Jurnalistləri Müdafiə Komitəsinin direktoru İlham Əliyevə yazdığı məktubda
seçki ilini xatırladaraq mətbuata hücumlara son qoymağı tələb etdi

Təkcə “Gündəm xəbər” qəzeti 1 ildə məmurlar tərəfindən terrora məruz qalıb, dəfələrlə qəzeti bağlamaq cəhdləri olub
Mərkəzi ofisi ABŞ-da yerləşən beynəlxalq Jurnalistləri Müdafiə Komitəsi təşkilatının direktoru Coel Saymon Azərbaycan prezidenti İlham Əliyevə açıq məktub yazıb. Məktubda deyilir ki, Jurnalistləri Müdafiə Komitəsi Azərbaycanda mətbuat azadlığının vəziyyətinin pisləşməsini diqqətinizə çatdırır və bildirir ki, bu, sizin ölkə hökumətinin mətbuat azadlığı və insan hüquqları üzrə öhdəliklərini pozur, ölkənin beynəlxalq imicinə zərbə vurur, sizin yenidən seçilməyi planlaşdırdığınız qarşıdakı prezident seçkilərinin şəffaflığına əngəl törədir.
Biz sizi bu tendensiyanı dəyişməyə və mətbuata sərbəst, azadlıqdan məhrum edilməkdən, hücumlardan və ya məhkəmə iddialarından qorxmadan yazmağa imkan verməyə çağırırıq. Bununla belə, JMK bunun əksini hesab edir: sizin ölkədə mətbuat azadlığı ab-havası sizin və məmurlarınızın təsvir etdiklərindən çox pisdir. Əvvəlkitək hökumət onu tənqid edən jurnalistləri həbs edir, prokurorlar jurnalistlərə hücumları araşdırmır, məhkəmələr böhtan ittihamı ilə müstəqil KİV-i cərimə edir. Qanunvericilər yerli QHT-lərin beynəlxalq maliyyələşdirilməsini məhdudlaşdırmağa cəhd göstərir və İnternetdə söz azadlığının qarşısını almaq istəyirlər.
Araşdırmalarımız göstərir ki, bu repressiyalar bir il əvvəl – Bakının iki böyük beynəlxalq tədbiri - "Eurovision" mahnı müsabiqəsini və İnternet İdarəçiliyi üzrə Forumu keçirdiyi vaxtdan artıb.
Beynəlxalq təzyiqlərə baxmayaraq, Azərbaycan hakimiyyəti hökumətdəki korrupsiya və insan hüquqlarının pozulması ilə bağlı məlumat verən jurnalistləri həbsə almaqda davam edir.
Redaktorlar da daxil olmaqla, 9 jurnalist həbsdə saxlanılır: Əvəz Zeynallı, Hilal Məmmədov, Araz Quliyev Nicat Əliyev, həmçinin Vüqar Qonaqov, Zaur Quliyev. Bundan başqa jurnalistlər Fuad Hüseynov, Fərəməz Novruzoğlu (Allahverdiyev) və Tofiq Yaqublu həbsdədir. Onların əksəriyyəti siyasiləşdirilmiş ittihamlar – narkotik maddə saxlanması, xuliqanlıq, pul tələb etmə və vətənə xəyanət üzrə həbs olunub. 2012-ci il dekabrın 1-nə olan məlumata görə, Azərbaycan həbs olunmuş jurnalistlərin sayına görə ikincidir”.
Cənab Saymonun Əliyevə məktubunda qeyd olunan məqamlar biz jurnalistlər üçün yeni deyil. Çünki yerli mətbuat və azad söz sahibləri hökumətin mətbuata basqısını öz üzərində hiss edir. Saymonun məktubu isə təsadüfi deyil. Hazırda “Gündəm-xəbər”, “Yeni Müsavat” və “Azadlıq” qəzetlərinə qarşı iri ranqlı nazirlərin, məmur-oliqarxların hücumları daha da kəskinləşib. Qəpik-quruşla dolanan qəzetçilər milyonlara sahiblənmiş korrupsioner məmurlar tərəfindən məhkəmə yolu ilə cərimələnir, iqtisadi sanksiyalar tətbiq edilir və tənqidçi qəzetlər çökdürülür.
Elə “Gündəm xəbər” qəzetini götürsək son dövrlər hakimiyyət nümayəndələrinin dəfələrlə bu qəzeti bağlatdırmaq cəhdləri olub. Onlar qəzetin təsisçisi Şirin Cəfəriyə və qəzetə qarşı çirkin kampaniya aparır, həbsinə nail olmaq istəyirlər. Və iqtidar elə bilir ki, mətbəxdə baş verənlər kənara çıxmayacaq. Budur Saymonun acı və sərt məktubu göz qabağındadır və ABŞ-da ofisi yerləşən bir təşkilat tərəfindən seçki ilində Əliyevə çağırış olunur.
Bəli, birbaşa çağırış. Saymonun məktubda “Eurovision” və İnternet Forumlarını xatırlatması dəqiq riyazi hesablanmış bir addımdır və bu tədbirləri yada salmaqla hakimiyyəti biabır etmiş olur. Saymonun Mətbuat Şurasına yönəlik çağırışı da ibrətamizdir. Məhz MŞ-nin şikayətləri əsasında Korrupsiyaya Qarşı Mübarizə İdarəsi Ş.Cəfəri barəsində cinayət işi açıb.
MŞ-nin işi isə “reketlik” edib qəzetləri məhkəməyə vermək olmamalıdır. MŞ-nin vəzifəsi mətbuatın inkişafına töhfə vermək, qəzetləri yırtıcı məmurlardan qorumaq, jurnalistlərin qayğısına qalmaqdır. Ancaq deyəsən yanılmışıq. MŞ məmurlara qahmar çıxıb onların “haq”larını müdafiə edir. Bunun axırı isə heç də müsbət gələcək vəd etmir. Ən azı Saymonun məktubuna diqqət yetirmək lazımdır...

A.Ağasoy