Ziya Məmmədovun nazirliyi və restoranı söküləcək
Bakının Yasamal rayonundakı Nəqliyyat Nazirliyinin inzibati binası söküləcək.

Nazirlik üçün yeni inzibati bina isə Keşlə qəsəbəsində, İntellektual İdarəetmə Sisteminin yaxınlığında tikilir. Hazırda nazirliyin yeni binasının tikintisi davam edir.
Nazirliyin Tbilisi prospektində yerləşən hazırkı binasının söküntüsü yaxın aylarda həyata keçiriləcək. Qeyd edək ki, Nəqliyyat Nazirliyi üçün yeni tikilən inzibati bina Heydər Əliyev prospektində yerləşir. Burada eyni zamanda Dövlət Neft Şirkəti (SOCAR Tower), Dövlət Neft Fondu, Azərbaycan Hava Yolları QSC (AZAL) üçün yeni inzibati binaların tikintisi davam etdirilir.

Bildirilir ki, ərazidə həyata keçiriləcək söküntü planına Tbilisi prospektində yerləşən “Karvan” şadlıq sarayı da daxildir. Restoranın söküntüsü hazırda Alatavada davam edən kütləvi söküntünün bir hissəsidir. Nəqliyyat Nazirliyi və “Karvan” şadlıq sarayı bir-birinə yaxın ərazidə yerləşir. Hər iki bina söküldükdən sonra ərazi boş qalmayacaq. Məlumata görə, həmin yeri adını dəqiqləşdirə bilmədiyimiz tikinti şirkətlərindən biri alıb. Bakı Şəhər İcra Hakimiyyəti sözügedən ərazidə yaşayış kompleksinin tikintisinə icazə verib.

Mətbuatda gedən xəbərlərdə isə “Karvan” şadlıq sarayının nəqliyyat naziri Ziya Məmmədovun olduğu iddia olunur.

Xatırladaq ki, 2010-cu ildə bu restorandan 500 min manat oğurlanmışdı. O vaxt mətbuat oğurluq baş verən restoranın Ziya Məmmədova məxsus olduğunu yazmışdı.