Rüstəm İbrahimbəyov:“Payızda hakimiyyətə yeni şəxs gələcək, bu tam realdir”

“Mən həmişə Azərbaycan vətəndaşı olmuşam, indi də Azərbaycan vətəndaşıyam. Dünyanı Azərbaycan pasportu ilə dolaşıram”. Azərbaycan Kinematoqrafçılar İttifaqının sədri, Rusiya Azərbaycan Təşkilatları İttifaqı Koordinasiya Şurasının üzvü, yazıçı Rüstəm İbrahimbəyov “Media forum” saytına belə deyib.
Yazıçı bildirib ki, 1980-ci ildə SSRİ Kinematoqrafiya İttifaqının katibi seçilib və Moskvaya gedib: “Qanunlara əsasən, Rusiyada qeydiyyata düşməliydim və düşdüm. Həmin vaxt Rusiyada pasport almışam. Amma bu o demək deyil ki, Rusiya vətəndaşıyam. Məndə Rusiyanın köhnə pasportu var. İstəsəm, bir həftə ərzində bu ölkənin vətəndaşı ola bilərəm. Amma bunu istəmirəm. Azərbaycan pasportu daşıyıram. Məndə Azərbaycanın iki pasportu var. Həm ümumvətəndaş pasportu, həm də diplomatik pasportu. Dünyanın hansı ölkəsinə getsəm Azərbaycan pasportundan istifadə edirəm.
Vaxtilə demişəm ki, Rusiya ilə Azərbaycanın sərhədi mənim ürəyimdən keçir. İndi də bu fikrimdə qalıram. Mən Rusiya mədəniyyətinə, rus xalqına böyük hörmətlə yanaşıram və bu xalqı sevirəm. Amma bu o demək deyil ki, Rusiyada olan sistem xoşuma gəlir. Bu ölkədə böyük problemlər var. Korrupsiya, rüşvətxorluğun səviyyəsi Azərbaycandakından az deyil”.
Rusiyanın Azərbaycanla bağlı siyasətinə toxunan yazıçı Moskvanın hakimiyyət dəyişikliyində marağı olmadığını vurğulayıb: “Prezident Vladimir Putinlə Heydər Əliyevin çox yaxın, yaxşı münasibətləri vardı. Onların bir neçə görüşündə iştirak etmişəm. Çox səmimi, mehriban münasibətlərinin şahidi olmuşam. Hesab edirəm ki, Rusiyanın Azərbaycanın indiki prezidenti İlham Əliyevlə də münasibətləri çox yaxşıdır. Bununla bağlı problem yoxdur.
Məndə olan məlumata görə, hər iki-üç aydan bir, bayramdan-bayrama Bakıdan çamadanla pul gətirib Moskvada paylayırlar. Bu o deməkdir ki, Rusiyanın Azərbaycanda geopolitik maraqları var. İnanmıram ki, onların Azərbaycanda demokratiya yaratmağa marağı olsun, buna kömək etsinlər. Bununla bağlı Rusiyada kiminləsə müzakirə aparmağın da heç bir mənası, faydası yoxdur. Çünki Rusiya konkret olaraq Azərbaycanın indiki hökuməti ilə işləyir.
Geopolitik siyasət, stuasiya dəyişsə, Azərbaycan Amerika ilə yaxınlaşsa, onda ola bilər ki, hökumətin Rusiya ilə münasibətləri korlansın. Bu isə ehtimaldır. Amma hələlik iki ölkənin rəsmi münasibətləri normaldır. Konkret deyə bilərəm ki, Rusiyanın Azərbaycanda demokratiyanın qələbə qazanmasına marağı yoxdur”.
Rüstəm İbrahimbəyov deyib ki, Azərbaycanda dəyişiklik uğrunda mübarizəni sonadək davam etdirəcək: “İnanıram ki, payızda keçiriləcək prezident seçkisində Azərbaycanda böyük dəyişiklik olacaq, hakimiyyətə yeni şəxs gələcək və bu tam realdır. Əgər bu baş verməsə, prezident seçkisindən sonra da Azərbaycanda demokratiya, azadlıq, insan hüquqları, vətəndaş cəmiyyəti, şəffaflıq uğrunda mübarizəmi, fəaliyyətimi davam etdirəcəm. Ümidvaram ki, bu dəfə olmasa da, mübarizə dayanmayacaq, yaxın iki-üç ildə dəyişikliklər baş tutacaq. Mən istərdim ki, dəyişiklik seçki vasitəsilə, sülh yolu və dinc şəkildə olsun, məsələni sivil formada həll edə bilək. İndi ömrümün ağsaqqal çağındayam, yaşım ötüb. Dəyişiklik üçün əlimdən gələni edəcəm, mübarizəni sonadək aparacam, geri çəkilmək niyyətim yoxdur. Məndən sonra gələn insanlar da bunu davam etdirməlidirlər. Mübarizənin davam etdirilməsini istəyirəm”.