Gömrük şefinə qarşı Naxçıvan əsilli məmurların yeni hücum planları var; Bakı klanı ilə yaxınlaşan A.Əliyev indi sözügedən qruplar üçün arzuolunmaz fiqura çevrilib; Prosesin başında Vüsal Novruzovun adı keçir

Dövlət Gömrük Komitəsində (DGK) daxili çəkişmələrin kulminasiya nöqtəsinə çatdığı barədə redaksiyamıza yeni məlumatlar daxil olub. Məlumatda bildirilir ki, DGK sədri Aydın Əliyevə qarşı Naxçıvan əsilli məmurların yeni hücum planları var. Gömrük xidmətində ən nüfuzlu qruplar sayılan Şərur, Nehrəm və Ordubad qruplaşmaları komitə sədri postuna Bakı Baş Gömrük İdarəsinin rəisi Vüsal Novruzovun gətirilməsinə çalışır. Artıq Bakı klanı ilə yaxınlaşan A.Əliyev indi sözügedən qruplar üçün arzuolunmaz fiqura çevrilib.
Mənbənin məlumatına görə, V.Novruzovun komitəyə sədr təyin olunmasına fövqəladə hallar naziri Kəmaləddin Heydərov da dəstək verir: “Uzun müddət Dövlət Gömrük Komitəsinin sədri işləmiş Kəmaləddin Heydərov nazir təyin edildikdən sonra bu posta ən etibarlı kadrlarından sayılan Aydın Əliyevin gətirilməsinə nail oldu. Son vaxtlara qədər Aydın Əliyev bu etimadı artıqlaması ilə doğruldurdu. Ancaq Bakı klanının davamlı təzyiqləri fonunda geri çəkilməyə məcbur olan Aydın Əliyev etimadını itirməyə başladı. İş o yerə gəlib çatdı ki, gömrük xidmətinə təkcə Bakı klanı yox, həm də prezidentin şəxsi mühafizə xidmətinin rəhbəri Bəylər Əyyubov nüfuz etməyə başladı. Sonda əslən Borçalıdan olan Aydın Əliyev Bakı klanı ilə anlaşmağa məcbur oldu. İndi Əliyev gömrük xidmətindəki narazı qrupları ram etmək, Bakı klanının mövqelərini gücləndirmək niyyətindədir. Oyundankənar vəziyyətdə qalacaqlarından ehtiyatlanan Naxçıvan qruplaşması uduzmaq təhlükəsini önləmək üçün əks hücuma keçib. Naxçıvan qruplaşması mövqelərini uduzmamaq üçün komitə sədri postuna Vüsal Novruzovun gətirilməsinə çalışır”.
Mənbə niyə məhz Naxçıvan qruplaşmasının V.Novruzovun namizədliyinin üstündə durması ilə bağlı məqama da aydınlıq gətirib: “Aydın Əliyevin 4 müavinin hamısı Naxçıvan əsilli olsa da (Səfər Mehdiyev və Əsgər Abdullayev məşhur Nehrəm kəndindən, Rza Həsənəliyev və Nazim Məmmədov isə Ordubad rayonundandır), komitə sədri postuna ali rəhbərlikdə olmayan şəxsin gətirilməsi məsləhət bilinib. Yəni yeni sədr indiki rəhbərliyin intriqalarından nisbətən kənar adam olsun ki, çevik qərarlar qəbul edə bilsin. İkincisi, yeni sədr Bakı klanının təzyiqlərinə müqavimət göstərmək gücündə bir şəxs olmalıdır ki, bu keyfiyyətlərə də Vüsal Novruzovun xarakteri cavab verir. Nəhayət, Vüsal Novruzov Kəmaləddin Heydərovun biznesini idarə edənlərdən biridir və bu müddət ərzində bir dəfə də olsun xəta etməyib. Yəni ”fövqəlnazir"in şəxsən etimad göstərdiyi şəxsdir".
Yada salaq ki, A.Əliyevlə Naxçıvan klanı arasındakı qarşıdurma haqda mediada dəfələrlə yazılıb. Hələ ilin ilk ayının sonunda- yanvarın 30-da komitədə keçirilən kollegiya iclasında A.Əliyev birinci müavini Səfər Mehdiyevin yarıtmaz fəaliyyətini kəskin ifadələrlə tənqid etmişdi. Bunun ardınca isə S.Mehdiyevin yaxın adamlarından birini nümayişkaranə şəkildə iclas zalından qovmuşdu. Həmin məlumatlara görə, A.Əliyev V.Novruzov haqqında kompromat toplanması ilə bağlı göstəriş verib. Bu kompromatlara Bakı Baş Gömrük İdarəsindəki korrupsiya faktlarını əks etdirən videogörüntülər də daxildir.
Məlumatlı mənbələrdən qəzetimizə daxil olan xəbərə görə, V.Novruzov bu təhlükəni önləmək üçün haker qrupu yaradıb. Mənbə iddia edir ki, peşəkar hakerlərdən ibarət qrupun əsas işi saytları, xəbər portallarını izləmək, V.Novruzovla bağlı tənqidi yazıların dərc edildiyi saytları sıradan çıxarmaqdır. İndiyə qədər bir neçə o qədər də populyar olmayan saytları V.Novruzovun hakerləri sıradan çıxarıb. Görünür, gömrük xidmətindəki daxili savaş hələ uzun müddət davam edəcək. Təəssüf ki, gömrük boslarının nüfuz və mövqe uğrundakı savaşdan internet mediası da zərər görür...

Elçin Əmirov