Dövlət ehtiyacları adı altında böyük biznes layihəsi: "Qış Bulvarı" salınmaq adı ilə vətəndaşarın zorla çıxarıldığı ərazidə, komitə sədri milyardlarla manat dəyəri olan kommersiya obyektləri tikəcək

Son illər Azərbaycanda insanların mülkiyyət hüququnun pozulması, evlərindən, torpaqlarından zorla çıxarıldılması adi hal alıb. Oliqarxların maraqlarının müdafiəsində dayanan hökumət əhalinin şikayətlərinin, məhkəmələrdə öz hüquqlarını bərpa etməsinin qarşısını almaq üçün bu prosesi «qanuniləşdirməyi də» unutmayıb. Parlamentdə «Torpaqların dövlət ehtiyacları üçün alınması haqqında" Qanunun qəbul edilməsində də əsas məqsədin məhz vətəndaşları torpaqlarından, evlərindən daha asan çıxarmaqdı. Elə Heydər Əliyev sarayının arxasında yaşayan insanları evlərindən çıxarmaq üçün də bu qanundan istifadə olundu. Ərazidə «Qış bulvarı»nın salınacağı bildirilərək, vətədaşları razı oldu-olmadı istədikləri kompensasiyanı verərək mülklərindən çıxardılar. İndi isə məlum olur ki, ərazidə «Qış bulvarı» salınmayacaq. Azından “Qış bulvarı” adlı məkanda palma ağaclarının əkilməsi normal məntiqlə bir araya sığmır. Əhali evlərindən «dövlət burada «Qış bulvarı» salacaq» deyə çıxarılsa da, indi park və obyektlər tikiləcəyi ortadadır.
Etibarlı mənbənin məlumatına əsasən, ərazidəki bütün işlərə Əmlak Məsələləri Dövlət Komitəsinin sədri Kərəm Həsənovun rəhbərlik edib, Bakı Şəhər İcra Hakimiyyətinin başçısı yalnız görünən tərəf olub. Mənbənin sözlərinə görə, bu ərazi artıq 3 ilə yaxındır qeyri-rəsmi olaraq K.Həsənovun ixtiyarına verilib: «Kompensassiyaların məbləğini müəyyən edən də o oldu, ərazidəki söküntü işlərini aparan da. Hacıbala Abutalıbov deyə bilmir, ancaq ərazidə aparılan işlərə nəzarət Kərəm Həsənov tərəfindən həyata keçirilib.»
Mənbə buradakı işlərin K.Həsənova həvalə edilməsinin tarixçəsilə bağlı da maraqlı məlumatlar verdi. Onun sözlərinə görə, burdakı işləri aparmaq əvvəlcə Dövlət Reyestr Xidmətinin keçmiş rəhbəri Arif Qaraşova təklif edilib. Belə ki, Arif Qaraşovdan söküntü işlərini həyata keçirmək, vətəndaşlara müəyyən olunmuş qiymətlər çərçivəsində kompesasiya vermək, bundan sonra ərazinin bir hissəsində ticarət mərkəzi, otel, restoran və digər obyektlər tikməklə satmaq (və ya icarəyə vermək), bir hissəsini isə park salmaq istənilib. «Ancaq Qaraşov bu işləri aparmaq üçün lazımı miqdarda vəsaitinin olmadığını bildirərək imtina edib. Əvəzində Kərəm Həsənov Dövlət Reyestr Xidməti onun sərəncamına verilərsə, elə ordan əldə etdiyi vəsaitlə burdakı bütün işləri maliyyələşdirməyin mümkünlüyünü bildirib» deyə mənbə qeyd edir.
Mənbə bundan bir müddət sonra Dövlət Əmlakının İdarə Edilməsi üzrə Dövlət Komitəsi və Daşınmaz Əmlakın Dövlət Reysteri Xidməti ləğv edilərək onların bazasında Əmlak Məsələləri Dövlət Komitəsi yaradılmasını və Kərəm Həsənovun bura rəhbər təyin olunmasını onun təklifinə müsbət cavab verilməsilə bağlayır. Mənbə bunun üçün büdcədən ayrılan vəsaitin istiqamətini müəyyənləşdirməkdə çətinlik çəkir: «Ya bunun üçün nəzərdə tutulan vəsait faktiki olaraq ixtisar edilib, ya da «ümumi katyola» yönəldilib».
Qeyd edək ki, ərazidəki işlərin Kərəm Həsənova tapşırıldığını başqa faktlar da təsdiqləyir. Belə ki, ərazidə söküntü işlərinin başında Əmlak Məsələləri Dövlət Komitəsinin nümayəndələri dayanırdı. Məsələn, Sülh və Demokratiya İnstitutunun direktoru Leyla Yunusun ərazidəki şəxsi mənzili və ofisinin dağıdılmasına Əmlak Məsələləri Dövlət Komitəsinin nümayəndəsi Yusif Qəmbərov şəxsən rəhbərlik edirdi. Hətta ona mənzillərin sökülməməsinə dair məhkəmə qətnaməsinin olduğunu xatırlatdıqda, Yusif Qəmbərova jurnalistə «Tüpürüm məhkəmənin qərarına. Biz Azərbaycanda yaşayırıq» deyə cavab vermişdi.
Təbii ki, Yusif Qəmbərov özbaşına blə ifadə işlədə bilməzdi. Arxasında dayanan olmasa idi.
Və yaxud başqa bir fakt, ərazidən köçürülən insanlara «AZİNKO Holding»in tikdiyi binalarda mənzil verilir. Bunu Hacıbala Abutalıbov da qismən etiraf edib. Düzdür o, bunun insanların öz seçimi olduğunu bildirmişdi. Ancaq daxil olan məlumatlar göstərir ki, kompensasiya az olduğu üçün imtina edən vətəndaşlara yalnız «AZİNKO Holding»in evləri təklif olunur. «AZİNKO Holding»in isə Kərəm Həsənovun nəzarətində olduğu hər kəsə məlumdur. Hər halda holdinqin başında qardaşı durur.
Mənbənin digər məlumatına görə, ərazidə «Qış bulvarı"nın salınacağı ilə bağlı məlumatlar vətəndaşların evləri üçün böyük kompensasiyalar istəməməsi üçün düşünülübmüş. Əslində isə burda "Qış bulvarı"nın tikilməsi əvvəlcədən nəzərdə tutulmayıb. Burda park salınsa da, ərazidə iri ticarət mərkəzi, otel, restoran və pullu dayanacağın tikilməsi planlaşdırılır. Yəni, ərazi dövlət ehtiyacları üçün deyil, əsasən kommersiya məqsədilə istifadə ediləcək. Ərazinin sahəsi 7,5 hektardır burada kifayət qədər çoxlu sayda iri ticarət mərkəzlərin, otelllərin, restoranların və digər obyektlərin tikiləcəyi şübhə doğurmaz. Nəzərə alsaq ki, bu ərazi şəhərin mərkəzi hissəsində yerləşir, burda tikiləcək kommersiya obyektlərinin satışından və ya icarəsindən nə qədər böyük pullar qazanacağını xüsusi izah etməyə etiyac qalmaz.

Elçin