Hakimiyyət təlaş içində, “Qaçqınkom” sədri inqilab təhlükəsindən danışır

Azərbaycan hakimiyyəti seçki təlaşı yaşayır. Seçki yaxınlaşdıqca rejimin qoca ürəyinin çırpıntıları və döyüntüləri daha aydın şəkildə eşidilməyə başlanır. İqtidar üçbaşlı xarici siyasətinin “balanslaşdırılmış” tilovuna düşmək təhlükəsi ilə üzləşib.

“Qoca ürək”

Hökumətin beyin mərkəzində çaşqınlıq və gərginlik müşahidə olunur. Hakimiyyət daxildə sakitliyi müvəqqəti təmin edə bilsə də, xarici təhdidlər səngimək bilmir. İran və ABŞ-la münasibətləri yoluna qoymaq arzusu ilə yaşayan iqtidar necə bir ağır işin altında girdiyini yaxşı dərk edir. Hökumətin seçki narahatlığı təkcə xarici siyasətdə atılan sürətli addımlar, xarakirilərlə hiss olunmur, o cümlədən ayrı-ayrı məmurların dilindən bunu eşidirik.
Bu günlərdə baş nazirin müavini, Qaçqın və Məcburi Köçkünlərin İşi üzrə Dövlət Komitəsinin sədri Əli Həsənov şok açıqlama ilə çıxış edib. Keçmiş prezident Heydər Əliyevin 90 illik yubileyi münasibəti ilə “Heydər Əliyev mənim həyatımda” adlı kitabın təqdimetmə mərasimində çıxış edən Ə.Həsənov qarşıdan gələn prezident seçkilərinə toxunub.
O bildirib ki, seçkilərdə pozuculuq fəaliyyəti göstərən qüvvələr olsa da onlar öz istəklərinə nail ola bilməyəcəklər: “Bugünkü Azərbaycan dövlətçiliyi etibarlı əllərdədir. Bu dövrləri Heydər Əliyev məktəbini uğurla keçən İlham Əliyev idarə edir və hələ uzun müddətdə bu ailə idarə edəcək”.

Əli Həsənov: “Ən təhlükəli seçki 2003-də olub”

“Qaçqınkom” sədri sonra deyib: “Bizim üçün ən təhlükəli seçki 2003-cü ildə olub və artıq o dövr geridə qalıb. Heydər Əliyev Azərbaycanda yox idi. Ölkədə sabitlik təhlükə altında idi. Məmurlar çaşqınlıq içində idi. Bilinmirdi nə olacaq. Açığını deyim ki, hamının da mövqeyi sabit deyildi. Hərə öz hayında idi. Öz sabahını düşünürdü.
Ona görə də məmurların yarıdan çoxunun ayağı başqa yerdə idi və özlərinə arxa axtarırdılar. Çaşqınlıq içində idilər. Həqiqətən bizim üçün çox təhlükəli bir dövr idi. Hətta dövlətçiliyin varlığı təhlükə altında idi. Dövlətin sabahı ilə bağlı şübhələr var idi ki, vəziyyət sabah necə olacaq”.
Ə.Həsənov əlavə edib:
“O zaman İlham Əliyev prezident səlahiyyətlərini də icra etmirdi. Bu çətinliklərə yenə Heydər Əliyev məktəbini uğurla başa vuranlar və onun Azərbaycanın gələcəyi ilə bağlı hazırlayıb qoyduğu idarəetmə mexanizmi bizi xilas etdi. Və İlham Əliyev bu ağır vəziyyətdən Azərbaycanı uğurla çıxardı və xilas etdi. Xarici və daxili qara qüvvələrin niyyətləri boşa çıxdı.
Bu il də prezident seçkiləri keçiriləcək və bir sıra daxili və xarici qüvvələr Azərbaycandakı vəziyyəti gərginləşdirmək istəyirlər. Amma bu qüvvələr istəklərinə nail ola bilməyəcəklər. Çünki Əliyevlər Azərbaycana hələ uzun müddət rəhbərlik edəcəklər”.

Qərbin tələbi

Sensasion açıqlamadır. Özəlliklə sonuncu cümləni heyranlıqla təkrar oxumaq labüddür: “Əliyevlər Azərbaycana hələ uzun müddət rəhbərlik edəcəklər”. Həsənovun nikbinliyinin arxasına bir qorxu, həyəcan və təşviş hiss olunur. O yenidən belə bir vəziyyət yarandığını etiraf edir və hakimiyyətin dəyişilməsi təhlükəsi yaşandığını təsdiqləyir.
Qəbul edir ki, o dövrdə məmurlar öz canının hayında idi, hakimiyyət dəyişirdi və zor gücünə xalq etirazlarını boğa biliblər. Məmurların ayağının başa yerdə olmasına eyham vurması da bu gün üçün aktualdır. Ə.Həsənov mütəmadi olaraq fərqli çıxışları ilə yadda qalıb. Bu da o silsilədən olan açıqlama idi və böyük həqiqəti əks etdirirdi.
2013-cü il prezident seçkisi yaxınlaşdıqca Qərb İlham Əliyevin növbəti dəfə prezidentliyinə qarşı olduğunu daha açıq şəkildə bəyan etməyə başlayıb. Bununla belə Qərb anlayır ki, prezident seçkisinə az müddət qalmış vaxtda yenidən konstitusiyaya dəyişiklik etmək mümkün deyil. Hakimiyyət isə Əliyevin 3-cü dəfə namizədliyini irəli sürməkdə israrlı görünür.
Bu halda da Qərb hakimiyyət qarşısında qəti şəkildə şəffaf seçki tələbini qoyub. Hakimiyyət anlayır ki, şəffaf seçki iqtidarın iflası deməkdir. Ona görə də Qərbi bu tələbindən çəkindirmək üçün hücuma başlayıb. Əgər hakimiyyət 3-cü müddətə prezidentliyə Qərbi razı salmaq üçün hətta Rusiya və İranla münasibətləri pozmuşdusa, indi bu hücumların fonunda yenidən sükanı geri döndərir.

Klanların intiharı

Belədə isə hakimiyyətdə qarşıdan gələn prezident seçkisinə münasibətdə ikitirəlik getdikcə dərinləşir. Hakimiyyətin son günlər bir-birinə zidd addımlar atmasının iqtidar daxilində dəngənin pozulduğu, seçki yaxınlaşdıqca vəziyyətin daha da dramatik hal alacağı barədə ehtimalları gücləndirir.
Biz hələ xeyli əvvəl ziddiyyətlərin təfərrüatları barədə məlumat vermişdik. Bir daha yada salaq. Hakimiyyətdə bir qrup düşünür ki - bu qrup hakim ailənin ətrafında birləşib - Qərbə müharibə etmək intihara bərabər addımdır. Əksinə, Rusiya və İranla münasibətlərin ürəkaçan olmadığı bir dövrdə Qərblə münasibətləri normallaşdırmaq gərəkdir.
Bunun üçün də təbii ki, ilk sırada Əliyevin 3-cü dəfə namizədliyini irəli sürməsi haqqında ciddi düşünmək, ümumiyyətlə, bu addımı atmamaq, seçkiyə başqa bir namizədlə qatılmağı nəzərdən keçirmək lazımdır. Prezident Administrasiyasının (PA) rəhbəri ətrafında birləşən digər qrup isə başqa namizədlə seçkiyə qatılmağın qəti əleyhinədir. Bu qrup hesab edir ki, “başqa namizəd” Paşayevlərin hakimiyyətini tam ələ keçirmək niyyətindən doğan ideyadır.

Aslan