Generalın iqtisadi cəhətdən çökdürülməsi yönündə addımlar atılır

gundemxeber.az Prezidentin mühafizə idarəsinin rəisi, general Bəylər Əyyubovun gizli iqtisadiyyatda əsas fiqurlardan biri olması sirr deyil. Onun yaxın adamları vasitəsilə çoxsaylı qurumlara nəzarət etməsi, qida sektorunda xüsusi paya malik olması haqda çox yazılıb. Generalın qohumluq əlaqələrinin olduğu Naxçıvan Muxtar Respublikası Ali Məclisinin sədri Vasif Talıbovla birgə şirə istehsalına girişdiyi haqda da informasiyalar var. Həmin məlumatlarda bildirilir ki, şirə bazarına təxminən bir il öncə daxil olan «Vita-100» şirələri məhz onlara məxsusdur.
Bununla belə generalın nəzarəti və diqqəti altında saxladığı əsas sahə həmişə olduğu kimi taxılçılıq və tikinti materiallarının idxalıdır. Amma deyəsən, indi bu sahədə də generalın problemləri yaranmağa başlayıb. Belə ki, əldə etdiyimiz məlumata görə, generalın Beyləqan rayonu ərazisindəki taxıl zəmiləri ilə bağlı müəyyən narahatçılıqlar yaranıb. Məlumat üçün bildirək ki, Haramı düzündə Bəylər Əyyubova məxsus geniş taxıl sahələri var ki, burada işlərə nəzarəti generalın «adamı» kimi tanınan sabiq deputat Əhəd Əhmədov həyata keçirir. Hətta deputat olduğu illərdə belə Haramı düzündəki zəmilərdə olmağı parlamentdə oturmaqdan üstün tutan Əhəd Əhmədov burada hər şeydən sorumludur. Beyləqandakı mənbəmizin sözlərinə görə, Əhəd Əhmədov deputat olanda belə parlamentin iclaslarına qatılmaq üçün birinci növbədə «ağsaqqal»dan icazə almalıymış. Bu faktın özü də Haramı düzündəki zəmilərin generalın biznes sistemində necə vacib halqa olduğunu təsdiqləyir.
Mənbəmiz iddia edir ki, əgər əvvəllər general Beyləqanda şəriksiz söz sahibi idisə artıq indi üçün bunu demək çətindir. Hər halda sonuncu parlament seçkilərində Əhəd Əhmədovu təkrar Beyləqandan deputat «seçdirə» bilməyən Bəylər Əyyubov rayondakı ilk məğlubiyyətini almış oldu. Birmənalı olaraq Prezident Adminstrasiyasının rəhbəri Ramiz Mehdiyevin «adamı» olan Beyləqanın yeni icra başçısı Vaqif Abdullayev generalın rayondakı adamlarını sözün əsl mənasında sıxışdırmağa başlayıb. İlk növbədə Əhəd Əhmədovu zərərsizləşdirməyi bacaran icra başçısı indi də generalın taxıl biznesini hədəfə alıb. Aydın məsələdir ki, icra başçısı yuxarıdan tapşırıq olmadığı təqdirdə generalı maraqlarını tapdalayan addımları atmağa cürət etməzdi. Görünür, Bəylər Əyyubovun Beyləqanda sıxışdırılması göstərişi Ramiz Mehdiyevdən gəlib. Belə ki, Beyləqanda ölkəninin iki ən qüdrətli məmuru üz-üzə gəlib. Bununla da ötən parlament seçkilərindən başlayan münaqişə pik həddinə çatıb. Beyləqandan daxil olan məlumata görə bir neçə gün əvvəl rayonda taxıl daşıyan ağır yük maşınları ilə bağlı ciddi problem yaşanıb. Məlumatda bildirilir ki, Beyləqanda biçin mövsümü başladıqdan sonra taxıl maşınlarının rayon mərkəzindən keçişi yasaqlanıb. İcra başçısı Vaqif Abdullayev bunu ağır tonnajlı yük maşınlarının yolları sıradan çıxarılması ilə əlaqələndirib. Lakin mənbəninin bildirdiyinə görə, bu yasaq əslində Bəylər Əyyubovun adamlarını sıxışdırmağa hesablanıb.
Mənbə bildirir ki, problem iki il bundan əvvəl Ramiz Mehiyevlə Bəylər Əyyubov arasında başlayıb. Belə ki, Ramiz Mehdiyev Bəylər Əyyubovun kadrı olan Əhəd Əhmədovun ikinci dəfə Beyləqan-İmişli seçki dairəsindən deputat seçilməsinə veto qoyub və bu dairədən öz adamını millət vəkili çıxarıb. Bu isə iki məmur arasında toqquşmaya səbəb olub. Ramiz Mehdiyevin kadrı olan hazırkı icra başçısı Vaqif Abdullayev isə rayona ayaq basandan sonra Bəylər Əyyubovun adamlarına qarşı sözün həqiqi mənasında repressiya həyata keçirib. Hətta keçmiş millət vəkili Əhəd Əhəmədovun Beyləqana girişinə qeyri-rəsmi qadağa belə qoyulub.
Mənbəninin bildirdiyinə görə taxıl daşıyan yük maşınlarının Beyləqandan keçməsinə yasaq qoyan icra başçısı sonda geri addım atmağa məcbur olub. Bununla belə ziddiyyətlərin hələ də səngimədiyi bildirilir.
Şahin