Son vaxtlar Nəqliyyat naziri Ziya Məmmədovun "vurulacağı", indiyədək yığdığı əmlakın isə əlindən alınacağı barədə yayılan xəbərlər səngimək bilmir. Qeyd edək ki, Nəqliyyat naziri bir müddət ortada görünmürdü. Onun uzunmüddətli əmək məzuniyyətinə çıxdığı açıqlandı. Bir çoxları onun elə məzuniyyətdə olduğu vaxtda tutduğu vəzifədən uzaqlaşdırılacağını iddia edirdilər. Lakin nazir ötən ilin payızında məzuniyyətini başa vurub işə çıxdı. Hələ üstəlik, Neftçalada vətəndaşlarla keçirdiyi qəbul zamanı jurnalistlərlə zarafat da etdi. Özündən razı davranışları ilə seçilən Ziya Məmmədov bununla ictimaiyyətə haqqında yayılan söz-söhbətlərin yalan olduğunu göstərməyə çalışdı. Amma reallıq tamamilə başqadır. Belə ki, nazir özünü "vurulmamış" kimi göstərməyə çalışsa da, əslində son dövrlər o ki var sıxışdırılıb. Məsələn, Nəqliyyat Nazirliyinin əsas səlahiyyətləri əlindən alınaraq digər aidiyyəti dövlət qurumlarına verilib. Bundan başqa, hüquq-mühafizə orqanlarının əməkdaşları bir müddət əvvəl nazirin qardaşı oğlu

Aynar Məmmədova məxsus "Nar" kafesində xüsusi əməliyyat keçirdilər. Əməliyyat tədbirləri nəticəsində kafedə qumar oynayan bir neçə şəxs saxlanıldı. Nazirə vurulan ən böyük zərbələrdən biri də qardaşı Elton Məmmədovun mandatsız qalması oldu. Bütün bunlar onu göstərir ki, jurnalistlərlə zarafat edən nazirin gələcək karyerası əslində ciddi təhlükə altındadır. Hamıya bəllidir ki, bu məmur böyük imkanlardan, səlahiyyətlərdən məhrum edilib.

Bundan başqa Nəqliyyat naziri Ziya Məmmədovun qardaşı İldırım Məmmədov işdən çıxarıldı.

İldırım Məmmədov Ucar regional dəmir yolu yanacaq təchizatı idarəsinin rəisi işləyirdi. O, bu il yanvarın 13-də “Azərbaycan Dəmir Yolları” Səhmdar Cəmiyyətinin rəhbəri Cavid Qurbanovun əmri ilə tutduğu vəzifədən azad edildi.

Yeri gəlmişkən, hazırda nazir uzun müddət bir yerdə çalışdıqları Cavid Qurbanovun hədəfinə çevrilib. Yuxarıda dediyimiz fakt - İldırım Məmmədov işdən

çıxarılması buna sübutdur. Ancaq başqa faktlar da var. Bu barədə bir qədər sonra.

Hələliksə Cavid Qurbanovun Ziya Məmmədovu tədricən necə gölgədə qoymasından danışacağıq. Vaxtilə Ziya Məmmədovun necə deyərlər, qılıncının dalı və qabağının kəsdiyi vaxtlarda Cavid Qurbanov onun qanadının altında idi. Hazırda isə Ziya Məmmədov Cavid Qurbanovun gölgəsində itməkdədir.

Hər şey ondan başladı ki, prezident İlham Əliyevin sərəncamı ilə “Azərbaycan Dəmir Yolları” Qapalı Səhmdar Cəmiyyəti Nəqliyyat Nazirliyinin tabeçiliyindən çıxarıldı. Bununla da Ziya Məmmədovun çöküşü fonunda Cavid Qurbanov parlamağa başladı.

Həmin sərəncamdan dərhal sonra “Azərbaycan Dəmir Yolları” QSC-nin rəhbəri Cavid Qurbanov mətbuata müsahibə verdi və açıq şəkildə olmasa da nazirini

tənqid etməyə başladı. Sərəncam barədə danışan Cavid Qurbanov o zaman demişdi: “Bu, cənab prezidentin qərarıdır. Yəqin belə məsləhət görüb. Mənim təklif etməyimə gərək yoxdur. Bu işlər cənab prezidentin müstəsna hüquqlarına daxildir. Bu dəyişiklik dəmir yol təsərrüfatının işində yəqin ki, müsbət dönüş yaradacaq. Biz də çalışmalıyıq müsbət dəyişiklər olsun. Bu, idarəetmənin təkmilləşməsidir.

Prezident bizə bu sahəni tapşırıbsa, nazirlik olmadan da o tapşırığı can-başla yerinə yetirib dövlət başçısının etimadını doğrultmaq lazımdır.

Məsələ ondadır ki, dəmir yolu özü pul qazanmalıdır. Sadəcə hazırda dünyada daşımaçılıqdan əldə olunan gəlirlər azalıb. Hardasa 30-40 faizə qədər enib gəlirlər. Amma bu sahənin yeniləşməsi lazımdır. Çalışmaq lazımdır ki, beynəlxalq yüklərin daşınmasında biz də iştirak edək. İpək yolu işə düşsün, Bakı-Tbilisi-Qars dəmir yolu tezliklə açılsın. Bu sahədə işlər artıq yekunlaşmaq üzrədir. Şimal-cənub marşrutunun inkişafı ilə məşğul olmaq lazımdır. Yəqin ki, möhtərəm cənab prezident bunları nəzərə alıb və bu

cür qərar qəbul edib. Hər halda mən belə başa düşürəm”.

Cavid Qurbanov sərnişindaşımada keyfiyyət dəyişikliyi, vaqon parkının yenilənməsindən, xidmətin artırılmasından tutmuş, qatar bələdçilərinin sərnişinlərlə davranışına qədər çox ciddi məsələlərdən də danışmışdı: “Bunlar çox ciddi məsələlərdir. Bilirsiniz, bu sadalananları mütləq etmək lazımdır. Mən buna təkcə bu struktura rəhbərlik edən məmur kimi yanaşmıram, həm də bir vətəndaş kimi yanaşıram. Nəinki sərnişindaşımada, bütövlükdə dəmir yolu sistemində köklü dəyişikliklər olmalıdır. Sürət artmalıdır, rahatçılıq, komfort olmalıdır, vaqonların keyfiyyəti yüksəldilməlidir, bələdçi heyətinin xidmətində, davranışında müsbət dönüşə nail olunmalıdır.

Bələdçilərin mədəni səviyyələrinin artırımaq üçün onlara kurslar keçiriləcək. Bələdçilərə sərnişinlə mədəni davranışın yolları öyrədiləcək. Biz müəyyən kriteriyalara uyğun gəlməyən, kobud, mədəni səviyyəsi aşağı olan bələdçilərlə vidalaşmalı olacağıq.

Bələdçilər sərnişinlərlə bəzən 8-10 saat təmasda olurlar. Biz elə etməliyik ki, sərnişin bu uzun müddətlik yolçuluqda xidmətdən razı qalsın. Bunun üçün də ciddi işləməli, ölkə başçısının etimadını tam doğrultmalıyıq.

Bunlara təkcə inzibati üsullarla nail olmaq doğru yanaşma deyil. İlk növbədə buna vətəndaş mövqeyindən, dövlətçilik prinsipindən yanaşmalıyıq. Dəmiryolçu siyasətlə məşğul olmamalıdır. Dəmiryolçu texniki məsələlərlə məşğul olmalıdır. Bu sahədə keyfiyyətin yüksəldilməsinə çalışmalıdır. İnşallah, elə edəcəyik bu işlər yoluna düşsün. Yəqin ki, tezliklə bu müsbət dəyişiklikləri görəcəksiz.

Mən istəyirəm ki, bütün yaxşı arzularımız həyata keçsin. Dövlətimizə, onun rəhbərinə və millətimizə xidmət edə bilək. Sizə söz verirəm, nə qədər ki, canımda can var, çalışacam, dəmir yolunda hər şey yüksək səviyyədə olsun”.

Cavid Qurbanov hələ o zaman yaxın vaxtlarda nəqliyyat naziri təyin ediləcəyi barədə fikirlərə də münasibət bildirmişdi: “Bilirsiniz, bəzən vəzifəyə

başqa cür yanaşılır. Əslində vəzifə çox ciddi məsuliyyətdir. Bunlar ara sözləridir. Xahiş edirəm, belə şeylərə fikir verməyin. Vəzifəyə təyin edən, vəzifədən çıxaran ölkə başçısıdır. Bu işlər onun müstəsna səlahiyyətidir. Qərarları cənab prezident verir. Bilmirəm qəzetdə kim nə yazır, vallah mənim bu işlərdən xəbərim yoxdu. İnanın səmimiyyətimə, heç o haqda fikirləşmirəm. Dövlətin başçısı mənə kifayət qədər ciddi iş tapşırıb, üzərimə məsuliyyət qoyub. Mən bu an o işləri yüksək səviyyədə görüb, ortaya ciddi nəticələr qoymaq haqda düşünürəm”.

“Mətbuat son sərəncamı Ziya Məmmədovun vurulması kimi təqdim edir. Bu, hazırkı nəqliyyat nazirinin səlahiyyətlərinin əlindən alınması, onun siyasi baxımdan gözdən düşməsi kimi yozulur” sualına isə o, belə cavab vermişdi:

“Doğru yanaşma deyil. Nazirlik təsərrüfat işi ilə yox, dövlət siyasəti ilə məşğul olmalıdır. Dəmir yolu da təsərrüfat qurumudur. Yəqin cənab prezident də fikirləşir ki, təsərrüfatla təsərrüfat qurumları məşğul

olsun. Nazirlik də dövlət siyasətində iştirak etsin, konsepsiyasını hazırlayıb təqdim etsin. Yolçu getsin yolunu tiksin, dəmiryolçu öz işini görsün, dənizçi dənizçiliyini etsin”.

Beləliklə, Cavid Qurbanov ciddi-cəhdlə Ziya Məmmədovla konfliktə olmadığını sübut etməyə çalışırdı. Ancaq çox keçmədi ki, o, Ziya Məmmədovun karlarını və yaxın adamlarını sıxışdırmağa, vəzifədən çıxarmağa başladı.

Ziya Məmmədovun qardaşını işdın çıxarandan sonar Cavid Qurbanov onun yeznəsini yoxlatdırdı.

Belə ki, bir müddət öncə Şirvanda baş vermiş intihar hadisəsinə dair sensasion detallar məlum oldu.

Məlumata görə, "Azərbaycan Dəmir Yolları” QSC-nin yerli idarəsinin baş mühasibinin intiharına səbəb QSC-nin rəhbəri Cavid Qurbanovun xüsusi göstərişi ilə aparılan yoxlama və üzə çıxan külli miqdarda yeyinti, korrupsiya faktları olub.

Üstəlik məlum olub ki, həmin idarənin rəisi nəqliyyat naziri Ziya Məmmədovun ailə üzvlərindən biridir.

İnformasiya agentliklərinin xəbərlərində deyilirdi ki, iyulun 18-də günorta saatlarında Şirvan şəhəri, Natəvan küçəsi, 61 ünvanında yaşayan 1968-ci il təvəllüdlü Kərimov Rəmzi Elxan oğlu özünü həyətində yerləşən üzüm çardağından asaraq intihar edib.

İntihar edən şəxs "Azərbaycan Dəmir Yolları” QSC-nin Şirvan dəmiryol idarəsinin baş mühasibi olub. İntiharın mümkün səbəblərinin araşdırıldığı göstərilirdi.

Özəl mənbələrdən bildirildiyinə görə, Yanacaq və Sürtkü Materialları Təchizatı İdarəsində Cavid Qurbanovun göstərişi ilə yoxlama aparılıb. Yoxlama nəticəsində ciddi qanun pozuntuları, xüsusilə iri məbləğdə dizel yanacağının mənimsənilməsi aşkar edilib. Həmin yanacaq "Azərbaycan Dəmir Yolları”

QSC-yə dövlət qiymətindən aşağı qiymətə ayrılmışdı və dəmir yolu ilə daşınaraq topdansatış bazalarında satılırdı.

Məlum oldu ki, idarənin rəisi Ziya Məmmədovun bacısının əri Adil Məhərrəmovdur. Bundan əlavə idarədə nazirin xeyli yaxın və uzaq qohumları da işləyir.

Son günlər isə Cavid Qurmanov Ziya Məmmədova daha tez-tez hücum etməyə başlayıb.

“Bu vəzifəyə təyin olunandan sonra gördüm ki, texniki heyəti, kadr potensialı bərbad vəziyyətdədir. Ona görə də mövcud vəziyyətlə bağlı ölkə başçısına, baş nazirə məruzə etdim”.

Bunu iki gün öncə “Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanov deyib. Bu vəzifəyə təyin olunduğu 1 il müddətində gördüyü işlərdən danışan C. Qurbanov biz sıra tənqidlər də səsləndirib: “Bu ağır və böyük struktura dəmiryolu rəhbərliyi, onun işçiləri tərəfindən lazımi diqqət göstərilməyib. Bunların hamısı o vəziyyətə gətirib çıxarıb ki, biz bu formada davam etsəydik, 2020-2022-ci illərə qədər dəmiryolu parkında vaxtı keçməmiş, istismara yararlı olan vaqon və lokomotiv parkından çox cüzi miqdarda qalardı. İndiki parkın təxminən 5 faizi qalacaqdı. Ölkə prezidenti tərəfindən 4 il budan öncə inkişaf proqramı təsdiqlənib. Onun punktları var, tapşırıqlar verilib. Amma mövcud durum göstərirdi ki, bu tapşırıqların icra olunması gecikib. Yoxlamalar göstərirdi ki, layihələr illərlə gecikdirilib və yerinə yetirilməyib. Baxmayaraq ki, dövlət başçısı pul ayırıb, tapşırıqlar verib”.

Cavid Qurbanov bir vaxtlar rəhbərlik etdiyi “Azəryolservis”in tabe olduğu Nəqliyyat Nazirliyi haqda da sərt fikirlər səsləndirib: “Nazirliklər əsasən dövlətin onlara tapşırdığı siyasətlə məşğul olmalıdır. Tutaq ki, Nəqliyyat Nazirliyi ölkənin nəqliyyat siyasəti ilə məşğul olmalıdır. Amma çox vaxt bizim

nazirliklər və məmurlarımız öz sahəsi üzrə olan siyasətlə təsərrüfat fəaliyyətini qarışdırırlar. Hesab edirəm ki, ümumiyyətlə, nazirliklər daha çox dövlətin o sahə üzrə siyasətini yerinə yetirməlidir. Subyektlər konkret olaraq təsərrüfat fəaliyyətini yerinə yetirir. Bu da daha çox kömək əvəzinə idarəetmədə tıxac əmələ gətirir. Ona görə də belə qərar qəbul olundu ki, iqtisadiyyatın böhranlı günlərində daha çox operativliyi, çevikliyi təmin etmək, cəld qərarlar qəbul etmək üçün təsərrüfat subyektlərinə sərbəstlik verilsin. Bu, zərurətdən əmələ gəldi. Özü də bu, təkcə bizdə həyata keçirilmir. Qonşu Gürcüstanda, Rusiyada, Qazaxıstanda belədir”.

Samir

gundemxeber.az