Mahir Abdullayevin Hüquqlarının Müdafiə Komitəsindən "Azadlıq.TV"yə yeni videolent təqdim edilib. Həmin videoçəkiliş fəaliyyəti dayandırılmış Azərbaycan Beynəlxalq Universitetinin rektoru Elşad Abdullayev tərəfindən komitəyə göndərilib. Mahir Abdullayevin Hüquqlarının Müdafiə Komitəsindən verilən məlumata görə, videolent Baş Prokurorluğa da təqdim ediləcək.
Videolentdə tanınmış iş adamı Əli Bayramov (Zəngilanski) ilə Elşad Abdullayevin söhbəti əks olunur. İş adamı Mahir Abdullayevin fövqəladə hallar naziri Kamaləddin Heydərovun sifarişi ilə sabiq milli təhlükəsizlik naziri Namiq Abbasov tərəfindən həbs edildiyini bildirir. Əli Zəngilanskı iddia edir ki, Mahir Abdullayevi Milli Təhlükəsizlik Nazirliyinin Nizami Rayon Şöbəsində görüb. Əli Zəngilanskinin sözlərinə görə, Mahir Abdullayevin səhhətində problemlər var və o müalicə olunduqdan sonra buraxılacaq. Əli Zəngilanskı bildirir ki, yeni milli təhlükəsizlik naziri Eldar Mahmudov Mahir Abdullayevin sərbəst buraxılması barədə göstəriş verib.
"Azadlıq" qəzeti bir müddət əvvəl Elşad Abdullayevə istinadən bu videonun yayılacağını anons etmişdi. Sabiq rektor o zaman qəzetimizə Əli Zəngilanskinin özü barədə də maraqlı məlumatlar vermişdi. Elşad Abdullayev bildirmişdi ki, Əli Zəngilanskinin oğlu MTN-də çalışır və mayor rütbəsi daşıyır. Sabiq rektor əlavə etmişdi ki, bu şəxs özü isə hay-küylü cinayətlərin iştirakçısı olub: "Məni Əli Zəngilanski Bakı Dövlət Universitetinin hüquq fakultəsinin dekanı mərhum Məmmədxan Rəsulov tanış edib. Bir məqamı deyim. 2007-ci ildə Qurd Qapısı restoranında Bakı Dövlət Universitetinin hüquq fakültəsinin dekanı Məmmədxan Rəsulovu Sevinc Babayeva sayağı zəhərlədilər. Bu əməliyyatda Əli Zəngilanskinin rolu olub. Sumqayıtda bir zavod direktorunu da bu cür aradan götürdülər. Əli Zəngilanski adam oğurluğu ilə məşğul olan mütəşəkkil cinayətkar təşkilatın da üzvüdür. Bildiyim qədər MTN-nin 4-cü idarəsilə əlaqəlidir".
Elşad Abdullayev həmçinin qeyd etmişdi ki, Əli Zəngilanski "Terrazini" ləqəbilə tanınır. Sabiq rektorun sözlərinə görə, Əli Zəngilanski ilə bağlı onda 16 video var. Həmin videolar 2003-2007-ci illərdə çəkilib.