Son günlərin ən qalmaqallı məmurlarından biri də Nizami rayon icra hakimiyyətinin başçısı Arif Qasımovdur.

Savash.org xatırladır ki, Nizami İcra Hakimiyyətinin rəsmi internet səhifəsində onun maraqlı fotosu yerləşdirilib və bu məsələ mətbuatın böyük marağına səbəb olub.

Belə ki, İcra Hakimiyyətinin rəsmi internet səhifələrində "İH-nın Başçısı" bölməsində başçı haqqında yerləşdirilmiş məlumatda maraqlı hal müşahidə olunub. İH başçısının kabinetində oturduğu kreslonun böyüklüyü və əzəməti istər-istəməz gözə çarpır.

Ötən il, Rusiya saytlarının dövlət başçılarınınn iş otaqları haqda yaydığı xəbərdə Azərbaycan prezidenti İlham Əliyevin kabineti də daxil bir çox ölkə rəhbərlərinin kabinetlərinin fotosuna yer verilmişdi. Lakin heç bir prezidentin, baş nazirin kreslosu Arif Qasımovun kreslosundan daha əzəmətli deyildi...

Məsələ ictimailəşdikdən və böyük səs-küyə səbəb olduqdan sonra isə icra başçısı sözügedən dəbdəbəli kreslosundan imtina etmək qərarına gəlib. Savash.org-un əldə etdiyi məlumata görə, icra başçısı başının bəlasına çevrilmiş və onu dil-ağıza salmış kreslonu bağ evinə yola salıb. Əvəzində isə özünə çox yaxın hesab etdiyi, bir sıra qara işlərini görən iş adamlarından birinə “mənə yeni kreslo al, bu mənə düşmədi” göstərişini verib.

Qeyd edək ki, bundan öncə isə Nizami Rayon İcra Hakimiyyətinin rəsmi saytından Arif Qasımovun həmin kresloda çəkdirdiyi qalmaqallı foto yığışdırılıb.

Hazırda isə icra başçısının iş ortaqlarından sayılan həmin sahibkarla bağlı jurnalist araşdırması aparırıq və yaxın zamanlarda onun həm adını, həm də Arif Qasımovla şərikli həyata keçirdiyi qaranlıq layihələri diqqətinizə təqdim edəcəyik.

Sonda xatırladaq ki, Nizami rayonunun icra başçısı Arif Qasımovun geniş şəbəkəsi var. 2011-ci ildə Siyəzənin icra başçısı təyin olunan Arif Qasımov özü üçün rayonda bir neçə nəhəng ferma inşa etdirib. Bu fermaları saхlamaq üçün təbii ki, əkin və otlaq sahələrinə ehtiyac var. Arif Qasımov bu ehtiyacı ödəmək üçün fermerlərə uzun müddətə icarəyə verilmiş bələdiyyə torpaqlarını zəbt edib. Həmin ərazilər indi icra başçısının fermalarına хidmət edir.Bundan başqa araşdırmalarımz zamanı onu da öyrəndik ki, Arif Qasımovun Siyəzəndə bir neçə üzlük daş sexləri də fəaliyyət göstərir.

Həmin seхlər rayonda görülən bütün təmir-tikinti işlərini tikinti materialları ilə təmin edirdi və çox yəqin ki bu proses Nizami rayonunda davam etdiriləcək. Amma Arif Qasımovun biznesi Siyazənlə mədudlaşmır. Məlumatlı mənbələrin sözlərinə görə, onun əvvəllər bələdiyyə sədri işlədiyi, indi isə icra başçısı kimi təyinat aldığı Nizami rayonunda, eləcə də Binəqədi rayonunun Biləcəri qəsəbəsində bir neçə ticarət obyekti fəaliyyət göstərir. Həmçinin icra başçısının Bakının müхtəlif yerlərinə tikinti işləri apardığı bildirilir. Paytхatda özünün və yaхınlarının adına onlarla mənzilinin, dəyəri milyonlarla manatla ölçülən bir neçə villasının olduğu da deyilir.

Mövzuya qayıdacağıq.
Nihat