Dövlət İqtisad Universitetində şok yoxlamaların nəticəsi kimi sabiq rektorun bütün
adamları və vəzifədəki qohumları xaric edildi; deputat sələfinə qarşı müqavimətsiz qalıb

Deputat, sabiq rektor Şəmsəddin Hacıyevin kadrları silinir. Dövlət İqtisad Universitetində sabiq rektordan qalan kadrlar təmizlənir. Onların yerinə yeni rektora yaxın adamlar təyin olunur. Hakimiyyətin problemli rektorları istefaya göndərməsindən sonra yeni siyasi kurs götürülüb. Məqsəd tələbələri fəallaşdırmağın qarşısını almaqdır.
Ancaq kadr islahatları siyasətində heç bir dəyişiklik yoxdur. Yenə də yeni gələn öz adamlarını başına toplayır. Bunu ADİU-də də görmək mümkündür. Belə ki, artıq sabiq rektorun kadrları çıxdaş edilməkdədir.
ADİU-da demək olar ki, Ş.Hacıyevin kadrları qalmayıb. Qalanlar isə yeni rektorla hesablaşanlar və təyinat aldığı ilk gündən ona sitayiş edənlərdir. Bu barədə “Gündəm-xəbər”ə verilən məlumata görə, Azərbaycan Dövlət İqtisad Universitetində kadr islahatları davam etdirilir. Mənbə bildirir ki, gələcəkdə bu islahatlar davam etdiriləcək. Eyni tendensiya Slavyan Universitetində də davam edir.
Buna misal olaraq, ADİU rektorunun imzaladığı əmrə əsasən Zöhrab İbrahimov “Maliyyə” fakültəsinin dekanı, Həmid Həmidov isə Doktorantura şöbəsinin müdiri təyin edilib. Rektorun digər əmri ilə Raqif Qasımov Magistratura mərkəzinin qiyabi təhsil üzrə direktor müavini təyin edilib.
Mənbə qeyd edir ki, artıq buna qədər sabiq rektorun digər kadrları da universitetdən uzaqlaşdırılıb. Redaksiyamıza daxil olan məlumata görə, işdən çıxarılan tədris metodiki mərkəzin direktoru Əsəd Mirzəyev, maliyyə və mühasibatlıq departamentinin rəhbəri Nazim müəllim və rektoru Rüfət Qasımov sabiq rektor Şəmsəddin Hacıyevə yaxın şəxslərdir. Şəmsəddin Hacıyevin İqtisad Universitetindəki başqa kadrlarının da işdən çıxarılacağı gözlənilir.
Martın 5-də prezident İlham Əliyevin sərəncamı ilə Azərbaycan Dövlət İqtisad Universitetinin rektoru təyin olunan Ədalət Muradov sələfi Şəmsəddin Hacıyevin kadrları ilə bağlı artıq martın 17-dən qərarlarını elan etməyə başlayıb.
Mənbənin məlumatında bildirilir ki, yeni rektor həmin günü Elmi Şuranın genişləndirilmiş iclasını çağırıb. Mart ayının 17-də Elmi Şuranın iclası olub. Orada Şəmsəddin Hacıyevin rektorluğu dövründə vəzifələrə çəkilənlərlə yanaşı, universitetdə illərdir korrupsiya və rüşvət mexanizminin başında dayananların əksəriyyətinin ərizələrinin alınaraq, vəzifələrinə son veriləcəyi planlanıb.
Artıq Şəmsəddin Hacıyevin universitetdəki qohum-əqrəbaları və digər vəzifəli şəxslər də böyük qorxu altındadırlar. Çünki universitetdə bir neçə qurumdan ibarət heyət yoxlama aparılır. Buna görə keçmiş rektorun komandasının yeni rektora müqavimət göstərmək gücləri də minimuma enib.
Universitet rektorunun imzaladığı əmrə əsasən, ali təhsil ocağının Tədris-metodiki mərkəzinin, həmçinin magistratura mərkəzinin direktorları, maliyyə və mühasibatlıq departamentinin rəhbəri və rektorun müşaviri tutduqları vəzifədən azad ediliblər.
Digər əmrə görə, Tədris-metodiki mərkəzə iqtisad elmləri namizədi, dosent Eldar Azadov təyin olunub. O, indiyə qədər Azərbaycan Respublikası Prezidenti yanında Dövlət İdarəçilik Akademiyasının “İnzibati idarəetmə” fakültəsinin dekanı vəzifəsində çalışıb.
Maliyyə və mühasibatlıq departamentinə Nəsimi İsmayılov, Təsərrüfat şöbəsinə Elçin Xəlilov, rektorun müşaviri vəzifəsinə isə iqtisad üzrə fəlsəfə doktoru Elşən Bağırzadə təyin ediliblər. Elşən Bağırzadə “Beynəlxalq iqtisadi münasibətlər” kafedrasının müəllimidir.
İngilis, rus və türk dillərini bilir.
Daha bir təyinat universitetin Beynəlxalq əlaqələr şöbəsinə aiddir. İqtisadiyyat elmləri namizədi, dosent Müslüm İbrahimov bu şöbəyə müdir təyin edilib. Müslüm İbrahimov bundan əvvəl “Beynəlxalq iqtisadi münasibətlər” fakültəsinin dekan müavini vəzifəsində işləyib.
Magistratura mərkəzinin direktoru vəzifəsinin icrası isə müvəqqəti olaraq mərkəzin direktor müavini professor E.Məmmədova həvalə edilib. Rektorun əmrinə əsasən, ali təhsil ocağında ictimaiyyətlə əlaqələr, hüquq və daxili audit şöbələri, eləcə də “Qaynar xətt” xidməti təşkil edilib.