Ölkə son 10 ildə parlamentdən bir neçə gurultulu həbslərə şahidlik edib

Milli Məclisin keçmiş üzvü, deputat Gülər Əhmədovanın həbsi ictimai-siyasi arenada ciddi rezonans doğurub. Bu, son 10 il ərzində türmə həyatı yaşamış deputatlar siyahısına daxil olan növbəti soyaddır. Ölkə son 10 ildə bu tip bir neçə gurultulu həbslərə şahidlik edib.
2003-cü ildə keçirilən prezident seçkiləri zamanı baş verən qarşıdurmanın nəticəsi Milli Məclisin deputatı İqbal Ağazadə üçün ağır oldu. Seçkilərdə blok yaratmış İqbal Ağazadə ilə İsa Qəmbərin tandemi seçki kampaniyasının aktiv hissəsinin üzərinə götürsə də, 15-16 oktyabr 2003-cü ildə baş verən vətəndaş qarşıdurması nəticəsində ciddi fəsadlara gətirdi. Deputat İqbal Ağazadəyə “kütləvi iğtişaş” maddəsi ilə cinayət işi açıldı və həbs olundu. Parlament onun toxunulmazlıq hüququnu əlindən aldı. 2005-ci ilə qədər həbsdə yatan eks-deputat sonradan prezident İlham Əliyevin imzaladığı əfv fərmanı ilə azadlığa çıxıb.
Daha bir deputatın adı 2005-ci ilin parlament seçkiləri zamanı gündəmə gəldi. Həmin ilin oktyabrında Azərbaycanda dövlət çevrilişnə cəhd ittihamı ilə bir sıra yüksək rütbəli məmurlar həbs edildilər. Bunların sırasında iqtisadi inkişaf naziri Fərhad Əliyev, səhiyyə naziri Əli İnsanov, Prezident Administrasiyasının işlər müdiri Akif Muradverdiyevlə yanaşı, Milli Məclisin deputatı Fikrət Sadıqov da var idi. Sumqayıtdan Milli Məclisə deputat seçilmiş Fikrət Sadıqov uzun illər bu şəhərin kimya zavodlarına rəhbərlik etmişdi. Milli Məclis dövlət çevrilişinə cəhddə ittham olunan deputatı Baş Prokurorluğun parlamentə müraciətindən sonra toxunulmazılq hüququndan məhrum etdi. F.Sadıqov bir müddət ev dustağı edildikdən sonra ictimai diqqətdən kənarda qaldı. O, hazırda Milli Elmlər Akademiyasının institutunda çalışır.
Bu hadisədən iki il sonra ölkə yenidən deputat həbsinin şahidi oldu. Milli Məclisin 2007-ci ildəki yaz sessiyasının iclasında hökümətin hesabatı təqdim olunarkən deputat Hüseyn Abdullayevin etiraz çıxışı parlamentdə böyük qalmaqalla nəticələndi. Fəzail Ağamalının replikasına H.Abdullayevin əsəbi reaksiyası əlbəyaxa dava ilə nəticələndi. Dava-dalaşdan sonra Milli Məclisin İntiazm komisiyyası H.Abdullayevin işi ilə bağlı kəskin qərar çıxardı. Mandatdan məhrum olunan deputat barəsində Baş Prokurorluq cinayət işi açdı. 2 aylıq həbsdən sonra azadlığa buraxılan H. Abdullayevin ilk addımı ölkəni tərk edərək Almaniyaya getməsi oldu. Eks-deputat bunu səhhətində yaranmış problemlə bağladı. Sonra yenidən vətənə qayıtdı...
Sonuncu belə fakt Gülər Əhmədova ilə bağlıdır. 2012-ci ilin sentyabrında ABU-nun eks-rektoru Elşad Abdullayevin yaydığı videoda deputat mandatı ilə bağlı bazarlıq faktı ölkədə bomba kimi partladı. Ötən ilin noyabrında mandatdan imtina edən G.Əhmədova bunu istintaqa kömək məqsədi ilə etdiyini vurğulamşdı. Ötən həftə isə Baş Prokurorluq eks-deputatın həbs olunması ilə bağlı qərar qəbul edib.