PA rəhbəri ciddi itkilərlə üz-üzə

gundemxeber.az Bəli, hakimiyyət içindən silkələnir. Əslində bu silkələnmə iqtidarın öz daxilində yeni təmizləmə siyasətip həyata keçirə bilməsi üçün növbəti istinad nöqtəsi rolunu oynayacaq. Ümumiyyətlə, bu vaxta qədər YAP iqtidarının nümayiş etdirdiyi dəst-xəttdən də aydın olanı budur.
Doğrudur, bu gün bəziləri «bu biabırçılıqdan sonra hakimiyyət getməlidir», «bu hadisə hakimiyyəti bitirəcək» şəklində ehtimallar, fərziyyələr, arzularını irəli sürürlər və fikirlərini belə əsaslandırırlar ki, baş verən hadisənin şiddəti hakimiyyətin sütunlarını laxladıb.
Amma kimsə iddia edə bilməz ki, 2005-ci ilin 17 oktyabr tarixində baş verən olaylar şiddət baxımından hazırki hadisələrdən geridə idi. Əksinə, bir neçə nazirin, onlarla iş adamı və məmurun həbsi ilə müşahidə olunan həmin hadisələr daha səs-küylü idi. Hətta nazirlərin qolları kabinetlərində qandallanırdı. Amma nə müxalifət bundan istifadə edə bildi, nə də hakimiyyət bu proseslərin əleyhinə çevrilməsinə şərait yaratdı. Əksinə, seçkilərə az müddətin qaldığı bir dönəmdə baş verən bu olayların fonunda hakim düşərgə bütün proseslərdən uğurla çıxmağa müvəffəq oldu. Çünki o zaman da və indinin özündə də baş verənlər məhz iqtidar başbilənlərinin cızdığı müstəvidə, onların ssenarisinə uyğun qaydada cərəyan etməkdədir. Ssenaridən kənar heç nə yoxdur və hər şey tam yazılana uyğun şəkild həyata keçir. Hətta xəstələnmələr, həyacanlanmaların özü belə qabaqcadan düşünülüb.
Nə baş verir? Artıq baş verənlərin üzdə olan görüntülərindən hər kəs xəbərdardır. Əvvəlcə müdafiə olunmağa çalışan Gülər Əhmədova indi artıq geriyə - məhbəsə doğru geri çəkilməyə başlayıb. Artıq «bu montajdır», «bu kollajdır» kimi absurd izahatlar, bəhanələr də səslənmir. Gülər Əhmədova cinahından, sadəcə olaraq, yayılan xəbər bundan ibarətdir: «Gülər Əhmədova insult keçirdi - Gülər Əhmədova ikinci dəfə insult keçirdi.. Gülər Əhmədova üçüncü, dördüncü, beşinci dəfə də insult keçirə bilər... amma sözdə!
Bəri başdan bildirək ki, bu xəbərlər daha çox Gülər Əhmədovaya yaxın hesab olunan Ramiz Mehdiyevin mətbuatı tərəfindən dövriyyəyə buraxılırdı. Səbəbi aydın idi. Çünki insult keçirən birisinin istintaqa cəlb olunması da imkansız olur. Bununla da Gülər xanımı istintaqdan yayındırıb, əlavə vaxt qazanmaq istəyirdilər.
Amma rəqib cinah buna imkan vermədi və dərhal, aradan bir neçə saat keçəçndən sonra «millət vəkili Gülər Əhmədovaya insult diaqnozu qoyulmayıb» başlıqlı informasiyalar əks qütbə aid rəsmi mətbuatda yayılmağa başladı. Xəbərdə qeyd olunurdu ki, Bu barədə Bakı şəhər Təcili və Təxirəsalınmaz Tibbi Yadım Stansiyasının baş həkimi Mürsəl Həmidov bildirib.
Onun sözlərinə görə, 28 sentyabr tarixində Gülər Əhmədovanın səhhəti ilə bağlı stansiyaya iki dəfə çağırış edilib, həkimlər çağırışa gedib. Üçüncü dəfə isə həmin gün saat 17.17-də stansiya tərəfindən G. Əhmədovanın evinə həkim göndərilib: «Birinci çağırışda Gülər Əhmədovaya beyin-qan dövranının keçib gedən pozulması, sonuncu dəfə isə ona gərginlik fonunda gedən nevrotik reaksiya diaqnozu qoyulub. Gülər Əhmədovanın yanından gələn həkim onda heç bir insult əlamətinin olmadığını qeyd edib».
Yəni Gülər xanım tam anlaqlı vəziyyətdədir və istədiyi kimi istintaqa cəlb oluna bilər. Əslində bunun belə olduğu əvvəlindən də bəlli idi. Və Gülər xanım sonradan Milli Məclisə yolladığı istefa müraciəti ilə də bunu təsdiqlədi ki, hətta istefa qərarını verə biləcək səviyyədə anlaqlıdır. Yəni proses başlaya bilər...
Bunun ardından, yəni srağagün isə Gülər Əhmədovanın YAP sıralarından qovulması xəbəri yayıldı. Bu isə məsələnin nə yerdə olması bə hansı yönə doğru inkişaf etməsi istiqamətində böyük bir izahat rolunu oynadı. Hər halda, rəhbərliyində daha çox ramiz Mehdiyevin rəqiblərinin yer aldığı hakim partiyadan belə bir qərarın çıxması o demək idi ki, yaşadığı gərginlikdən dolayı nevrotik davranışları ilə diqqətə gələn Gülər Əhmədova tam anlaqlıdır və onun barəsində ciddi addımlar atıla, ciddi qərarlar verilə bilər.
Nə baş verəcək? Təbii ki, burada Gülər Əhmədovanın həbsi belə istisna olunmur. Çünki bu həbsin fonunda bir çoxlarının əl-qolu bağlanmalıdır. Söhbət burada dünənə qədər Azərbaycanın siyasi-ictimai-iqtisadi sferasında sözün bütün mənalarında əsas güc kimi çıxış edən və hətta ölkə prezidentinin birinciliyini belə zaman-zaman təhdid edən rusiya yanlısı Ramiz Mehdiyevin komandasının durdurulmasından gedir.
Artıq bu komanda geri çəkilməkdədir. Bu dəfəki məğlubiyyət onlara aiddir və qəzetimizə daxil olan məlumatlardan aydın olur ki, səhhətində ciddi problemləri olan Ramiz Mehdiyevin özü belə könüllü surətdə istefa verə bilər. Çünki vəziyyət bunu diqtə edir. Dünənə qədər məhz onun maraqlarına uyğun surətdə cərəyan edən olaylar bu gün məhz onun yola salınması üçün baş verməkdədir. Yəni bu dəst-xətt əslində Mehdiyev cənablarına tanış olmalıdır. Çünki zamanında buk imi priyomlardan rəqiblərinə qarşı gen-bol surətdə istifadə edib.
Redaksiyamızı bilgiləndirən mötəbər mənbənin sözlərindən belə aydın olur ki, bundan sonra cərəyani edəcək olaylar fonunda çox ciddi həbs qərarları verilə bilər: «Proseslərin uzantısı mümkündür. Bu addım dərhal atılmaya bilər. Amma məsələlərin bir çoxlşarını heyrətləndirəcək addımlarla yekunlaşacağı şəkksizdir».
Onu da qeyd edəki ki, son günlər baş verən qalmaqallı olayların nəticəsi olaraq Prezident Administrasiyasının rəhbəri Ramiz Mehdiyev komandasının itkiyə uğrayacağı haqda məlumatları hələ öncədən xəbərləmişdik. Qeyd edək ki, lisenziyası ləğv edilmiş Beynəlxalq Universitetin sahibi Elşad Abdullayevin açıqladığı gizli videoçəkilişdən də aydın olurdu ki, artıq mandatından imtina etmiş deputat Gülər Əhmədova ondan 2 milyon dolları «Ramiz Mehdiyevə çatacaq» adı altında tələb edib. Doğrudur, videoçəkiliş zamanı Gülər Əhmədova «pulu mən istəyirəm» desə də, Elşad Abdullayev söhbətin gedişatını məhz gərəkən ünvana yönəltməklə, məsələnin nə yerdə olduğunu videogörüntülər hesabına aydınlatmış olur.
Təbii ki, bütün bunlar Ramiz Mehdiyev üçün gözlənilməz zərbə effektindədir. Bu barədə redaksiyamıza daxil olan məlumatlardan aydın olur ki, əslində sözügedən videomaterial Elşad Abdullayev açıqlayana qədər də dövlətin müvafiq qurumlarının əlində olub. Sadəcə olaraq, bu məsələnin hansı formada işıqlandırılması qərarı qətiləşmədiyindən, susqunluq olub və nəhayətdə Elşad Abdullayev tərəfindən açıqlanıb.
Mənbəmiz bildirir ki, artıq bütün proseslər nəzərdə tutulan qaydada inkişaf etməkdədir və Ramiz Mehdiyev komandasında yarpaq tökümü sezonuna start verilir. Mənbənin söylədikləri:
«Ramiz Mehdiyevin komandasına aid olan çox nüfuzlu məmurların əksəriyyətinin vəzifələrindən alınması planlaşdırılır. Hətta onlardan bəziləri məhz bu məsələ ilə əlaqədar əlbirlikdə ittiham olunaraq məsuliyyətə də cəlb oluna bilər. Bunun üçün isə Gülər Əhmədovanın gərəkən ifadələrinə ehtiyac var».
İlk olaraq hədəfə alınanlardan birinin Prezident Administrasiyasının şöbə müdiri Əli Həsənov olacağını bildirən mənbəmiz onu da vurğuladı ki, onunla bərabər hətta Mehdiyevə yaxın deputatların da çıxdaş edilməsi nəzərdə tutulub.
Azad