Görəsən yol polisi əməkdaşları, yaxud da onların rəhbərliyi şəxsi avtomobillərini iş otaqlarından neçə km aralı məsafədə saxlayırlar ki, atdıqları addım heç zaman heç bir söz-söhbətə səbəb olmur?

2015-ci ilin 15 sentyabr günü kimlərə düşərli olsa da, deyəsən “Azərbaycan” nəşriyyatında jurnalist fəaliyyəti ilə məşğul olanlardan bir neçəsinə heç də düşərli olmadı. Buna səbəb yol polisi əməkdaşlarının həmin günün günorta saatlarında, bir qədər də dəqiq desək 15.49 radələrində, Bakı şəhər Dövlət Yol Polisi İdarəsinə məxsus 99-YP-365 nömrəli nəqliyyat vasitəsi ilə, “Azərbaycan” nəşriyyatının giriş qapısının 5-10 metrliyində əməliyyat keçirmələri oldu.

Əvvəla bir məqama diqqət yetirək ki, “Azərbaycan” nəşriyyatı doqquz mərtəbəli binadan ibarətdir və xeyli sayda insanlar, qeyd olunan binada yaradıcılıq fəaliyyəti ilə məşğul olurlar. Və həmin şəxslərdən çoxunun şəxsi avtomobili olduğundan, onlar məcburdurlar ki, özlərinə məxsus nəqliyyat vasitələrini “Azərbaycan” nəşriyyatının ön hissəsində saxlasınlar. Çünki, qeyd olunan ərazidən başqa bir ərazi, hansısa dayanacaq yoxdur ki, kimsə avtomobilini həmin yerdə saxlaya bilsin. Belə bir halın varlığına məhəl qoymayan yol polisi əməkdaşları isə, 15 sentyabrda günün günortaçağı onu bəhanə etdilər ki, siz avtomobillərinizi dayanacağa yaxın saxlamısınız, odur ki, cərimə olunmalısınız. Çox maraqlı və gülüş doğuran bir yanaşmadır ki, həmin yanaşmanı da yol polisi əməkdaşları açıq-aydın şəkildə nümayiş etdirdilər.

Amma, o məqama toxunub bir aydınlıq da gətirmədilər ki, hansısa təlimat qəbul olunub ki, vətəndaş şəxsi avtomobilini dayanacağa neçə metr yaxın məsafədə saxladıqda cərimə oluna bilər. Həmin gün belə bir cərimə olayı ilə üz-üzə qalan jurnalistlərdən biri də, “Gündəm Xəbər” qəzetinin rəhbəri Şirin Cəfəri oldu.

Onu da qeyd edək ki, “Gündəm Xəbər” qəzetinin redaksiyası “Azərbaycan” nəşriyyatının 1-ci mərtəbəsində yerləşdiyindən, o, Rusiya istehsalı olan VAZ-21154 markalı (015) və 90-FN-315 dövlət qeydiyyat nişanlı avtomobilini redaksiyanın ön hissəsində, dayanacaqdan isə təqribən 10 metr aralı məsafədə saxlasa da, yol polisi əməkdaşları buna heç vəhclə məhəl belə qoymadılar. Bir qədər mübahisədən sonra onu əsaslandırdılar ki, “sən də avtomobilini dayanacağa yaxın saxlamısan, odur ki, cərimə olunmalısınız” deməklə, digərləri kimi Şirin Cəfərini də 40 manat cərimə etdilər.

Belə olan halda ortaya çoxsaylı suallar çıxır. Görəsən yol polisi əməkdaşları, yaxud da onların rəhbərliyi şəxsi avtomobillərini iş otaqlarından neçə km aralı məsafədə saxlayırlar ki, atdıqları addım heç zaman heç bir söz-söhbətə səbəb olmur?

Diqqəti başqa bir məqama da yönəldək ki, Nuşirəvan Səfərovun rəhbərlik etdiyi Bakı şəhər Dövlət Yol Polisi İdarəsi, bu gün ictimai həyatımızda ən çox rüşvətxorluğa, qanunsuzluğa, hasızlığa söykənməklə, fəaliyyətini davam etdirən bir qurum olaraq xüsusi ad da çıxarıb. Məslən, adicə həmin binanın birinci mərtəbəsində, sərxoş sürücülərdən sənədlərini geri qaytarmağın müqabilində əvvəlcə 600-700 manatın istənilməsi və son anda 500 manatla razılaşma qanunsuzluq deyilmi? Və razılaşdırılmış 500 manatdan 200 manatın əvvəlcədən ödənilməsini və alınmış 200 manata görə heç bir qəbzin verilməməsi, dolayısı yolla kimlərinsə cibinə daxil olması da qanunsuzluq deyilmi? Hələ yuxarı mərtəbələrdə radarlarla və çoxsaylı qanunsuzluqlarla bağlı qol qoyulan maxinasiyaların açıqlamalarını demirik.

Belə olan halda əməliyyatın “Azərbaycan” nəşriyyatında, yoxsa Bakı şəhər Dövlət Yol Polisi İdarəsndə aparılmasına zərurət yaranır? Yəqin ki, belə bir sualın cavabını qeyd olunan qurumun səlahiyyətliləri cavablandıra bilməsələr də, geniş ictimaiyyət və Azərbaycan mətbuatında zəhməti olan jurnalistlər dolğun şəkildə cavablandıra bilərlər.

P.S. Görəsən səbəb nədir ki, yol polisi əməkdaşları Şirin Cəfəriyə məxsus avtomobili cərimə edərkən, Mətbuat Şurasının təsdiq etdiyi və avtomobilin şüşəsinə

yapışdırılmış “pressa”ya məhəl qoymurlar, elə ki, fakt qarşısında qalırlar, həmin an qeyd olunan qurumun ünvana üz tutmağa məcbur olurlar.

Mövzunu diqqətdə saxlayacağıq.

Cəfər

gundemxeber.az