Müxalif medianın yazdıqları dövlət başçısının dilindən səsləndi

“Vəzifəli şəxslərin uşaqları qudurğanlıq edirlər”

Dünən Bakı Biznes Mərkəzində İlham Əliyevin sədrliyi ilə “2009-2013-cü illərdə Azərbaycanın regionlarının sosial-iqtisadi inkişafı üzrə Dövlət Proqramı”nın həyata keçirilməsinin dördüncü ilinin yekunlarına həsr edilmiş konfrans işinə başlayıb.
İclas ərəfəsində 2003-2012-ci illərdə həyata keçirilmiş işlərə həsr olunmuş sərgi təşkil edilib. Sərgidə iqtisadiyyatın ayrı-ayrı sahələri – sənaye, infrastruktur, informasiya-kommunikasiya texnologiyaları, kənd təsərrüfatı, sosial inkişaf, turizm və s. üzrə ölkənin sosial-iqtisadi inkişafının əsas göstəriciləri əks olunur. Qeyd edilib ki, 2003-2012-ci illərdə ümumi daxili məhsul üç dəfə, o cümlədən qeyri-neft sektorunda 2,4 dəfər artıb, orta aylıq əmək haqqı 5,1 dəfə yüksəlib. Bu dövr ərzində ölkənin strateji valyuta ehtiyatları 28,8 dəfə artaraq, 46 milyard dollar təşkil edib.
Tədbirdə dövlət başçısı tərəfindən sensasion çıxış edilib. «Vəzifəli şəxslərin uşaqları qudurğanlıq edirlər. İnsanları təhqir edirlər. Özlərini apara bilmirlər. Kim onlara bu statusu verib cəmiyyətdə? Onların, necə deyərlər, güvəndiyi adamları mən təyin eləmişəm vəzifəyə. Mən də çıxardacağam, lazım bildikdə. Bir də bilsəm ki, kiminsə ailə üzvü haradasa xuliqanlıq eləyir, nadanlıq eləyir, özünü apara bilmir, o adam həbs ediləcək, atası işdən qovulacaq»-deyə İlham Əliyev bildirib.

«Bəzi hallarda məmurlar vətəndaşları saymır, qudurğanlıq edirlər»

Prezident çıxışında bəzi icra hakimiyyəti başçılarının öz məsuliyyətlərini dərk etmədiklərini də bildirib: «Bizim dövlət siyasətimizin mərkəzində Azərbaycan vətəndaşıdır. Hər şeyi biz Azərbaycan vətəndaşı üçün edirik. Budur bizim məqsədimiz. Hər bir icra başçısını mən vəzifəyə təyin edərkən, onu qəbul edərkən ona bir neçə əsas istiqaməti göstərirəm. İnkişaf, quruculuq, səmərəli iş, təvazökarlıq və insanlara xidmət. Burda oturan bütün icra başçılarını mən təyin etmişəm, hamısını. Bəzi rayonlarda bir neçə dəfə dəyişmişəm. Nəyə görə? Çünki etimadımı doğrultmayıblar. Hər birinə demişəm ki, gedin insanlara arxa durun, gedin köməklik göstərin, gedin insanlara hörmət edin. Amma bəzi hallarda mən bunu görmürəm. Görməyəndə də tədbirlər görürəm. Bəzi hallarda məmurlar vətəndaşlara yuxarıdan aşağı baxırlar. Onları saymırlar, onları təhqir edirlər, qudurğanlıq edirlər. Bütün bunlar var. Onlar aradan götürülməlidir».

«Özləri üçün böyük məclislər düzəldirlər»

Prezident məmurların keçirdikləri məclislərdən də danışıb: «Bəzi hallarda özləri üçün böyük məclislər düzəldirlər. Təmtəraqlı toylar düzəldirlər, yubileylər düzəldirlər. Yaraşırmı bu dövlət məmuruna? Mən öz 50 illiyimi Ağcabədidə köçkünlərlə keçirmişəm. Bu, mənim təbiətimdir. İkincisi bir yol göstərirəm. Belə olmaq lazımdır. Təmtəraqlı toylar, ad günləri, yubileylər, bahalı hədiyyələr, bunu yığışdırın, bəsdirin. Kim bunu eləyir, bilir kimi mən nəzərdə tuturam. Bu, həm yerli icra orqanlarına aiddir, həm də mərkəzi icra orqanlarının rəhbərlərinə aiddir».

«Sahibkarları incidənlər cəzalandırılacaq»

İlham Əliyev sahibkarların rayonların abadlıq işlərinə cəlb edilməsindən danışıb: «Hər bir rayonun öz büdcəsi var. Hər bir rayona dövlət tərəfindən vəsait ayrılır. Prezidentin Ehtiyat Fondundan mütəmadi qaydada vəsait ayrılır. Bu vəsaitlə iş görmək lazımdır. Sahibkarları bu işlərə cəlb etmək lazım deyil. Kim istəyir, kömək eləsin. Amma bəzi hallarda onları məcbur edirlər. Böyük həcmdə onlar xərc çəkirlər. Sonra da pulunu vermirlər. Belə olmaz. Kimsə fikirləşir ki, mənə bu məlumatlar çatmır, səhv edir. Bütün məlumatlar çatır. Bir də deyirəm, bütün icra başçıları bilsinlər, sahibkarları incidən cəzalandırılacaq».
“Xəbər xidməti”