Ölkədə işsizlik olmadığını, şəffaf işlədiklərini deyən ƏƏSMN rəhbərinin daha iki əməkdaşı rüşvətlə yaxalandı - Özəl təfsilat
Azərbaycanda özünü islahatçı kimi təqdim edən və təyin olunduğu tarixdən cəmi 100 gün sonra bu imici sabun köpüyünə çevrilən nazirlərdən biri də Səlim Müslümovdur.

Elektron korrupsiya və “islahatçı” nazir

“Gündəm-Xəbər”in verdiyi məlumata görə, Füzuli Ələkbərovun gedişindən sonra Əmək və Əhalinin Sosial Müdafiəsi Nazirliyi rəhbərliyinə gətirilən Səlim Müslümov reformist reputasiyası formalaşdırmağa çalışırdı.
Amma Dövlət Sosial Müdafiə Fonduna rəhbərlik etdiyi dövrdən ictimaiyyətin çox yaxşı tanıdığı sosial sektor məmuru nazir vəzifəsinə yüksəlişindən sonra heç də gözləntiləri doğrultmadı.
Hətta belə demək olarsa, F.Ələkbərovdan sonra S.Müslümovun bu posta gəlişi sosial sahədə vəziyyəti mürəkkəbləşdirdi.
İndi aztəminatlı ailələrin, yoxsul və işsiz zümrənin sosial müavinətlər, işsizliyə görə müavinət, əlillik dərəcəsi, pensiya almaq və s. hüquqları o dərəcədə məhdudlaşdırılıb ki, müraciət etməyin özü əbəsdir.
Çünki nazirliyin elektron müraciət sisteminə keçidi vətəndaşların sosial yardımlar almaq imkanlarını əlçatmaz edib.
S.Müslümovun gətirdiyi bu idarəetmə metodu islahat və şəffaflıq kimi təqdim olunmasına baxmayaraq, kökündə vətəndaşların işini qəlizləşdirmək, yardıma həqiqi ehtiyacı olanları cəncəl prosedura ilə üz-üzə qoymaq dayanır.
Nəticə etibarı ilə elektron korrupsiya sistemi ƏƏSMN-də “islahat”ların simvoluna çevrilib.
Məsələn, aparılan islahatların mayasında korrupsiya hallarına son qoyma faktoru dayansa da VTEK sədrləri bu "dərdlərinə” də çarə tapa biliblər. Belə ki, VTEK sədrlərinin qurduğu oyun olduqca hiyləgər və düşünlümüş şəkilə reallaşdırılır.
Ən ağır xəstələr aylarla öz əlillik dərəcələrini ala bilmirlər. Elektron formada daxil olan müraciətlər müxtəlif VTEK sədrləri arasında bölünür.
Sonucda sədrlərin öz aralarında ŞİFRƏLİ SÖVDƏLƏŞMƏLİ nətiəsində əsl xəstələr kənarda qalır. 3000 manat və daha çox vəsait ödəyən sağlam vətəndaşlar isə I, II, III dərəcli əlil statusunu almağa müvəffəq olurlar.
Belə ki, VTEK sədrləri "xəstəni” pul gücunə qəbul etdikdən sonra bir-biriləri ilə telefonla əlaqə saxlayaraq şifrəli sözlərlə "xəstələrinə” müxtəlif əlillik dərəcələrini "satırlar”.

Sosial müavinətin elektron bazarı

“Gündəm-Xəbər”in verdiyi məlumata görə, VTEK-lə bərabər sosial yardım bazarında da elektron alver getməkdədir. Məlum olan odur ki, bu sistemdən rüşvət aradan qaldırılmayıb sadəcə alınması forması dəyişdirilərək mərkəzləşdirilib.
İndi bu sahədə rüşvət mexanizmi belə işləyir: rayon Əhalinin Sosial Müdafiəsi Mərkəzinin işçiləri pul ala bildikləri insanların siyahısını Nazirliyə təqdim edir.
Nazirlikdə Səlim Müslümovun sevimli və sehrli VEMTAS mexanizmi ilə məşğul olanlar Nazirliyin aparat rəhbəri, topdağıtmaz Əjdər Cəbiyevin nəzarəti altında həmin insanlara yardım təyin edirlər.
Ünvanlı sosial yardımın yeni qaydalarında əks olunan şərtlər bütövlükdə kasıb insanların əleyhinə olmaqla, onlara yardım almaq üçün şans yeri qoymur.
Məsələn, qaydalara görə ailənin əmək qabiliyyətli üzvü məşğulluq orqanlarında ona təklif olunan 2 münasib işdən imtina etdiyi halda həmin ailəyə ünvanlı sosial yardımın verilməsinə imtina olunur.
Amma qaydalarda yazılmayıb ki, ailənin əmək qabiliyyətli üzvü məşğulluq orqanına müraciət etsə və məşğulluq orqanı ona iş təklif edə bilməsə o halda həmin ailə yardım ala bilər ya yox. Ünvanlı sosial yardımla bağlı ən vacib məsələ bundan ibarətdir.
Aztəminatlı ailənin əmək qabiliyyətli üzvü iş üçün məşğulluq orqanlarına müraciət edir, işlə təmin olunmur (ən yaxşı halda iş axtaran kimi qeydiyyata alınır) və həmin ailəyə ünvanlı sosial yardımın verilməsinə də imtina olunur.
İmtinanın səbəbi kimi ailənin əmək qabiliyyətli üzvünün işləməməsi göstərilir. Bu qədər absurd bir qərar.
Digər bir misal. 2 uşaq və valideynlərdən ibarət 4 nəfərlik ailədə əgər ancaq ata işləyirsə, ailədə balaca uşağın 8 yaşı tamam olubsa, ana işləmirsə, o halda həmin ailəyə yardım verilmir.
8 yaşlı uşağın anası əmək qabiliyyətli sayılır. Amma bu hal yardımın təyin olunması qaydalarında öz əksini tapmayıb.

Nazirin 2 işçisi həbs edildi - Adlar

“Gündəm-Xəbər” yazır ki, Baş prokuror yanında Korrupsiyaya Qarşı Mübarizə Baş İdarəsinin əməkdaşları Əmək və Əhalinin Sosial Müdafiəsi Nazirliyinin (ƏƏSMN) Suraxanı və Xətai rayon şöbələrində əməliyyat keçirib.
Məlumata görə sentyabrın 15-də baş tutan əməliyyat zamanı ƏƏSMN-in Suraxanı şöbəsinin Ziya, Xətai şöbəsinin isə Mətin adlı əməkdaşı saxlanılıblar. Hər iki şəxsin üzərindən çoxsaylı təqaüd kartları götürülüb.
Bildirilir ki, ƏƏSMN əməkdaşları həmin kartlardan istifadə etməklə əhalinin aztəminatlı təbəqəsinə aid vətəndaşların adına açılan, dövlət büdcəsindən sosial yardım şəklində onlara ödənən vəsaitləri hesablardan çıxaran zaman ələ keçiblər.
Hər iki şəxsin iş yerində, evində axtarış aparılıb. Evlərindən iş üçün əhəmiyyət kəsb edən çoxsaylı idarə sənədləri, saxta möhürlər aşkar olunaraq götürülüb. Faktla bağlı araşdırma aparılır.
Bu yeni və isti-isti gələn xəbər deməyə əsas verir ki, S.Müslümovun elektron idarəetmə mexanizmi də rüşvətin kökünü kəsməyib. Hələ də ƏƏSMN-nin şöbələrində rüşvət halları var. Deməli, aparılan islahatlar kosmetik və imitasiya xarakteri daşıyır.
Bu müddət ərzində əhalinin sosial müdafiəsi istiqamətində görülən işlərin müsbət və mənfisini bir tərəziyə qoyduqda hələ də neqativ hallar tərəzini əyməkdədir.
Çünki rüşvət, süründürməçilik, bürokratik əngəl, vətəndaşların incidilməsi, şəhid ailələrinin, əlillərin ayrı-ayrı vaxtlarda aksiyaları və s. hallar davam etməkdədir.
Bu da öz növbəsində bu nazirliyin səlahiyyətlərinin məhdudlaşdırılıb ASAN Xidmətə verilməsini şərtləndirir.
Bütün bu həyasız sistemin və nazirliyin şikəst idarəetmə forması azmış kimi S.Müslümov bu yaxınlarda verdiyi absurd açıqlama ilə ictimaiyyəti qıcıqlandırıb.
“Azərbaycan son illərdə yüksək inkişaf göstəricilərinə görə dünyanın lider ölkələri sırasında durur. Ölkədə 5 faizlik işsizlik səviyyəsi müşahidə olunur. Bu, böyük nailiyyətdir”.
Bakıda keçirilən “Formal məşğulluq sosial hüquqların reallaşdırılması şərti kimi” adlı konfransda əmək və əhalinin sosial müdafiəsi naziri Səlim Müslümov deyib.
Nazir vurğulayıb ki, məşğulluğun təmin olunmasında özünəməşğulluq xüsusi rol oynayır: “Son illərdə əhalinin məşğulluq strukturunda dəyişikliklər baş verib.
2016-cı ilin sonuna olan statikaya əsasən, əmək müqaviləsi ilə işləyənlər məşğul əhalinin 32 faizini təşkil edib. Son dövrlərdə əmək bazarında qeydiyyatsız işləyənlərin sayı çoxalıb.

Dayı-bacıoğlu tandemi: tayfa qaydaları

“Gündəm-Xəbər” onu da yada salır ki, S.Müslümov qubernatora çevrilmiş nazirdir. O, illərdir Ağsuya qeyri-rəsmi kuratorluq edir. Artıq özü 56 yaşa çatan nazirin qocaman dayısı hələ də Ağsunun icra hakimi vəzifəsini daşıyır.
İdarəetmə sistemində kadrların cavanlaşdırılması siyasəti nədənsə Ağsuya gəlib çıxmayıb. 67 yaşlı Ənvər Seyidəliyevin yerinə bir gənc, perspektivli kadr təyin olunmur ki, Ağsu camaatı da gləcəyə ümidlə baxsın.
Rayon camaatına “qan qusduran”, sahibkarlığa “divan tutan”, rayonun resurslarını və büdcədən ayrılan vəsaitlərini çırpışdıran, ayrı-ayrı vəzifələrə, idarələrdə postlara öz qohum-əqrəbasını yerləşdirən dayı-bacıoğlu “tandemi” bu səfalı rayonu uçuruma sürükləyib.
Səlim Müslümovun digər dayısı və icra başçısı Ənvər Seyidəliyevin doğma qardaşı Fətulla Seyidəliyev “Kapitalbank”ın Ağsu filialının müdiri, S.Müslümovun bibisinin əri Ağsu rayon Əmək və Əhalinin Sosial Müdafiəsi Mərkəzinin direktorudur.
Rayon maliyyə şöbəsinin müdiri Radim Müslümov isə S.Müslümovun doğma qardaşı, icra başçısı Ənvər Seyidəliyevin qardaşı, yəni nazirin digər dayısı Fazil Seyidəliyev rayon polis şöbəsində rəis müavinidir.
Bildirilir ki, Səlim Müslümov nazir təyin olunana qədər rayon əhalisinin müəyyən şikayətləri dinlənilir, bəzi insanlara qismən də olsa, köməklik olunurdu.
Amma indi nazirin dayısı, Ağsu rayon İcra Hakimiyyətinin başçısı Ənvər Seyidəliyev sakinlərə qarşı daha aqressiv olub.
Səlim Müslümov nazir təyin olunana qədər Ənvər Seyidəliyev hər həftənin 5-ci günü sakinləri qəbul edirdi. Qəbulda müəyyən problemlər müzakirə edilirdi, əksəriyyəti həllini tapırdı.
Amma Səlim Müslümov nazir təyin olunandan sonra Ənvər Seyidəliyev problemi olanların heç birini qəbul etmir.
Düzdür, yenə də həmin günlər qəbul günü olur, amma həqiqi problemi olanlar qəbul olunmur. Ənvər Seyidəliyev İcra Hakimiyyətinin mühafizə xidmətinə tapşırıb ki, ciddi problemləri olan şəxsləri qəbula yazmasın.
Hazırda Ağsu rayonu büsbütün icra başçısına məxsusdur. Rayonda bütün iri ticarət obyektləri Ənvər Seyidəliyev tərəfindən zəbt edilib. Ənvər Seyidəliyev bu işdə müavinləri və köməkçilərinin adından yararlanır.
Rayonda hazırda 50-dən artıq obyekt icra başçısının müavinlərinin adı ilə tikilərək özəlləşdirilib.
İcra başçısının rayon ərazisində 100 hektarlarla həyətyanı torpaq sahəsi, onlarla balıqartırma gölü və 100-dən artıq iri ticarət cərgəsi var.
Bütün bu ərazi və obyektlər icra başçısı tərəfindən özəlləşdirilib. Bütün bu iddialara və ittihamlara cavab olaraq adı keçən bütün tərəflərin mövqeyini dinləməyə, dərc etməyə hazırıq.

Zöhrab Təmrazov
gundemxeber.az