İqtidar 2013-cü ildə qaçqın və məcburi köçkünlərin dəstəyini qazanmaq üçün “çörək pulu”nu 2 dəfə qaldıracaq

gundemxeber.az Hakimiyyətin 2013-cü ildə qələbə qazanmaq istiqamətində həyata keçirdiyi layihələr qarşıdakı seçkilərin taleyinin rejimi həqiqətən də çox narahat etdiyini göstərir. Bu günlərdə bilgili qaynaqlardan redaksiyamıza daxil olan məlumata əsasən, iqtidarın 2013-cü ilin seçki projesi ilə bağlı məcburi köçkünlərin üzərinə də çox ciddi vəzifə qoyulub. Belə ki, qarşıdakı prezident seçkilərində məcburi köçkünlərdən “zərbə qüvvəsi” kimi istifadə etməyi planlaşdıran hakimiyyyət, artıq indidən bu istiqamətdə müəyyən tərdbirlər həyata keçirməkdədir. Lakin hakimiyyət bu dəfə də əməli addımlar atmaqda maraqlı deyil, sadəcə boş vədlərlə insanların dəstəyini qazanmağa çalışır:
“Məcburi köçkünlərin sosial baxımdan daha acınacaqlı durumda olması onları əhalinin digər təbəqələri ilə müqayisədə hakimiyyət üçün daha cəlbedici edir. Hakimiyyət yaxşı bilir ki, minimal ehtiyaclarını belə qarşılamaq iqtidarında olmayan bu insanlar cüzi bir yardım qarşılığında öz minnətdarlıqlarını ən yüksək səviyyədə ifadə etməyə hazırdırlar. Məhz bu səbəbdən də məcburi köçkünlər iqtidarın 2013-cü il seçkilərində hakim rejimin qələbəsini təmin edəcək çox mühüm amillərdən biri hesab edilir. Məcburi köçkünlərin rəğbətini qazanmaq, onların dəstəyinə nail olmaq üçün hərəkətə keçən hakimiyyət artıq indidən özünün yerlərdəki səlahiyyətli nümayəndələri vasitəsilə köçkünlərə müəyyən mesajlar verməkdədir. Yerlərdəki icra hakimiyyəti nümayəndəlikləri, qaçqınkom təmsilçiləri və s. vasitəsilə qaçqınlara yaxın bir-iki il ərzində hakimiyyətin onların bütün problemini həll edəcəyini vəd edən iqtidar, bu cür vədlərlə özünə qarşı inam formalaşdırmağa çalışır. Hakimiyyət hesab edir ki, bu qəbildən olan vədlər məcburi köçkünlərin iqtidara olan itmiş inamını bərpa edə və onların 2013-cü il seçkilərində YAP təmsilçisinə səs verməsinə səbəb ola bilər”.
Məlumata görə, məcburi köçkünlərin ən böyük probleminin mənzillə bağlı olduğunu bilən hakimiyyət onların bu çatışmazlığından da maksimum faydalanmağa çalışır: “Rəsmilər anlayır ki, məcburi köçkünlərə xas problemlərin başında ilk növbədə mənzil problemi gəlir. Məhz bu səbəbdən də köçkünlərin bu həssasiyyətindən öz maraqları naminə faydalanmağa çalışan hakimiyyət, yerlərdəki əlaltıları vasitəsi ilə məcburi köçkünlərə mənzil problemlərinin yaxın vaxtlarda həll ediləcəyini bildirir. Hətta onu da deyirlər ki, hökumət onlara verdiyi mənzilləri orderlərlə paylayacaq. Yəni əgər hansısa məcburi köçkün ona verilən mənzildən və ya bu mənzilin yerləşdiyi yaşayış massivindən məmnun qalmasa, o zaman həmin mənzili sataraq özünə başqa yerdə mənzil ala biləcək. Şübhəsiz, iqtidarın ictimai fikrə sıramağa çalışdığı bu ideyanın tamamilə absurd olduğu aydındır. Lakin 20 ilə yaxındır ki, mənzil problemlərini həll edə bilməyən, gözləntilərdən yorulan yüz minlərlə insanın bu cür vədlərə sıcaq baxdığı da inkaredilməzdir. Məcburi köçkünlər inanamaq istəyir ki, hakimiyyət həqiqətən də öz vətəndaşının 20 illik sərgərdanlıq həyatına son qoyacaqdır. Buna görə də iqtidar ideoloqları tərəfindən ortaya atılan ən cəfəng ideyanın belə qaçqın düşrgələrində real gözlənti kimi dəyərləndirilidiyi bir həqiqətdir”.
Mənbənin sözlərinə görə, məcburi köçkünlərə verilən vədlərdən biri də onlara “çörəkpulu” adı ilə ayrılan sosial müavinətlərin artırılması ilə bağlıdır: “İqtidarın məcburi köçkünlərə böyük inamla verdiyi vədlərdən biri də prezident seçkilərindən dərhal sonra onların çörəkpulu müavinətlərinin artırılması ilə bağlıdır. Iqtidar təmsilçiləri köçkünlərə bildirir ki, seçkilərdən sonra onların “çörəkpulu” müavinəti artırılaraq 33 manata çatırılacaqdır. Xatırladaq ki, hazırda məcburi köçkünlərə ay ərzində təxminən 16,5 manat məbləğində vəsait verilir ki, bu vəsaitin də qaçqınların sosial problemlərinin həllində heç bir rol oynamadığı ortadadır”.
Hakimiyyətin məcburi köçkünlərə verdiyi vədlər arasında onların kommunal xərclərdən tam olaraq azad edilməsi, özəl universitetlərə qəbul olunan köçkün övladlarının təhsil xərclərinin dövlət tərəfindən qarşılanması kimi vədlərin olduğuna diqqət çəkən mənbə, bunların heç birinin reallıqla əlaqəsi olmadığını vurğuladı: “Təbii ki, bu gün məcburi köçkünə yaşayış yerindən arayışı iki manatdan aşağı qiymətə verməyən, hər addımda onun haqqına qəsb edən hakimiyyətin köçkünlərə bu miqyasda yardım göstərəcəyini düşünmək sadəlövlükdür. Bu gün əksər köçkün düşərgələrində sayğac sisteminə keçidin başa çatdığı və köçkünlərin də yerli vətəndaşlar kimi qanunla müəyyən olunmuş məbləğdə kommunal xərc ödədiyi hər kəsə bəllidir. Qaçqın imtiyazlarının ilbəil ləğv edildiyi bir zamanda hakimiyyətin məcburi köçkünləri bütün kommunal xərclərdən azad edəcəyi, onların təhsil xərclərini dövlət büdcəsi hesabına qarşılayacağı və s. ilə bağlı vədlər sadəcə gülüş doğurmaqdadır. Hakimiyyətin məcburi köçkünlərdən 2013-cü il seçkilərində qalxan kimi istifadə etmək cəhdinin isə nə dərəcədə səmərə verəcəyi təxminən bir ildən sonra məlum olacaq”.

Azər