Dünən AXCP sədri Əli Kərimlinin müşaviri Məmməd İbrahim Elvin Baycanın partiyaya üzv olmadığını açıqlayıb.

Avropa.info xəbər verir ki, M. İbrahimin E. Baycanın üzv olmağını açıqlaması ikinci tərəfin sərt reaksiyasına səbəb olub.

Elvin Baycan redaksiyamıza müraciət ünvanlayaraq özünün AXCP üzvü olduğunu sübuta yetirmək üçün öz vəsiqəsini də göndərib.
Həmin müraciəti sizə təqdim edirik:

“Dünən (09.09.2015 tarixində) AXCP sədi Əli Kərimlinin qeyri-rəsmi müşaviri Məmməd İbrahim “Facebook” səhifəsində mənim haqqımda xoşa gəlməyən sözlərdən ibarət öz adına və şərəfinə layiq status yazıb. Guya ki, mən AXCP-nin rəsmi üzvü deyiləm. Amma partiya biletini 29.03.2011-ci ildə şəxsən Əli Kərimli öz imzası ilə özü mənə təqdim edib. Partiyaya üzv olduğum gündən etibarən AXCP GK-nin sıravi üzvü olmuş və çox keçmədən AXCP Xətai rayonu üzrə Gənclər Komitəsinin sədri vəzifəsində fəaliyyətimi davam etdirmişəm.
Hal-hazırda yenə həmin partiyanın üzvüyəm. Mətbuat vasitəsi ilə Məmməd adlı qeyri-rəsmi müşavirə səslənərək bildirmək istəyirəm ki, mən partiyadan heç bir izahatla istefa verməmişəm və məni də heç kimsə partiyadan xaric etməyib. Partiya heç kimin şəxsi mülkü deyil istədiyi kimi idarə edə. Mən və mənim kimi yüz minlərlə mübariz insanlar partiyanın yaşaması və ayaqda durması üçün canlarından qanlarından keçiblər.

Əli Kərimlinin qeyri-rəsmi müşaviri Məmməd İbrahimdən fərqli olaraq onun kimi ağır təhqirlə cavab verməyəcəm. Çünki mənim böyüklərim mənə belə tərbiyə verməyiblər. İsa peyğəmbərin bir gözəl kəlamı var; “Biri pisliyindən geri qalmırsa, mən niyə yaxşılığımdan geri qalım?” Bir vaxtlar Yevlax rayonunda cibgirlik üstündə həbs olunan bu gün namaz qılıb, onu-bunu təhqir etməklə məşğuldur.
Belə yerdə deyiblər, oğru elə bağırdı, doğrunun bağrı yarıldı. Düzü, mən bu haqda yazmaq istəmirdim. Amma Məmməd İbrahim özü məni vadar etdi. Bu gün cavabını almayan sabah başqa cürə danışar. Maraqlısı bundadır ki, Məmməd İbrahimə kim haqq və səlahiyyət verib kimlərisə təhqir etsin. Yaman gündə bunlar dost qazanmaq əvəzinə özlərini daha da ifşa edirlər. Əgər bir insan yaxşıdırsa onun haqqında pisliyə doğru danışmaq ən böyük vicdansızlıqdır. Biz istəməzdik AXCP-dən mübariz insanlar istefa versinlər görünür Məmməd və Məmməd kimləri bunu etməkdə israrlı imişlər.

Dünən Razi Nurullayevlə çiyin-çiyinə mübarizə aparanlar bu gün Razi Nurullayevi ifşa etməklə məşğuldurlar. Görünən dağa nə bələdçi? Harada olub mübarizəmi və siyasi fəaliyyətimi harada davam etdirmək haqda qərarı mən özüm verə bilərəm. Hal-hazırda alternativ Razi Nurullayevin rəhbərlik etdiyi AXCP Etimad Qurultayına hazırlıq üzrə Təşkilat Komitəsini dəstəkləyirəm. Burada qeyri-adi heç nə yoxdur. Burada birləşən mübariz insanlar Əli Kərimlinin onun bir çox müavinlərinin etdikləri haqsızlığa görə bu gün yeni düşərgədə eyni bayraq altında birləşib fəaliyyətlərini davam etdirirlər".