Komitə sədri öz işçilərini qurban verir

Qaçqınların və Məcburi Köçkünlərin İşləri üzrə Dövlət Komitəsinin sədri, baş nazirin müavini Əli Həsənov yaxın gələcəkdə yerlərdəki qaçqınkomları vəzifədən uzaqlaşdırmağı planlaşdırır. Bu barədə redaksiyamızı etibarlı mənbə məlumatlandırıb. Mənbənin sözlərinə görə, uzun müddətdir ki, eyni dəsti-xətlə dövlət əmlakını talamaqda məşğul olan komitə rəhbərliyi ölkə başçısının qurban tələb etdiyi indiki dönəmdə öz işçilərinin bir qismini tutduqları vəzifədən uzaqlaşdırmaq niyyətindədir.

“Qaçqınkom”da hazırlıq əməliyyatı

Mənbənin fikrincə, yerlərdəki qaçqınkomların yeniləri ilə əvəzlənməsi dövlət komitəsinin ölkə başçısının tələb və töviyyələrinə ciddi şəkildə əməl etməsi kimi təqdim edilə bilər: “Prezident İlham Əliyevin regionların sosial-iqtisadi inkişafının dördüncü ildönümə həsr edilən konfransdakı çıxışı bir çox nazirliklər kimi Qaçqınkomu da sünu surətdə hərəkətə keçirib. Qaçqınkom sədri Ə.Həsənov hesab edir ki, indiki dönəmdə komitə daxilində bəzi dəyişikliklər etməklə baş verənlərə həm islahat donu geyindirə, həm də digər maraqlarını təmin edə bilər. Məhz buna görə də Ə.Həsənov yaxın günlərdə bir çox şəhər və rayonlardakı qaçqınkom rəhbərlərini dəyişdirmək niyyətindədir. Artıq bu istiqamətdə müəyyən hazırlıq işləri görülür ki, bu da daha zəif himayədarlara məxsus qaçqınkom nümayəndələrinin müəyyənləşdirilməsi ilə bağlıdır. Siyahı tam yekunlaşadan sonra “vurulacaq” kadrların “işində yol verdiyi ciddi nöqsanlara görə” vəzifədən uzaqlaşdırıldığı elan ediləcək, komitə sədri Ə.Həsənov isə məmur qanunsuzluğuna qarşı mübarizənin bundan sonra da qətiyyətlə aparılacağını elan edəcəkdir. Bununla da komitə sədri sübut edəcəkdir ki, o, ölkə başçısının məmur qanunsuzluğuna qarşı mübarizə çağırışına ilk səs verənlərdən biridir və bunu əməli olaraq isbatlayır”.

Təmizlik planı gəlir mənbəyi kimi

Məlumatlı qaynağın söylədiyinə görə, əslində təmizlik kampaniyasının reallaşmasında digər məqsədlərdən biri də dəyişikliklərdən həm də maddi baxımdan faydalanmaqdan ibarətdir: “Komitə rəhbərliyi yaxşı bilir ki, yerlərdəki qaçqınkomların dəyişdirilməsi onların yeni kadrlarla əvəzlənməsi zərurətini ortaya çıxardacaq ki, bu da külli miqdarda pul deməkdir. Çünki bu gün rayon və şəhərlərdəki qaçqınkomların daxilində rəhbərlikdə təmsil olunmağa can atan kifayət qədər çox insan var ki, onlar bu vəzifəyə keçmək üçün maddi baxımdan hər cür fədakarlığa hazırdırlar. Yerlərdəki qaçqınkomların məhz bu insanlar tərəfindən əvəzlənməsi gözlənilir ki, belə bir dəyişiklik praktiki baxımdan istənilən an reallaşa bilər”.
Mənbənin sözlərinə görə, rəhbərliklə yanaşı yerlərdəki sıravi nümayəndələrin də dəyişdirilməsi planlaşdırılır: “Rəhbərliyin yol verdiyi qanunsuzluqlar fonunda onlarla yanaşı köhnə işçilərin də işdən azad edilməsi məsələsi gündəmdədir. Qaçqınkom rəhbərliyi hesab edir ki, yerlərdəki rəhbər şəxslərlə birlikdə onların işçilərinin də işdən uzaqlaşdırılması korrupsiya və məmur özbaşınalığına qarşı mübarizənin miqyasını artırmaqla yanaşı, əldə edilməsi planlaşdırılan gəlirlərin miqdarına da ciddi şəkildə təsir göstər bilər”.

Yerlərdəki qaçqınkom yetklililəri narahatdır

Məlum hazırlığın yerlərdəki qaçqınkom yetkililərinə də sızdığını bildirən özəl mənbə, bu xəbərin “aşağılarda” ciddi narahatlığa səbəb olduğunu bildirib. Mənbənin məlumatına görə, qaçqınkom yetkililərini narahat edən əsas məsələ sadəcə işdən uzaqlaşdırılmaları deyil. Onların fikrincə, işdən bu şəkildə azad edilmələri onların gələcək fəaliyyətini də əngəlləyə bilər: “Yerlərdəki qaçqınkom yetkililəri haqlı olaraq hesab edir ki, əgər onlar indiki vəzifələrindən məhz səriştəsiz məmur damğası ilə qovulsalar, o zaman işlə təminatları ilə bağlı ciddi problemlərlə üz-üzə qalacaqlar. Çünki hara getsələr o zaman işdən səriştəsizliklərinə və ya rüşvətxorluqlarına görə qovulduqlarını əsas gətirib onlarla əməkdaşlıqdan imtina edəcəklər. Bu səbəbdən də qaçqınkom təmsilçiləri hesab edir ki, indiki şəraitdə Ə.Həsənovun edə biləcəyi ən böyük yaxşılıq onları sakit bir şəkildə, əlavə hər hansı bir damğa vurmadan işdən azad etməsi ola bilər. Hətta bəzi yetkililər işdən bu şəkildə azad olunmaları üçün lazımi qədər “hörmət etməyə” də hazır olduqları da istisna edilmir. Lakin görünən odur ki, onların bu gözləntisi özünü doğrultmayacaq. Ən azından ona görə ki, kampaniyaın sakit və səs-küysüz şəraitdə aparılmasının özü Ə.Həsənovun arzu və məqsədlərinə ziddir. Ə.Həsənov hesab edir ki, bu kampaniya nə qədər səs-küylü keçirilsə bu, onun mövqeyini siyasi rəhbərlik qarşısında bir o qədər möhkəmləndirəcək. Odur ki, Ə.Həsənovdan mərhəmət gözləyənlərin bütün hallarda məyus olacağı şübhəsizdir”.

İlqar Rəsulov