Rabitə və Yüksək Texnologiyalar Nazirliyi kimi, Azərbaycan Respublikasının Prezidenti yanında QHT-lərə Dövlət Dəstəyi Şurası da, MTN-nin maliyyə poliqonuna çevrilib.
Şura yaradılarkən MTN-nin əməkdaşı Azər Rəhimov üçün orada xüsusi vəzifə açılmış və ona ayrıca otaq da ayrılmışdır. Şuranın sədri Azay Quliyevlə əlbir olan bu şəxs, hər bir qrant müsabiqəsində küllü miqdarda vəsaiti MTN rəhbərliyinə ötürüblər. Belə ki, onlar istənilən qrant müsabiqəsində özlərinə aid olan xeyli sayda təşkilatlara maliyyə ayırmış, yarısını özlərinə, yarısını isə cəmləşdirərək MTN rəhbərliyinə ötürüblər.
Rabitə Nazirliyində baş verən olaydan bərk təşvişə düşən Azay Quliyevin, hələ
bir həftə öncəki tarixlə MTN-nin polkovnik-leytenantı olan Azər Rəhimovu Şuradakı vəzifəsindən azad etməsi onu deməyə əsas verir ki, Şura MTN-nin poliqonuna çevrilibmiş.
Şuranın qrant vəsaiti ayırdığı təşkilatların adlarına və onların maliyyə aldıqları layihələrə diqqət yetirdikdə görünür ki, həmin layihələrin heç biri real icra olunmaq üçün deyil. Onlar çox asanlıqla sənədləşdirilib, pulların silinməsi mümkün olan işlərdir. Məsələn: Quba Kənd Təsərrüfatına Dəstək İctimai Birliyi, Gəncə şəhərində vətənpərvərlik təlimləri keçmək üçün Şuradan qrant alır. Əgər Azay Quliyev dediyi qədər şəffaflığı təmin edibsə, Qubada kənd təsərrüfatı ilə məşğul olan təşkilata Gəncədə vətənpərvlik təlimləri keçirməyə necə imkan verib?. Bir tərəfdən MTN-nin Şuranı öz maliyyə poliqonuna çevirməsi, digər tərəfdən isə Azay Quliyevin bütün bunlara göz yumaraq öz QHT imperiyasını yaratması, onu deməyə əsas verir ki, o, ölkədə QHT sektorunu çökdürmüşdür. Sadalayacaqlarımız faktları yoxlaya və özünüz qərar verə bilərsiniz ki, Azərbaycanda QHT sektoru Şuranın dəstəyi ilə məhvə doğru sürüklənir:
* 600-dən çox QHT-nı özündə birləşdirən Milli QHT Forumuna Azay Quliyevin bibisi oğlu Rauf Zeyninin rəhbərlik etməsi;
* 5 regional QHT Resurs Mərkəzlərinin (Şirvan, Qəbələ, Şəmkir, Quba və Mingəçevir) rəhbərlərinin, Azay Quliyev tərəfindən idarə olunması və onların vasitəsilə həmin regionda olan QHT-lərə ayrılan pulların toplanması;
* Xarici donorlardan ayrılan maliyyə vəsaitlərinin Şura vasitəsilə adları qeyd olunan Resurs Mərkəzlərinə yönəldilməsi (Kimoneks, Counterpart və SEDA);
* Şuranın əməkdaşlarının 70 faizinin Azay Quliyevin qohumlarından ibarət olması;
* Şuranın icraçı direktorunun Azay Quliyevin bacısının həyat yoldaşı, baş mühasibin isə baldızının həyat yoldaşı olması;
* Şuranın nəzdində fəaliyyət göstərən QHT nəşriyyatının direktorunun Azay Quliyevin qayınatası Ramil Süleymanovun olması;
* Şuradan qrant alan QHT-lərin bütün çap işlərinin məcburi şəkildə QHT nəşriyyatında çap etdirilməsi;
* Şuranın bütün texniki avadanlıqlarını satan və xidmətlər göstərən müxtəlif adlı şirkətlərin Azay Quliyevin dayısı oğlu İlham Bayramova məxsus olması;
* Şuranın QHT-lərə ayrılan 2,5 milyonluq qrant məbləğindən başqa, yerdə qalan 3-4 milyon vəsaitin Şuranın tədbirləri adı altında silinməsi;
* Şuradan qrant alan QHT rəhbərlərinin Azay Quliyevin Milli Məclisə keçirilən seçkilərindən məcburi şəkildə cəlb edilməsi və s.

Aqşin

“Gündəm Xəbər”