Prezidentin müşavirəsindən sonra “Tonqal”
restoranında silahlı atışma olub və xəsarət alanlar var

Atışmada generalın qardaşı oğlanlarının olduğu deyilsə də, DİN insident baş verməsini təkzib edir

Prezident İlham Əliyevin hökumətin toplantısında bəzi məmurlara və onların «qudurmuş» övladlarına barmaq silkələməsindən heç bir həftə keçməmiş növbəti analoji hadisə yaşanıb.Fevralın 19-dan 20-nə keçən gecə Bakıda, Həsən Əliyev prospektində yerləşən “Tonqal” restoranında müdhiş olay baş verib.
“Bizim Yol” qəzetinin yazdığına görə, hakimiyyətin yuxarı eşelonlarında təmsil olunan bir generalın yaxın qohumları restoranda yeyib-içəndən sonra dava - dalaş salıblar. Mübahisə yumruq davasına, dava isə silahlı atışmaya qədər böyüyüb. Restoranın yaxınlığındakı binalarda yaşayan sakinlər hadisə yerinə polis çağırıblar. Amma hadisə yerinə gələn polis əməkdaşları, əməliyyatçılar atışan şəxslərin kimliyini bildikdən sonra olaya müdaxilə etməkdən çəkiniblər. Beləliklə generalın qardaş uşaqları və dostları “razborka”nı bitirəndən sonra heç nə olmayıbmış kimi ərazidən uzaqlaşıblar.
«Bizim Yol»un iddiasına görə hadisə zamanı bir neçə nəfərin ağır xəsarət alıb. Hadisə yerinə yaxın ərazidə yaşayan sakinlər də baş verənlər barədə danışmaq istəməyib. Vətəndaşlar həmin şəxslərin cəzalandırılmasının mümkün olmadığını bildiriblər. Xatırladaq ki, prezident İlham Əliyevin fevralın 12-də keçirdiyi müşavirədə məmurlara xəbərdarlıq edərək belə hərəkətləri yığışdırmağı tələb etmişdi:
“…Harınlayırlar, qudururlar, heç kimi saymırlar! Vəzifəli şəxslərin uşaqları qudurğanlıq edirlər, insanları təhqir edirlər, özlərini apara bilmirlər. Kim onlara bu statusu verib cəmiyyətdə?! Onların, necə deyərlər, güvəndiyi adamları mən təyin etmişəm vəzifəyə, mən də çıxaracağam lazım bildikdə.
Əgər bir də bilsəm ki, kiminsə ailə üzvü haradasa xuliqanlıq edir, nadanlıq edir, özünü apara bilmir, o adam həbs ediləcək, atası işdən qovulacaqdır. Bunu hamı bilsin! Şəhər küçələrini yarış meydanına çevirənlər də bilsinlər! Hamısı həbs ediləcək! Vəssalam! Daxili işlər naziri gündə mənə məlumat verəcəkdir. Avtoxuliqan, özünü apara bilməyən, ictimai asayişi pozan, qanunlara əməl etməyən, adət-ənənələrimizi yerə vuran hər bir kəs cəzalandırılacaqdır. Onu hamı bilsin”.
Prezident daxili işlər nazirinin hər gün ona məlumat verməsini tələb edib. Amma görünür ölkədə Daxili İşlər Nazirliyinin belə gücü çatmadığı məsələlər var. Burda diqqəti cəlb edən başqa bir məqam da var. Əlbəttə, bu məsələnin baş verənlərin mahiyyətinə heç bir aidiyyatı olmasa da maraq doğurur.
Yanvarın 23-də İsmayıllı sakinlərini üsyana qaldıran nazir balasının “Çıraq” hotelində yeyib-içib aləmi bir birinə qatması səbəb oldu. Nədənsə bu dəfə hadisə “Tonqal”da baş verib, həm də prezidentin barmaq silkələməsindən və bir neçə məmuru işdən qovmasından qısa bir zaman sonra.
Görünür, hakimiyyətin içində hələ də kifayət qədər tonqal qalayanlar var. Belə olmasaydı, müşavirədən az bir vaxt sonra belə bir olay baş verməzdi. Hadisə ilə bağlı “Gündəm xəbər”ə mötəbər qaynaqdan gələn xəbərə görə, həmin generalın kimliyi bəllidir. Onun qardaşı oğlu ilk dəfə deyil ki, silahlı atışmada iştirak edir.
Atışmaya səbəb isə generalın qardaşı oğlanlarına qarşı saymazlıq edildiyi bildirilir. Restoranda yeyib-içən həmin şəxslər deyilənə görə, hörmətsizlik edib, generalın qardaşı oğlanlarını saymayıb və mübahisə düşüb. Məlumata görə, atışma zamanı həmin şəxslər ayağından vurulub.
Daxili İşlər Nazirliyi isə silahlı insident baş verməsi barədə mətbuatda yayılan informasiyalara münasibət bildirib. Nazirliyin mətbuat xidmətinin şöbə rəisi Orxan Mansurzadə APA-nın sorğusuna cavabında qeyd edib ki, bu barədə bəzi kütləvi informasiya vasitələrində yayılan məlumatlar yalandır: “Fevralın 19-dan 20-ə keçən gecə “Tonqal” restoranında heç bir hadisə baş verməyib. Bəzi kütləvi informasiya vasitələrində həmin restoranda guya bir neçə şəxs arasında mübahisə düşməsi və nəticədə atışma olması barədə yayılan məlumatlar həqiqətə uyğun deyil və tərəfimizdən təkzib olunur”.

Aslan