2018 seçkilərinə bir il qalmış Moskva 5-ci kolondakı siyasi meyitləri təzədən dirildib; Abbas Abbasovla Surət Hüseynov xortlayıb...
ÜAK-ın bağlanması, Lapşinin ekstradisiyası, qəfil Soçi görüşü, “Jara” festivalı, Bakı buxtasında rus gəmiləri...ölkəmiz yenə şimal təhdidi ilə üz-üzə...

Rusiya Azərbaycanda seçkiqabağı öz şəbəkəsini vitrinə çıxarır. Hakimiyyətə qarşı təzyiq rıçaqlarını işə salan Kreml rəsmi Bakını öz orbitindən çıxmağa qoymur.
“Gündəm Xəbər”in verdiyi məlumata görə, ötən həftənin siyasi gündəmini ruspərəst və 5-ci kolon qüvvələr barədə iddialar zəbt etmişdi.
Qəfildən Surət Hüseynovun peyda olması, Abbas Abbasovun gizli toplantılar keçirməsi Moskvanın hansısa siyasi ssenariləri həyata keçirməyə hazırlaşmasından xəbər verirdi.
Rusiya açıq-aşkar Bakıya həmlələr etməkdədir və Ümumrusiya Azərbaycanlıları Konqresinin ləğvindən başlayaraq Lapşinin həbsi, cəbhədəki hadisələr və s. qədər gərginlik artmaqdadır.
Bu gərginliyin azalması Soçi görüşündə gözlənilirdi ki, prezident İlham Əliyev fərqli ovqatda geri qayıtdı.
Rus gəmiləri yenə Bakı buxtasındadır: Stepan Razinin Xəzər sahillərini zəbti, Pytorun məşhur vəsiyyəti, Putinin SSRİ-nin varislərini vəsiyyətə uyğun nəzarətində saxlaması, yenə seçkiqabağı gəlmələri, 5-ci kolonun fəallığı, ÜAK-ın bağlanması, Lapşinin ekstradisiyası tələbi, qəfil Soçi görüşü - yəni hər bir mülahizəni yürütmək mümkündür ki, bu dəqiqə Rusiya-Azərbaycan münasibətləri “buz” dövrünü yaşamaqdadır.
Xəzərin Bakı buxtasında aysberqə dəyən rus gəmilərinin tək niyyəti var - kisələri, torbaları doldurub əlidolu geri qayıtmaq...
Azərbaycanın başına əbədi bəla olan Sürət Hüseynovun qəfil zühur etməsi, Rəhim Qazıyevin sərsəmləməsi, Elçibəyi təhqir etməsi yenə də Moskvanın 5-ci kolon
şəbəkəsinin quruda fəaliyyətidir. Suda rus gəmiləri, quruda 5-ci kolon Azərbaycana qarşı səfərbər olub.
“Gündəm Xəbər” bildirir ki, indi qırılma nöqtəsi Lapşin üzərindədir. Həbsdə saxlanan bloggerin ekstradisiyası ilə bağlı Azərbaycan hakimiyyətinin hansı qərarı verəcəyi Moskva ilə münasibətlərin gələcək inkişafında çox əhəmiyyətlidir.
Ədliyyə Nazirliyinin açıqlaması da birmənalı cavab deyildi. Nə hə, nə də yox deyildi. Bildirildi ki, hökm qüvvəyə minsin, Lapşinin ekstradisiya ilə bağlı müraciətinə baxılacaq. Təbii ki, məhkəmənin qərarı siyasi qərar və iradədən asılı olacaq.
Bununla belə, Kreml köhnə qvardiyanı meydana çıxarıb. Prezident İlham Əliyevə dönük çıxan və vəzifədə olduğu dövrdən bu günə kimi dövlətə xainlik edən Abbas Abbasovun ipi öz əlində olmadığına görə əməllərini dirijor çubuğu ilə davam etdirir. Onun bütün işləri, qrafiki və saatı Kreml vaxtına uyğun qurulub. Ona görə də son aylar yenidən siyasi səhnədə fəallaşması haqda xəbərlər yayılıb.
Məlumatlarda qeyd olunur ki, Moskvadakı və Bakıdakı tərəfdarlarını başına toplamağa cəhd edən A.Abbasov 2018-ci ildə mütləq Azərbaycana qayıdacağı və seçkilərdə iştirak edəcəyi mesajını verib.
Bu arada Rusiya Azərbaycanlılarının Federal Milli Muxtariyyətinin rəsmi saytı Vladimir Putinin A.Abbasova məktub yazdığı barədə xəbər yayıb.
Kremlin mətbuat xidmətinə istinadən yayılmış məktubda bildirilir ki, Rusiya prezidenti Vladimir Putin Sahibkarlığa Dəstək Fondunun direktoru Abbas Abbasova "fəal ictimai fəaliyyətinə və Rusiyada sahibkarlığın inkişafına göstərdiyi dəstəyə görə” təşəkkür edib.
Əlbəttə ki, ilin-günün bu vaxtında bu təşəkkür səbəbsiz deyil. 2013-cü ildən bəri Putinin yadına düşməyən, bir dəfə onu xatırlamayan Abbas Abbasov yenə seçkiqabağı “iş”ə lazım olub.
Milli Məclisin yəhudi əsilli deputatı Yevda Abramov mətbuata müsahibəsində bu mövzuda sensasion sayılacaq iddialar səsləndirmişdi.
Y.Abramov demişdi ki, yenidən Azərbaycanın daxilində qarşıdurma və təlatüm yaratmaq üçün 2013-cü il seçkiləri ərəfəsində “Milyarderlər İttifaqı” kimi oxşar hadisələr baş verə bilər.
O, ad çəkməsə də, aydın idi ki, əsas şübhələr yenə də Azərbaycan baş nazirinin sabiq birinci müavini Abbas Abbasovun üzərində cəmlənir.
“Gündəm Xəbər”in verdiyi məlumata görə, bu məqamda A.Abbasov, R.Qazıyev, S.Hüseynov triosunun ağalarına xidmət üçün sıra düzülüşündə olması, dirijor çubuğu ilə idarə edilməsi, xora qoşulması anti-Azəraycan kampaniyasının tərkib hissəsidir.
Son zamanlar isə Azərbaycanda rus dili ilə bağlı müxtəlif fikirlər səsləndirilir. Millət vəkilləri və alimlər rus dilinin vacibliyini vurğulayırlar.
Bundan ilhamlananlar isə daha da irəli gedərək rus dilinin Azərbaycanda ikinci rəsmi dil olmasını təklif edirlər.
Bu ssenarilərin hansı siyasi “mətbəx”lərdə hazırlandığı gün kimi aydındır. Ölkədə xərçəng kimi yayılıb hər nöqtədə mənzillənmiş ruspərəst qüvvələr 5-ci kolonun fikirlərini sətiraltından yeridirlər.
O baxımdan Moskvanın yeni nəbz yoxlamaları davam etməkdədir. Kreml öyrənmək istəyir ki, Azərbaycanda ictimai rəy ikinci dövlət dilinin rus olmasını necə qarşılayır.
Ölkəmizə qarşı Rusiyanın mütəmadi şəkildə hansı mövqedə olduğu ortadadır. Azərbaycan tərəfi birmənalı şəkildə nə qədər xoş münasibət göstərsə də, əməkdaşlıqda maraqlı olduğunu büruzə versə də, əməldə Rusiya ilə yaxşı münasibətləri sübut etsə də, xeyri yoxdur.
Son zamanlar Azərbaycanın konkret dostlarını müəyyən etməsinin, Qərb institutları ilə əlaqələrini yüksək səviyyədə qurmasının, Amerika ilə münasibətlərin normal hala salmasının, NATO ilə əlaqələri inkişaf etdirməsinin fonunda Rusiya ölkəmizi bu qədər güclü görmək istəmir.
Bütün bunların fonunda Rusiyanın münasibəti aydındır. Azərbaycan tərəfi bu istiqamətdə müəyyən işlər görməlidir.
“Gündəm Xəbər”in verdiyi məlumata görə, Azərbaycana qarşı qurulan ssenariləri, təzyiq planlarını birlikdə poza bilərik.
Bu günə kimi də hakimiyyət Moskvadan gələn planları vaxtında pozmağa nail olub. Amma 2018 əvvəlki dövrlərdən çox fərqlənəcək.
Bu dəfə Rusiyanın daha güclü təzyiqlərinin olacağı şəksizdir. Əliyevlə Trampın isti münasibətləri və Qərbə yaxın müxalifətin zəiflədilməsi ruspərəstlərin əl-qolunu açmaqdadır.
Başqa tərəfdən də, bəzi məmurlar İ.Əliyevdən yox, bağlı olduqlarını ölkələrdən qorxurlar.
Sabah dar məqamda iqtidara arxa çevirməyə hazır olan qüvvələr var ki, hökumətin içində yer alıblar. O nöqteyi-nəzərdən 2018-ci il hakimiyyət üçün asan olmayacaq.
Artıq bir sıra məmurlar hakimiyyətdən, dövlət başçısından daha çox müxtəlif xarici dairələrə bağlıdır. Bu halda hakimiyyətə qarşı bir narazı məmur batalyonu yetişir ki, onlar yeni müxalifət ola bilər.
İstərsə, hakimiyyətin, ordunun və müxtəlif sektorların içinə sızmış 5-ci kolon olsun, istərsə siyasi cəhətdən təzyiq rıçağına çevrilmiş “Milyarderlər ittifaqı” olsun, istərsə ordudakı casus şəbəkəsinin Moskvanın əli ilə yaradılması olsun, istərsə də Ümumrusiya Azərbaycanlıları Konqresinin ləğvi ilə rəsmi Bakıya edilən həmlələr...
Bütün bunların hər biri Kreml təhlükəsinin daima başımız üzərində bir qara bulud olduğuna deməyə dəlalət edir. Azərbaycan da, hakimiyyət də, İlham Əliyev də şimal küləklərinin əsməsindən daima narahatdır.
Rusiya, Pyotrun vərəsələri yazılmış vəsiyyət, Qarabağ problemi, Xəzərin statusu və s. ilaxır – hər şeydə rus barmağı var ki, Azərbaycanın dünyaya açılmasına imkan vermir.
Baş verən hadisələrin fonunda hakim partiya erkən seçki hazırlıqlarına başlayıb. YAP 11 təşkilat sədrini dəyişməklə ismarıc vermiş olub. Əslində, erkən seçki hazırlıqları beynəlxalq auditoriyaya hesablanmış addımlardır.
İqtidar ölkəyə qarşı kampaniya aparan və mesajlar verən bəzi dairələrə cavab verməyə çalışır. Həmçinin, 2018-ci ildə prezident seçkiləri olmayacaq deyənlərin mülahizələrinə birdəfəlik son qoyuldu. Deməli, gələn il seçki olacaq və 7 illik prezident seçiləcək.
Halbuki, bəziləri gələn il prezident seçkilərinin təxirə salınacağını və 2020-ci ildə keçiriləcəyini bildirmişdi. Onlardan biri keçmiş deputat İqbal Ağazadə idi.
Göründüyü kimi, hakimiyyət həm hazırlığa başlayıb, həm iddialara son qoyur. Üstəlik, Abbas Abbasov qruplaşmasının yenidən seçkilərdə iştirak edəcəyi haqda söz-söhbətə də YAP bu hazırlıqlla cavab vermiş oldu.
Artıq Yeni Azərbaycan Partiyasının (YAP) 63 rayon və şəhər təşkilatında hesabat-seçki konfransları keçirilib.
“Gündəm Xəbər”in verdiyi məlumata görə, Rusiyanın təzyiqləri Qarabağ münaqişəsində də hiss olunur.
Prezident İlham Əliyevin Cocuq Mərcanlıya büdcədən pul ayırması, tezliklə qəsəbənin salınması, infrastruktur yaradılması erməni cəmiyyətində bir çaşqınlıq yaradırdı.
Odur ki, C.Mərcanıya köç ərəfəsində 2 yaşlı Zəhranı öldürməklə bu vəhşilik törədildi. Heç istisna deyil ki, hadisələrdə rus barmağı da var.
Kremlin dirijor çubuğu ilə idarə olunan Serj hakimiyyətinin Moskvadan gələn təlimat əsasında bu cinayəti törətdiyi inandırıcı versiyadır.
Bütün dünyanın Zəhranın qatillərini lənətlədiyi halda, Rusiya Xarici İşlər Nazirliyinin və Bakıdakı rus səfirliyinin verdiyi bəyanatların soyuqluğu diqqət çəkməyə bilmir. Rusiya tərəfi bir sətir olsun belə ermənilərin bu əməlini pisləmir.
Beləliklə, onsuz da seçkilər ərəfəsində Moskva tərəfindən sağsan-soldan siyasi təzyiqlərlə üzləşən Azərbaycan bu dəfə hərbi şantajla üzləşdi. Beləliklə, 2018 seçkilərinə qədər Kreml Bakıya qarşı bir ekspedisiyaya başlayıb…

Rafiq Qara
"Gündəm Xəbər"