Vidadi İsayev generalın qəzəbinə gəlib

Hakimiyyət daxilində böyük təmizləmə əməliyyatı gözlənilir. Bu barədə bizi bilgiləndirən hökumət içindəki qaynaq iddia edir ki, artıq «qara siyahı» hazırlanıb və həmin siyahıda xeyli sayda icra başçısının da adı var ki, onlardan biri də bu gün Bərdə rayonuna rəhbərlik edən Vidadi İsayevdir. Nazirlər Kabinetindəki etibarlı mənbəmiz bildirir ki, bu gün Bərdə rayonuna rəhbərlik edən Vidadi İsayevin hədəfə alınması heç də təsadüfi deyil: «Ola bilsin ki, Vidadi İsayev kimlər üçünsə kiçik fiqur hesab oluna bilər. Amma məsələ heç də onun mövqeyinin o qədər də ciddi olub-olmamasında deyil».
Gözlənilən kadr islahatları zamanı əsasən Prezident Administrasiyasının rəhbəri Ramiz Mehdiyevə yaxın şəxslərin «vurulacağı»nı bildirən mənbəmiz bildirir ki, Vidadi İsayev Ramiz Mehdiyevin himayəsi altındadır: «Amma ona qarşı xüsusi qəzəb var və bunun da səbəbi olan bir hadisə var». Mənbəmizin sözlərinə görə, ilk əvvəl prezidentin şəxsi mühafizə idarəsinin rəhbəri Bəylər Əyyubovun himayəsi altında olan Vidadi İsayev sonradan bu himayədən imtina edir: «Bəylər Əyyubovla Vidadi İsayevin və həmçinin daha bir neçə icra başçısının əlaqəsi Zaman adlı bir iş adamı tərəfindən həyata keçirilirdi. Həmin Zaman adlı iş adamı Bəylər Əyyubova yaxın olan şəxsdir və bu gün Bəylər Əyyubova aid olan «Ay işığı» restoranlar şəbəkəsi, həmçinin digər obyektlər məhz Zamanın əli ilə idarə olunur».
Mənbəmiz bildirir ki, bu arasılıqdan yorulan Vidadi İsayev nəhayətdə Prezident Administrasiyasının rəhbəri Ramiz Mehdiyevə şikayətlənir və bildirir ki, onun Bəylər Əyyubova birbaşa çıxışının olmaması problemlər yaradır: «Bəylər Əyyubovdan gileylənərək «Bizi tapşırıb bir ofisianta (Zamanı nəzərdə tutur -red.)» deyən Vidadi İsayev sonradan Ramiz Mehdiyevin «krışalığı» altına keçir».
Həmin gündən sonra Bəylər Əyyubovun hədəfinə çevrilən Bərdənin icra başçısına qarşı köhnədən nifrətin qaldığını bildirən mənbəmiz generalın indi qisas barədə düşündüyünü də vurğuladı: «Bu səbəbdən Vidadi İsayev Bəylər Əyyubovun qəzəbinin qurbanına gedir və onu adı «qara siyahı»ya Ramiz Mehdiyevin adamı kimi daxil edilib».
Elçin Əmirov