Hakimiyyət kütləvi mitinqlərin, iğtişaş xarakterli hadisələrin qarşısını almaq üçün hazırlıqlara başlayıb, yeni xüsusi dəstələr yaradılıb, müasir silahlar alınıb; təfərrüatları özəl olaraq “Gündəm-xəbər”də...

“Azərbaycan hakimiyyəti seçki günləri, yəni oktyabrın 15-i və 16-sı ölkədə baş verə biləcək kütləvi mitinqlərə, iğtişaş xarakterli hadisələrə və toqquşmalara görə hazırlıqlara start verib. İqtidarın xüsusi xidmət, hüquq-mühafizə orqanları döyüş hazırlığı vəziyyətinə gətirilib. Hətta bununla bağlı Daxili Qoşunlarda “Mexa” adlı xüsusi təyinatlı yeni bir dəstə yaradılıb.
Bu dəstə etirazçıların səsini boğmaq, mitinqlərin dağıdılmasında fəal iştirak etmək, xaricdən gətirilən yeni silahlardan istifadə etmək təlimatını alıb. Müdafiə Nazirliyi son bir ildə İsraildən bahalı silahlar alıb, texnologiya müasirləşdirilib, nümayişlərin dağıdılması üçün xüsusi aparatlar idxal edilib. “Əsgər qətllərinə son” şüarı ilə keçirilən mitinqlərdə əldə olunan sözügedən silahlardan istifadə olunmasa da, nəzəri olaraq hazırlıq görülmüşdü. Eyni silahların cüzi hissəsindən İsmayıllı, “Binə” və Quba üsyanlarının yatızdırılmasından istifadə olunub”.
Bu haqda “Gündəm-xəbər”ə özəl qaynaqlardan sızan məlumatda iddia olunur ki, hakimiyyət seçki günü və ertəsi günü ölkədə 2003-cü il hadisələrinin təkrarlanmasının qarşısını almaq üçün xüsusi hazırlıq görür. Saray daxilində bununla bağlı ən yuxarı eşelonda müzakirələr aparılıb, qətiyyətli qərarlar qəbul edilib.
İlkin razılaşmalara görə, mitinqlərdə iştirakçıların kəmiyyətinə diqqət yetiriləcək. Əgər etirazçıların sayı həddindən artıq, qarşısı alınmaz və dalğavari xarakter alarsa xalqın üzərinə bu qüvvələrin yeridilməsi, xaricdən alınan silahlardan istifadə olunması nəzərdə tutulub. Məlumatlı qaynağımız iddia edir ki, kütləvilik genişmiqyaslı səciyyə daşımasa Çevik Polis Alayının (ÇPA) və Daxili Qoşunların müəyyən heyəti ilə etirazlar dağıdılacaq, hətta etirazların davam etməsinə şərait yaradılacaq. İmitasiya xarakterli bu şəraitlə məqsəd əsgər ölümünə etirazlarda olduğu kimi cəmiyyətin enerjisini boşaltmaq, insanları yorub sakitləşdirmək olacaq.
Mənbə qeyd edir ki, “Mexa” dəstəsindən İsmayıllı üsyanının yatızdırılmasında istifadə olunub. “Azərbaycan hökuməti bu günə qədər hazırlıqsız vəziyyətdə idi. Hakimiyyətin nümayişləri zorla və yeni texnologiya ilə yatırtmaq imkanları köhnəlmişdi. Son aylar xaricdən alınan silahlar, yeni təlimlər, “Binə” və İsmayıllı üsyanlarında toplanan təcrübə imkanları xeyli dərəcədə genişləndirib.
İsmayıllı hadisələri vaxtı Bakıda bir nəfər də olsun daxili qoşunların qüvvəsi qalmamışdı. Hakimiyyət inanılmaz dərəcədə narahat və həyəcanlı idi. Ona görə də olan-qalan bütün qüvvə rayona yeridilmişdi. Əgər həmin saatlarda Bakıda etirazlar başlasaydı iqtidar bunun qarşısını ala bilməyəcəkdi. Səbəb dediyimiz kimi Bakıda kimsənin qalmaması idi.
Üstəlik, İsmayıllıdan proseslər digər əyalətlərə sıçrasaydı hökumət bir neçə saat ərzində diz çökərdi. Odur ki, bütün bunlar hazırlıqlara yenidən baxmağa rəvac verib. Özlərini 16 oktyabra hazırlayıblar,”- deyə mənbə vurğulayır. Həmin gün ölkədə fors-major vəziyyətin yara biləcəyini istisna etməyən qaynağımız bildirir ki, toqquşmalar, qarşıdurmalar gözləniləndir və iqtidar bu faktoru da ciddi şəkildə nəzərə alıb. Mənbəmiz sonda onu da əlavə edir ki, Milli Şuranın yaranması, Rusiyadan gələn təhdidlər, provokasiya xarakterli bəyanatlar bu hazırlıqları sürətləndirib.

Mirzə