Ədalət Muradovun “eksperimentləri” müəllim-tələbə qarşıdurması formalaşdırır

İmtahanların “qiymətləri” devolivasiyadan sonra valyuta məzənnələri ilə mütəmadi tənzimlənir
Azərbaycan Dövlət İqtisad Universitetinin adı ölkənin ən çox korrupsialaşmış və rüşvətin at oynatdığı təhsil ocaqları içərisində ilk sıralarda çəkilir. Xüsusilə bu ali təhsil müəssisəsinə Ədalət Muradovun rektor təyinatlndan sonra şikayətlərin ardı-arası kəsilmir.
“Gündəm Xəbər”ə daxil olan məlumatlarda universitetdə hökm sürən vəziyyətin artıq tələbələr və müəllimlər üçün dözülməz hal aldığı və ciddi narazılıq doğurduğu vurğulanır. İqtisad universitetində hər şey bir qrupun iqtisadi maraqlarının təmin edilməsinə yönəldilib. Ən dəhşətli zərbə isə Azərbaycan təhsilinə, onun gələcəyinə vurulur. Ədalət Muradovun “yeni iqtisadi siyasəti” nəticəsində universitetdə təhsil sistemi iflas həddindədir, rüşvət və korrupsiya təlim prosesini iflic halına salıb. Rektorun əməlləri barəsində Baş Prokurorluq yanında Korrupsiyaya Qarşı Mübarizə İdarəsinə xüsusi dosye göndərilsə də gözəgörünməz himayədarlar onu qorumağı bacarırlar.
Ədalət Muradovun “islahatları” nəinki tələbələri, hətta müəllimləri də çətin vəziyyətə salıb, universitetdə müəllim nüfuzu zərbə altında qalıb. “Gündəm Xəbər”ə daxil olan məlumatlarda bildirilir ki, Ədalət Muradovun yaratdığı yeni münasibətlər sistemində tələbə müəllimdən öndədir. Belə ki, universitetdə tələbələrin müəllimləri qiymətləndirməsi sistemi yaradılıb. Tələbələr bütün fənlər üzrə müəllimlərinə 10 “fakt” üzrə qiymət verir – necə dərs keçir, davamiyyəti necədir, tələbə ilə necə davranır, tələbkardırmı, tələbəni həddən artıq yükləyirmi və s. Müəllimlər bildirir ki, sistem tətbiq olunandan sonra tələbələrlə davamlı gərginlik yaşayırlar – tələbələr mühazirələri yazmır, müəllim mühazirə dəftəri tələb edəndə “üstümüzə çox gələrsiz, sizə aşağı bal yazarıq” deyib açıq hədə-qorxu gəlirlər. Tələbədən yaxşı bal almaq isə müəllimlər üçün çox vacibdir. Rektorun tətbiq etdiyi daha bir qaydaya görə aşağı bal alan müəllimlərə elmi ad və dərəcələrin verilməsi yubadılır.
Lakin, maraqlı orasıdır ki, rektorun bu “qiymətləndirmə” sistemi ” müəllimlər kimi tələbələr üçün də əsl tələdir. Bildirilir ki, indiyə qədər bir neçə tələbə müəllimlərə aşağı bal verdiyi üçün universitetdən qovulmaq təhlükəsi ilə üzləşib. Rektorun tapşırıqlarını şərtsiz yerinə yetirən dekanlar müəllimlərə aşağı qiymət yazan tələbələrlə “ikialan” müəllimlər arasında gərginlik yaradır, sonucda tələbəyə elan edilir - davranışına görə universitetdən xaric olunursan. Əsl həngamə də bundan sonra başlanır.
Dərhal dövriyyəyə valideynlər, dekanlarla onların arasındakı vasitəçilər girir. Uzun-uzadı danışıqlar, get-gəllər, yalvar-yaxarlardan sonra dekanlar daha yuxarılarla ciddi rəqəmlərlə ifadə olunan anlaşma əldə etməyə razılıq verirlər. Sonda valideyni ciddi xərcə düşən asi tələbə universitetdə saxlanır.
Verilən məlumatda universitetdə rüşvət miqyası katostrofik həddə artıb. İmtahanların “qiymətləri” devolivasiyadan sonra valyuta məzənnələri ilə mütəmadi tənzimlənir.
Məlumatlarda bildirilir ki, ən böyük rüşvət köçürmələr və kəsirlər zamanı alınır. Universitetin Dərbənd filialından köçürmənin qiyməti haqqında fantastik rəqəmlər səsləndirilir - 70-100 min manat. Universitetlərarası köçürmələr qadağan edilsə də bir neçə “şanslı” universitetə, o sıradan İqtisad Universitetinə öz filiallarından tələbə köçürmək səlahiyyəti verilib. Ədalət Muradov bu imkandan məharətlə yararlanır. TQDK imtahanlarında aşağı bal toplayanlar öncə ADİU-nin Dərbənd filialına yerləşdirilir. Sözsüz ki, bu, hər abituriyentə qismət olmur. Öncəlik valideynləri 1 il sonrakı köçürmə üçün ciddi məbləğ təklif edənlərə tanınır. 1 il əli cibində gəzən tələbə 2-ci il universitetdə peyda olur. Ədalət Muradova qədər köçürülən tələbələr ayrıca qrupda təhsil alıb. İndi isə onlar digər qrupların içərisində “əridilir”. Məqsəd aydındır. Aşağı bal yığan tələbələrdən formalaşdırılan qruplarda imtahan nəticələri də bərbad olur. Bu zaman onların fərq imtahanlarını necə vermələri haqqında çoxlu suallar yaranır. Yeni rektor ehtimal olunan yoxlamalar zamanı belə suallarla üzləşməmək üçün köçürmə tələbələri digər qruplara bölür ki, onların aşağı nəticələri ümumi fonda nəzərə çarpmasın.
Redaksiyamıza daxil olan məlumatlarda imtahanlarda alınan rüşvətin başgicəlləndirən məbləğləri də açıqlanıb. Bildirilir ki, kəsirlərin düzəldilməsi üçün isə tələbələrdən 3-7 min manat tələb olunduğu bildirilir. Sonrakı yerləri magistr, diplom işləri tutur 1500-2000 manat.

“Gündəm Xəbər”ə verilən məlumata görə Ədalət Muradov ADİU-da “sülalə idarəetmə sistemi” formalaşdırır. Universitetdə Ədalət Muradovla qohumluq əlaqəsi olan 40-a yaxın şəxs çalışır. Məlumatlarda bildirilir ki, onun heç bir pedaqoji təcrübəsi olmayan qohum-qardaşı uzun illər universitetdə dərs deyən müəllimlərin başı üzərindən adladılaraq önəmli postlara çəkilir. Bu şəxslərə elmi adlar və vəzifələr də səxavətlə paylanır. Effektiv ailə iş üsulu nəticəsində auditoriyaya cəmi 1-2 semestr daxil olan qohumlar baş müəllim, fəlsəfə doktoru titul və vəzifələri ilə ödülləndirilir. Heç şübhəsiz, bu durum illərlə dərs deyib müəllimlikdən baş müəllimliyə, baş müəllimlikdən dosentliyə yüksələ bilməyənlərdə qıcıq yaradır.
Verilən xəbərlərdə son imtahan sesiyasında universitetdə dəhşətli durumun hökm sürdüyü vurğulanır. Tələbələr durmadan artan rüşvətin miqyasından narazılıqlarını gizlətmirlər. Lakin, rektor universitetdə formalaşdırdığı “sülalə idarəetməsi” nəticəsində narazılıqları beşiyindəcə boğmağı bacarır. İqtisad Universiteti bir qrupun iqtisadi maraqlarını təmin etməyə xidmət etməkdə davam edir.

Cəfər