“Rəhbərlik etdiyim Azərbaycan Xalq Cəbhəsi Partiyasının digər partiyalar tərəfindən tanınmasını xahiş etmək fikrimiz yoxdur. Buna ciddi ehtiyacımızın da olduğu qənaətində deyilik. Lakin hər hansı bir partiya bizi tanımaq istəyərsə, buna qarşı da deyilik. Bunu onların xoş amalının göstəricisi və dostluğu kimi qəbul etməyə də hazırıq. Bu gün bütün partiyaların xalq tərəfindən tanınmasına ehtiyac var. Ona görə də amalımız, səyimiz və çabamız AXCP-ni xalqa yeni format və yeni simada təqdim etməkdir”. Cebhe.info xəbər verir ki, bunu AXCP sədri Razi Nurullayev bildirib. Partiya sdəri qeyd edib ki, buna xeyli dərəcədə nail olunub: “Hər zaman inanmışam və bu gün də inanıram ki, xalqın dəstəyi olan yerdə siyasilərin dəstəyinə ciddi ehtiyac yoxdur. Hər kəs gücün yanında yer almağa çalışır. Onun üçün də daha güclü olmaq üçün çalışırıq. Güclü olmaq üçün hədəflər də aydın və konkret olmalıdır. Bu gün bir nömrəli hədəflərimizə daxil olan məsələlər var. Birinci hədəf xalqın itirilmiş inamını qaytarmaq və onların siyasətə maraqlarını bərpa etməkdir. Çünki xalq yalan vədlərdən doyub və siyasətçilərə də öz maraqları üçün çalışan adamlar kimi baxır. Bunu yerinə yetirmək üçün insanlarla ayrı-ayrılıqda söhbətlər aparırıq. Daha güclü təmasımız isə fəaliyyət proqramımıza yeni elementlər daxil edildikdən sonra olacaq. Əminik ki, xalq bizi yeni və səmimi syasi qüvvə kimi qəbul edəcək. İkinci hədəf müxalifət üzərindən dedi-qodu, hər şeyi ağ və qara görən, üstü-başı cırıq, polis tərəfindən döyülən və söyülən, təhsilsiz, savadsız, qaragüruh və milli maraqlara xəyanət adının götürülməsidir. Bu fikir beyinlərə yeridilib və siyasi səhnədə isə hədəfsiz at oynadanlar bu təfəkkürün formalaşmasına yardımçı olublar. Üçüncü hədəf isə, sivil və kübar müxalifət kimi oturuşmaq və o dərəcədə güclənməkdir ki, hakimiyyət tələblərimizə rişxənd və istehza ilə yanaşmasın. Belə yanaşarsa, bunun siyasi bədəlinin ağır olacağını da göz önünə alsın. Rayon və kəndlərdə çox ciddi şəkildə təşkilatlanmaq bu işimizin əsas elementlərindən biri olacaq. Xalq normal və nəticə doğuran siyasət və siyasətçi görmək istəyir”. Əsas hədəflərdən birinin də 2018-ci il prezident seçkilərinə hazırlaşmaq olduğunu deyən Razi Nurullayev “Bu gündən sonra ölkədə baş verəcək proseslərdə biz də siyasi məsuliyyəti bölüşmək niyyətindəyik. Bura seçki saxtakarlığından tutmuş, haqsız məhkəmə qərarlarna qədər olan hər şey daxildir. 2018-ci ili Azərbaycanda seçki yolu ilə hakimiyyət dəyişikliyi ili elan edirik. Bəli, bizim ən yaxın son hədəfimiz 2018-ci ildə ölkədə siyasi hakimiyyəti dəyişmək, ciddi siyasi və iqtisadi islahatlar həyata keçirməkdir”,- deyə vurğulayıb.

Cebhe.info