Kremlin seçkiqabağı şantaj ssenarisi - bu hələ jurnaldır!!!

Moskva 2018-ci il prezident seçkiləri ərəfəsində bütün təzyiq və təhdid aparatını səfərbər edib; iqtidar içindəki “5-ci kolon” var gücü ilə çalışır

Millət vəkilləri də ölkədə qarışıqlıq yaratmaq istəyən qüvvələrə işarə verir, Rusiyanın yeni namizədi olacağı gözlənilir

Rusiya Azərbaycanı açıq şəkildə təhdid etməkdədir: sərhəddən məhsullarımız buraxılmır, azərbaycanlılar ölkədən çıxarılmaqla şantaj edilir, Ümumrusiya Azərbaycanlıları Konqresi ləğv olunur, “Milyarderlər ittifaqı” projesinin dirilməsi təhlükəsinin işartıları görünür və bütün bunlar prezident seçkilərinə bir il qalmış yaşanır.

Rus dili və seçki

Bu barədə “Gündəm-Xəbər”in verdiyi xəbərə görə, son günlər bu faktların üzərinə 5-ci kolonun fəallaşması da gəlib. Söhbət rus dilinin ikinci dövlət dili olması təklifləri, ordudakı ifşa edilmiş casus şəbəkəsinin izinin Rusiyaya gedib çıxmasından gedir.

Deputat Qüdrət Həsənquliyev bildirmişdi ki, bu şəbəkə Rusiyanın işidir. Başqa bir deputat Yevda Abramov isə seçkilərin asan olmayacağını söyləyir.

Onun sözlərinə görə, müəyyən qüvvələr təxribat edə bilər. Bu azmış kimi, Moskva Bakıya açıq şəkildə hədə-qorxu gəlir.

Yüz minlərlə azərbaycanlının iş, qazanc ardınca Rusiyaya üz tutmaq məcburiyyətində qalması milli təhlükəsizlik problemidir. Görün, Rusiya səfiri nə deyir: "Olduqca böyük sayda azərbaycanlı ailələr Rusiyadan gələn gəlirlərlə dolanır”.

Tərcüməsi budur ki, "biz bu köçürmələri dayandırsaq, yaxud həmin azərbaycanlıları geri göndərsək, ölkənizdə hansı vəziyyətin yaranacağını nəzərə alın".

Ölkədə xərçəng kimi yayılıb hər nöqtədə mənzillənmiş ruspərəst qüvvələr 5-ci kolonun fikirlərini sətiraltından yeridirlər.

O baxımdan Moskvanın yeni nəbz yoxlamaları davam etməkdədir. Kreml öyrənmək istəyir ki, Azərbaycanda ictimai rəy ikinci dövlət dilinin rus olmasını necə qarşılayır.

2018-ci il prezident seçkiləri ərəfəsində Moskvanın aktivləşməsi Azərbaycanda dövlətçilik maraqlarından çıxış edən müxalifət partiyalarından tutmuş millətçilərə qədər hamısını bir çətir altında toplaşıb 5-ci kolona qarşı dirəniş göstərməyi aktuallaşdırır.

Lakin hazırda Azərbaycana qarşı qurulan ssenariləri, təzyiq planlarını birlikdə poza bilərik. Bu günə kimi də hakimiyyət Moskvadan gələn planları vaxtında pozmağa nail olub.

Amma 2018 əvvəlki dövrlərdən çox fərqlənəcək. Bu dəfə Rusiyanın daha güclü təzyiqlərinin olacağı şəksizdir.

ÜAK və parlamentdə ruspərəstlər

“Gündəm-Xəbər”in verdiyi xəbərə görə, deputat Qüdrət Həsənquliyevin strateq.az-a müsahibəsində səsləndirdiyi fikirlər də məhz bu təxribatların ola biləcəyinə işarədir.

Məsələn, Q.Həsənquliyev açıqca deyir ki, bəzi məmurlar İ.Əliyevdən yox, bağlı olduqlarını ölkələrdən qorxurlar.

Deputat hesab edir ki, ilk növbədə, məmur korpusu ciddi nəzarətə götürülməli və qısa müddətə hakimiyyət komandasında təmizlənmə aparılmalıdır.

Hətta hakimiyyətin içindəki anti-Rusiya qanadı ritorikanı o dərəcədə gücləndirib ki, “5-ci kolon”un parlamentdə üzvlərinin olduğuna işarə verir.

Yeni Azərbaycan Partiyasının rəsmi qəzeti olan “Yeni Azərbaycan” qəzetində deputat Vahid Əhmədovun təklənməsi, ona olmazın ittihamların irəli sürülməsi, hakim partiyanın deputatı Siyavuş Novruzovun tələm-tələsik müsahibəsində “bəzi iqtisadçı deputatlar” ifadəsi, onların anti-Azərbaycan fəaliyyətində olduğunu deməsi sıradan bir proses deyil.

Rusiyanın Azərbaycanı sıxışdırmasının əsl səbəblərindən biri “AzərRos” təşkilatının fəaliyyətini gücləndirməkdir. Putin administrasiyası ÜAK-ın yerinə “AzərRos”un fəaliyyət göstərməsini arzulayır.

Söyün Sadıqov da müsahibəsində bu faktoru qeyd etmişdi. Onun sözlərinə görə, Moskva öz təşkilatını yaratmaq istəyir. Ancaq Abbas Abbasovun Rusiyada nüfuzu qalmayıb və belə görünür ki, təşkilatın başına Putinin öz istədiyi adam gətiriləcək.

Bundan başqa, Kreml Rusiyadan yan keçən TAP, TANAP, Bakı-Tiflis-Qars layihələrindən narazıdır. Buna görə bizi cəzalandırmaq yolunu tutublar. Üstəgəl cəbhə bölgəsindəki artan üstünlüyümüz Kremli narahat edir.

Azərbaycan hakimiyyəti bir müddət yaranacaq soyuqluqdan sonra Rusiya ilə münasibətləri yenidən formasına salacaq. Rəsmi Bakının artıq Moskva ilə siyasətdə böyük təcrübəsi var. Bundan qabaq da dəfələrlə tərəflər arasında gərginlik yaşanıb.

Moskva isə 2013-cü ildə olduğu kimi gələn il də “Milyarderlər ittifaqı”nı fəallaşdıra bilər. ÜAK-ın ləğvinin də bu siyasi ssenarinin tərkib hissəsi olduğu ehtimal edilir.

Moskvanın yeni namizəd axtarışına çıxdığını deyən ilk şəxs heç də sıradan biri olmamışdı. Yəhudi əsilli deputat Yevda Abramov Kremlin ÜAK-ı ləğv etmək məqsədini məhz 2018 projesi ilə əlaqələndirmişdi.

Dumanın adamları olmaq

“Gündəm-Xəbər”in verdiyi xəbərə görə, Rusiya əsas təhlükə mənbəyi olaraq qalmaqdadır. SSRİ-ni bərpa etmək niyyətində olan Rusiya dünyadakı nizamı da qarışdırmağa cəhd göstərir.

Ümumiyyətlə, Rusiyanın Azərbaycandakı təsir imkanları, ölkədəki rusiyapərəstlərin fəaliyyəti hər zaman hiss olunub. İctimaiyyətin tanıdığı şəxslər arasında kimlərin qərbpərəst, kimlərin ruspərəst olduğunu da göstərmək olar.

Azərbaycan bu ölkədə marağı olan qüvvələrin kəşfiyyat poliqonudur və ölkədə güclü şəbəkələşmə prosesi gedir. Digər tərəfdən Azərbaycanın şimal bölgəsində Rusiya meylli qüvvələr var. Yəni, Rusiyanın Azərbaycana təsir imkanları çoxdur.Hakimiyyət referendumdan sonra yürütdüyü siyasətdə Rusiyadan qopmaq ssenarisini da çizib.
Bunun bir yolu da Kremlə bağlı məmurları, deputatları sistemdən kənarlaşdırmaqdır. Növbəti seçkidə həmin deputatları parlamentdə görməyəcəksiniz.

2018 seçkisinə qədər və sonrakı müddətdə də mərhələli şəkildə Moskvapərəst qüvvələr hakimiyyətdən uzaqlaşdırılacaq. Prezident İlham Əliyev və islahatçı komandası Rusiya Dumasını adamı kimi özünü aparanlarla vidalaşmağa hazırlaşır.

Məsələn, 1918-ci ildə Azərbaycan Xalq Cümhuriyyətinin yaradılmasında Rusiyanın böyük rolu olduğunu deyən Milli Məclisin regional məsələlər komitəsinin sədri Arif Rəhimzadənin bu açıqlaması siyasi partiyaların kəskin etirazına səbəb olub.

Ondan əvvəl Araz Əlizadə və başqalarının da çıxışlarında Rusiyanın xoşuna gəlmək meyilliliyi hiss olunub.

BAXCP sədrinin müavini, QHT sədri Niyaməddin Orduxanlı bildirib ki, kənardan elə bir təəssürat yaranır ki, Arif Rəhimzadə Milli Məclisin deyil, Rusiya Dövlət Dumasının deputatıdır.

Hakimiyyət ruspərəst qüvvələrə güvənmir. Onlar “5-ci kolon”un üzvü kimi istənilən an Azərbaycan dövlətinə arxa çevirə bilər.

Azərbaycanda seçkilər yaxınlaşır. Keçən dəfə, 2013-cü ildə keçirilən seçkilərdən öncə Rüstəm İbrahimbəyov Azərbaycana göndərilmişdi.

Lapşin, Şahin və Limonov

“Gündəm-Xəbər”in verdiyi xəbərə görə, deputat Siyavuş Novruzov da belə qüvvələrin Milli Məclisdə olduğunu qeyd etmişdi.

YAP-ın deputatının hakimiyyətin içindən bu qüvvələrin çıxdığını deməsi hansısa siyasi ssenaridən xəbər verir. Bəzi ekspertlər isə hesab edir ki, Moskva Belarusu və Azərbaycanı Lapşin məsələsində görə, hansısa şəkildə cəzalandırmağa çalışa bilər.

İddialara görə, məhz Aleksandr Lapşinin Bakıya ekstradisiyasından az sonra-fevralın 13-də 200 nəfərə yaxın azərbaycanlının Dərbənddə saxlanması, Şahin Mirzəyev adlı Azərbaycan vətəndaşının Ermənistana keçməsi xüsusi təşkil edilmiş addımlardır.

Üstəlik, Rusiyanın ölkəmizdə səfiri V.Doroxin verdiyi müsahibədə bir sıra məsələlər barədə Rusiyanın siyasətini ortaya qoyub.

İlk əvvəl o, Rusiya-Azərbaycan münasibətlərini dəyərləndirərək, orada yaşayan azərbaycanlıların ölkəmizə vəsait göndərməsini və Azərbaycan üçün Rusiyanı qeyri-neft sektoru üçün başlıca sahə olduğunu qeyd etdi.

Səfirin bu açıqlaması, Azərbaycanla Rusiya arasında yaranan soyuq münasibətlər fonunda Azərbaycanı iqtisadi təhdid etmək deməkdir. Səfir Rusiyanı Azərbaycan üçün qeyri-neft sektorunda əsas gəlir mənbəyi kimi göstərir.

Bu azmış kimi, yazıçı Eduard Limonovun Gülüstan kəndinə gətirilməsi də təsadüf ola bilməz. Nə oldu, Dağlıq Qarabağın yaşayış olan kəndlərinə deyil, Qarabağ ərazisi olan, amma keçmiş Dağlıq Qarabağ Muxtar Vilayətinə heç vaxt aidiyyəti olmayan Ağcakəndin yaşayış olmayan Gülüstan kəndinə gətirdilər, “hörmətli qonağı”?

Məqsəd 1813-cü il Gülüstan müqaviləsini yada salmaq , Qarabağ xanlığının Rusiya imperiyasının tərkibinə keçməsi faktını təkrarlayıb, demək ki, “bizim buralara iddiamız Kuril adalarına iddiamızdan artıqdır” və əlavə olaraq “Gülüstan kəndi azad olunmağını gözləyir” xatırlatmaqdır.

Rusiyanın təzyiqi hər zaman var, sadəcə olaraq, bunun azalan və yüksələn dövrləri olur və hər dəfə prezident seçkiləri öncəsi Azərbaycana təzyiq etməsi, tələblər irəli sürməsi də yenilik deyil.

Amma, 2018-ci il seçkiləri ərəfəsində Rusiyanın təzyiqi hələ başlamayıb. Görünənlərsə jurnaldır, kino - təzyiq qarşıdadır.

Bu müxtəlif formalarda özünü göstərəcək. Konkret namizədin simasında təzyiqə hələ vaxt var. “5-ci kolon” həm cəmiyyətdə, həm də hakimiyyətin içindədir.

Bütün bunların hər biri Kreml təhlükəsinin daima başımız üzərində bir qara bulud olduğuna deməyə dəlalət edir.

Rusiya, Pyotrun vərəsələri yazılmış vəsiyyət, Qarabağ problemi, Xəzərin statusu və s. ilaxır - hər şeydə rus barmağı var ki, Azərbaycanın dünyaya açılmasına imkan vermir.

Rafiq Qara