Abbas Abbasov Ziya Məmmədovun Dağıstanda obyektlərini sökdürür

RATİ-nin üzvü olan Ramazan Abdulatipov gələr-gəlməz Azərbaycan hakimiyyətinə barmaq silkələdi

Azərbaycan hakimiyyəti ilə “Milyarderlər İttifaqı” arasındakı soyuq müharibə barədə yazdıqlarımız təsdiqlənir. Əliyevlərə qarşı təzyiq rıçaqlarının genişləndiyi hər ampluada nəzərə çarpır. Belə ki, Dərbənddə nəqliyyat naziri Ziya Məmmədova məxsus olduğu deyilən iki otel, bir istirahət mərkəzi və daha bir neçə obyekt söküləcək.

Abdulatipovun keçilməz “Qostinıy dvor”u

Bu barədə Dərbənddə yaşayan həmyerlimiz Elman Həsənəliyev “Azadlıq” qəzetinə məlumat verib. Onun dediyinə görə, sökülən və obyektlər arasında şəhərin Rıbzavod, küçəsi 54 ünvanında yerləşən “Qostinıy dvor”, Krasnaya Zarya küçəsi 13-də yerləşən “Freqat” otelləri var. Bundan başqa Xəzərin sahilində yerləşən “Çayka” istirahət mərkəzinin satın almasında baş verən qanunsuzluqlarla əlaqədar onun fəaliyyəti dayandırılır.
E.Həsənəliyevin dediyinə görə, Dərbəndin Qamzatov küçəsində və köhnə bazar deyilən ərazidə yerləşən iki restoran da arxitektura qaydalarına uyğun gəlmədiyi üçün söküləcək. Adı gedən ünvanlardakı restoranların təhsil nazirliyində yüksək vəzifədə çalışan məmura aid olduğu deyilir. Otel və istirahət mərkəzlərini isə Ziya Məmmədovun hələ 8-9 il bundan qabaq aldığı bildirilir. Onu da qeyd edək ki, dünən Dağıstan prezidentinin səlahiyyətlərini icra edən Ramazan Abdulatipov Dərbənddə olub.
Məlumata görə, Dərbəndi gəzən Ramazan Abdulatipov şəhərin sel basan hissəsinin hələ də dağıntı və palçıqdan təmizlənməməsinə əsəbiləşib.
Ramazan Abdulatipov şəhər sakinləri qarşısında Dərbənd şəhərinin meri İmam Yarəliyevi danlayıb. Eləcə də Dərbənd rayon Administrasiyasının başçısı Qurban Qurbanovu sərt tənqid edib. Nazirin əmlaklarının yerlə-yeksan olunması planı isə ciddi narazılıqla qarşılanıb. Z.Məmmədov mülklərini qorumaq üçün hərəkətə keçib və Dərbənd rəhbərliyi ilə razılıq əldə etməyə can atır. Bu haqda əldə etdiyimiz özəl məlumata görə, R.Abdulatipov ilk günlərdə özünü xalqın qayğısına qalan bir rəhbər kimi göstərməyə çalışır.

Ziya Məmmədova verilən Dağıstanın fəxri adı

Ona görə də məmurların əmlakına qol qoyur, əhalinin sosial problemləri ilə maraqlanır. Z.Məmmədov isə R.Abdulatipova “elçi” düşmək üçün Azərbaycan rəhbərliyi ilə əlaqə saxlayıb. Nazir obyektlərinin əldən getdiyini bildirərək prosesin dayandırılmasını xahiş edib. Hələlik ona bir cavab verilməyib. Ehtimal olunur ki, R.Abtulatipov “Milyaderlər İttifaqı”nın bir nümayəndəsi kimi Azərbaycan hakimiyyətində təmsil olunan iri ranqlı, böyük pullara sahib olan nazirə təzyiq göstərir.
Bir müddət əvvəl Azərbaycanın nəqliyyat naziri Ziya Məmmədova nəqliyyat sahəsində göstərdiyi xidmətlərinə görə Dağıstan Respublikası Dövlət Şurasının sədri Moqamed Maqomedovun fərmanı ilə “Dağıstan Respublikasının fəxri nəqliyyat işçisi” adı verilib. Bundan başqa, Dağıstan Respublikasının Dərbənd rayonu administrasiyasının qərarı əsasında isə Z.Məmmədova Dərbənd rayonu qarşısındakı xidmətlərinə görə “Dərbənd rayonunun fəxri vətəndaşı” adı verilib.
Qərarı Dağıstan Respublikası Dövlət Şurasının üzvü, Dərbənd rayon administrasiyasının başçısı K.Kurbanov imzalayıb. İndisə Dağıstanın fəxri vətəndaşı və nəqliyyatçısına məxsus tikililər buldozer qabağına verilib uçurulacaq. Belə bir addım atılacağı halda hansı proseslərin cərəyan edəcəyini bəri başdan təxmin etmək çətindir.
Yada salaq ki, nəqliyyat nazirinin Azərbaycanda olduğu kimi, Dağıstanda da yük daşımaları şirkətləri, hotelləri, böyük zavod və fabrikləri fəaliyyət göstərir. Həmin müəssisələrdə xeyli yerli sakin işlə təmin olunub. Bundan başqa, nəqliyyat nazirinin Dağıstanda saysız-hesabsız qoyun sürülərinin olduğu da bildirilir. İstisna deyil ki, nazirin zavod-fabrikləri, mal-qara təsərrüfatı da əlindən alınsın.

“Milyarderlər İttifaqı” Dağıstanda...

Dağıstanın əvvəlki rəhbərliyi ilə sıcaq münasibətlərdə olmuş nazirin çirkli pullarla əlaqəsi olduğu da iddia olunur. Adı daim korrupsiyada hallanan nazir Dağıstandakı biznesindən gələn gəliri bu ölkəyə yatırmaqla özünə müəyyən immunitet və üstünlüklər əldə edib. Z.Məmmədovun bu addımlarını nazir postundan uzaqlaşandan sonra ölkədən getmək istəyinin olması ilə də əlaqələndirənlər var. Yəni, Z.Məmmədov özünə indidən “ehtiyat aerodrom” hazırlayır. O, “vurulacağı” təqdirdə ölkəni tərk edərək rahatca qonşu ölkələrin birində yaşamağı planlaşdırır. Bəs, niyə Z.Məmmədovun obyektləri dağıdılır və bunu kim edir?
Vurğulayaq ki, Dağıstanda böyük biznesi olan azərbaycanlı məmurlar arasında baş nazirin sabiq I müavini Abbas Abbasov da var. Dağıstanın yeni rəhbəri isə A.Abbasovla birgə “Milyaderlər İttifaqı”nda təmsil olunur.
Bu iki şəxsin Dağıstanda peyda olması və Z.Məmmədovun obyektlərini uçurtmaq planı məhz Rusiyanın Azərbaycan hakimiyyətinə olan təzyiqlərinin tərkib hissəsidir. Çoxları sual verə bilər ki, bəs həmin ittifaqda olan Z.Məmmədovun yaxın dostu AST-Telman niyə onu qorumur? Və sual ritorikdir. Çünki AST-Telman Rusiyanın bu layihəsində birbaşa iştirak etmir və onun Kremlin projesinə müdaxilə etmək haqqı yoxdur. Meqa-layihəyə görə bir nazirlə dostluğu pozmaq elə bir faciəvi hadisə deyil. Göründüyü kimi, Dağıstanda biznesi olan A.Abbasov Abdulatipovun vasitəsilə nazirin mülklərini dağıtdırmaq istəyir.

Yusif Aslan