar.

Qaynağımız iddia edir ki, ADİU-da baş verənlər haqda hətta sabiq rektor Şəmsəddin Hacıyevə də müraciətlər daxil olub. Tələbələr deputat olan Hacıyevdən məsələnin yuxarı eşalona çatdırılmasını xahiş ediblər.

Onun dövründəki islahatları xatırlayan tələbələr Muradovun vaxtında ali məktəbin bazara çevrilməsinin şahidi olublar.

Mənbə qeyd edir ki, ADİU-da baş verən rüşvətxorluq halları, özbaşınalıq, tələbələrə qarşı iqtisadi repressiya xətti artıq mərkəzi dairələrin diqqətindədir.

Prezidentin nəzərinə çatdırılan bu neqativ hallardan sonra Baş Prokurorluq və Maliyyə Nazirliyi tərəfindən universitetdə yoxlamalar aparılacağı istisna edilmir.

O da gözlənilir ki, rektora təhsil naziri tərəfindən şiddətli töhmət verilsi. Necə ki Texniki Universitetin rəhbərinə xəbərdarlıq olunmuşdu. Növbənin Muradova çatdığını iddia edən mənbənin sözlərinə görə, Təhsil Nazirliyi gedişatdan agahdır. Nazirlik tərəfindən araşdırmalar aparılacağı da ehtimal olunur.

Mənbə qeyd edir ki, təhsil ocağında rüşvətxorluq elə bir səviyyəni keçib, artıq nəzarət olunmur. Yəni, baş şahin və ətrafı tərəfindən idarə olunan korrupsiya piramidasında gizli əllər olduğu iddia olunur.

Mənbə onu da “Gündəm-xəbər”ə danışıb ki, Ə.Muradov araşdırmaların aparılacağını və mətbuatda yazılanların ajiotajını bilərək təşvişə düşüb. Həyəcanlanan rektor bu təlaşını gizlədə bilməyib və toplantı keçirib. Qeyri-rəsmi iclasda prorektorların və dekanların nəzərinə mühüm məqamları çatdırıb.

Onlara yeniu tədris ilindən etibarən özlərinə çəki-düzən verməyi, rüşvət yığımında ehtiyatlı, nizamlı davranmağı tapşırıb.

Onlara bildirib ki, hər kəs bu prosesdə qurban gedə bilər və həmin şəxsi müdafiə etmək iqtidarında deyil. Bu da rəhbərlikdə təmsil olunanları narahat edib.

Artıq ADUİ ilə bağlı qarşıda yeni bir hərəkətlənmə müşahidə olunacağı deyilir.

Qeyd edək ki, Azərbaycan Dövlət İqtisad Universitetində Ədalət Muradovun rektor təyin olunmasından sonra şayiələr dolaşmağa başladı. Ki, rektor bəyan edib rüşvət alan müəllim, kafedra müdiri, dekan, universitetdən qovulacaq.

İlk əvvəl bu fikirlərin nə məqsədlə dövriyyəyə buraxılmasını bilməsək də, sonradan məlum oldu ki, yeni rəhbərlik keçmiş rektor Şəmsəddin Hacıyevin yaxını bildiyi bir neçə dekan tutduğu vəzifələrdən uzaqlaşdırdı.

Aparılan “islahat”lardan həmin dəqiqə başa düşmək oldu ki, Ədalət Muradov müəyyən müddətli müşahidəni kənara qoyub yeni rektor harasa tələsir, özünə yaxın bildiyi şəxsləri dekan təyin edir.

Bununla kimin hansı savadın sahibi olduğu, ADİU-ni bir pillə qabağa apara bilmə şansları qiymətləndirilmir. Yeni rəhbərin qarşısına qoyduğu hədəfi önləməsi önəm daşıyırdı.

“Ədalət” naminə onu da vurğulamaq yerinə düşər ki, yeni rektor dekanların əvəzlənməsi zamanı bəzi həmyerliləri olan şəxslərə dəymir. Əksinə onlardan bir neçəsini daha yüksək vəzifəyə çəkirdi.

Məsələn, Kommersiya fakültəsinin dekanı, həmyerlisi Qabil Manafovun Magistratura Mərkəzinin direktoru Həsən İsrafilovun yerinə təyin edilməsi, Texnologiya və Dizayn fakültəsinin dekanı Vəkil Hüseynovu, Əmtəəşünaslıq fakültəsinin dekanı Tofiq Osmanovu dekanlıqdan azad etməyib onlara yeni imkanlar yaratması ADİU-də müəllim və professor heyəti arasında ikrah hissi yaradırdı.

Ədalətin pozulması belə izah olunurdu ki, dekanlar işdən çıxarılırsa, onları daha layiqli şəxslər əvəzləməlidir. Elmi şurada təhsil, gələcək perspektivlər elmi məsələlərin həlli müzakirə edilmir, keçmiş rektor Şəmsəddin Hacıyevin özünə və çevrəsinə qarşı ögey münasibət bəslənirdi.

Bunlar isə bir qrup əsl müəllim və professor heyətində narazılıq yaradırdı. Elmi şurada bu qəbildən olan məsələlərə baxılması qəbahət sayılırdı. Bu “kampaniya” Tədris və İnformasiya Texnologiyaları üzrə prorektor Damət Bağırov rəhbərlik edirdi. Sinəsini qabağa verən Damət Bağırov təbii ki, vəzifəsini itirməmək üçün maksimum şəkildə üzərinə götürdüyü bu öhdəliyi “elmi iş”i müdafiə edirmiş kimi yerinə yetirirdi.

Bunlar da arxada qaldı. Hesab edildi ki, Şəmsəddin Hacıyevin zamanında olan “nöqsan”lara son qoyular, Ədalət Muradov ADİU-nin gələcəyi üçün yeni bir səhifə açar.

O, İqtisad Universitetinə hansısa bir yenilik gətirər. Bunun üçün isə mütləqdir ki, ətrafında ağıllı, savadlı, ideya və təşəbbüsü olan şəxsləri birləşdirsin. Bu şərtlər su, hava, qida qədər önəmlidir.

Lakin göründüyü kimi, ADİU-də heç nə dəyişmədi. Əksinə, bu ildən tədricən universitet daxili semestr imtahanlarının kamputerlə götürülməsinə məhdudiyyətlər qoyulmağa başladı.

I kurs tələbələri yazılı test imtahanı verməyə başladı ki, bununla da rüşvət daha geniş miqyas aldı. Hazırda Beynəlxalq iqtisadi münasibətlər (BİM), İqtisadiyyat və sənaye, Kommersiya, Maliyyə fakültələrində tələbələrdən yay semestr imtahanlarının qaydaya qoyulması üçün 1000-1500 manat civarında rüşvət alınmasını heç kim inkar edə bilməz.

Rüşvətlə sürücülük vəsiqəsi verilərkən kamputerdə düzgün cavablarla bağlı düymə necə basılırsa, ADİU-də imtahanları həmin sistemlə həyata keçirirlər.

Deyə bilmərik, ola bilsin ki, rektor Ədalət Muradov bunlardan xəbərsizdir. Amma o da həqiqətdir ki, ADİU-də rüşvət yığılmasına hazırda prorektor Damət Bağırov və Tədris metodiki mərkəzinin direktoru Eldar Azadov rəhbərlik edir.

Onlar ADİU-nin Dərbənd filialından universitetə köçürülmə və sonrakı mərhələdə tələbələrdən hər fənn üzrə fərq imtahanı üçün 800 manat alır. Damət Bağırov və Eldar Azadov bu işdən kifayət qədər mənfəət götürür. Dərbənd filialından ADİU-nə köçürülmə 30-35 min manata başa gəlirsə, sonradan tələbə 15-20 fərq imtahanının hər birinə 800 manat verməli olur. İl ərzində isə 60-70 tələbə Dərbənd filialından ADİU-ya köçürülür.

Məlumat üçün onu da bildirək ki, hələ bir neçə il bundan qabaq media orqanlarında Damət Bağırovla Dərbənd filialının müəllimi olmuş Minə xanım arasında tələbə köçürülmələri ilə bağlı yaranmış narazılıq işıqlandırılmışdı.

Sonradan məlum oldu ki, Minə xanım özünü asaraq intihar edib. Qəribəsi odur ki, Ədalət Muradov rektor təyin olunanda ADİU-də işləyən müəllimlərdə yəqinlik yaranmışdı ki, yeni rəhbər ilk əvvəl Damət Bağırovu tutduğu vəzifədən azad edəcək.

Nəinki bu baş verdi, əksinə, Damət Bağırov yeni rektorun “kassir”inə çevrildi, “idarəetmə”nin əsasları onun adı ilə bağlandı. Görünən odur ki, rektor Ədalət Muradov hələ bir müddət Damət Bağırovu “xərcləyəcək”.

Mənbə bildirir ki, Ədalət Muradov ADİU-nun rektoru postuna 2014-cü ilin mart ayında təyinat alıb. Buna qədər isə universitetə Şəmsəddin Hacıyev rəhbərlik edib.

Düzdür, Şəmsəddin Hacıyevin zamanında da universitetdə hər şeyin ideal vəziyyətdə olduğunu iddia etmək olmaz.

Amma bir məqam da unudulmamalıdır ki, Şəmsəddin Hacıyevin rektorluq illərində ADİU bir sıra uğurlara imza atıb, təhsil ocağının nailiyyətləri dəfələrlə ən yüksək səviyyələrdə müsbət qiymətləndirilib.

Ədalət Muradovun gəlişindən sonra isə onunla bağlı gözləntilər daha çox idi. Təhsil kluarlarında və ictimaiyyətdə belə bir ümid vardı ki, Ədalət Muradov Şəmsəddin Hacıyevdən qalma uğurlu ənənəni layiqincə davam etdirəcək.

Bu xüsusda məlumatlarda bildirilir ki, Ədalət Muradov rektor təyin olunandan sonra “maddi yardım” adı altında universitetin rəhbər vəzifəli işçilərinə “paket” sistemi ilə aylıq ödənişlər həyata keçirməyə başlayıb. Məsələn, məlumatlarda bu gün ADİU-da fakültə dekanlarının ayda 2000 manat məbləğində “əmək haqqı” aldıqları qeyd olunur.

Cəfər

www.gundemxeber.az