Bələdiyyə sədrlərinin “ov”una başlanır; Komitə sədri bələdiyyələri torpaq satmaqda ittiham edib; Antikorrupsiya tamaşası təzə başlar yeyəcək

“Azərbaycanda bələdiyyələr onlara verilən torpaqları birdəfəlik satmaqla məşğuldurlar”. Bunu jurnalistlərə açıqlamasında Dövlət Torpaq və Xəritəçəkmə Komitəsinin sədri Qərib Məmmədov Azərbaycanda bələdiyyələrə yeni torpaq sahələrinin verilməsi barədə təklifə münasibət bildirərkən deyib.
Onun sözlərinə görə, Azərbaycanda bələdiyyələrə ayrılmış 23,5% torpağın bir qismi vətəndaşlara icarəyə verilib, digər qismi isə satılıb. Yeni torpaqların verilməsinin nəzərdə tutulmadığını deyən Q.Məmmədov bələdiyyələri əldə olan torpaqları satmaqda ittiham edib:
“Yenidən bu torpaqları haradan verməliyik? Buna ehtiyac da yoxdur. Türkiyədə bələdiyyə təsərrüfatları yaradılır. Bizim bələdiyyələr isə torpaq olan kimi onu satırlar, təsərrüfat yaratmaq və artıq gəlir əldə etməyi düşünmürlər. Azərbaycanda torpaqlar məhduddur. Hər adama 0,18 hektar torpaq düşür. İşğal olunmuş ərazilərimizi nəzərə alsaq, hələ bundan da azdır.
Bələdiyyə seçkilərində haqlı olaraq bələdiyyələrin sayı 1718-ə qədər azaldı. Normal bələdiyyələr özləri üçün təsərrüfat yaradaraq, gəlir əldə edir. Bunlar isə torpağı birdəfəlik satır. Əldən çıxdıqdan sonra yenidən torpağı haradan vermək olar? Ona görə də ən yaxşısı əldə olan torpaqlar hesabına bələdiyyə təsərrüfatları yaratmaq və bundan bəhrələnmək lazımdır”.
Ümumiyyətlə, Azərbaycanda bələdiyyələr daha çox torpaq alqı - satqısına görə tanınır. Ancaq «Bələdiyyələr haqqında» qanuna görə, onların fəaliyyəti təkcə bununla bitmir. Qanunvericilikdə göstərilib ki, bələdiyyələr vətəndaşların təşkilinin elə bir sistemidir ki, onlar yerli əhəmiyyətli, sosial, iqtisadi və mədəni məsələləri sərbəst və müstəqil şəkildə həll etməlidirlər.
Məzarlıqlar məsələsi əhalinin ağrılı yerlərindəndir. Torpağın qiyməti get-gedə daha çox bahalaşdığından məzar üçün ayrılan torpaqlar da bahalaşır. Əgər əvvəllər xüsusilə kənd yerlərində məzar yerləri pulsuz idisə, indi belə deyil. Bütün bələdiyyələrdən insanlar narazıdır. Son illər korrupsiyaya qarşı mübarizə çərçivəsində onlarla bələdiyyə sədri həbs olunub. Komitə sədrinin açıqlaması isə göstərir ki, bələdiyyə sədrlərinin həbs dalğası davam edəcək.
Azərbaycan bələdiyyələri palçıq vulkanları ətrafında, altından yüksək gərginlikli elektrik xətləri keçən ərazilərdə də vətəndaşlara torpaq satır, onların bu ərazilərdə yaşayış evləri tikmələrinə icazə verir. Dövlət Xəritəçəkmə və Torpaq Komitəsi, Ekologiya və Təbii Sərvətlər Nazirliyiylə birlikdə aşkar edib ki, ayrı-ayrı bələdiyyələr palçıq vulkanları ətrafında evlərin tikilməsi üçün yüzlərlə sərəncamlar veriblər. Səlahiyyətli orqanlar deyirlər ki, bələdiyyələrin həmin sərəncamları ləğv olunmalı, oradakı evlər də sökülməlidir.
Bələdiyyələrin xüsusilə icra hakimiyyətindən asılı olması haqda fikirlər də cəmiyyətdə özünə yetərincə yer edib. Ekspertlər deyirlər ki, istənilən vaxt icra hakimiyyəti strukturu bələdiyyənin fəaliyyətinə müdaxilə edə bilər. İcra hakimiyyətindən asılı olmayan bələdiyyə sədri yoxdur. Ona görə ki, seçkilər şəffaf keçirilmir.
Həm yerli, həm də beynəlxalq ekspertlərsə deyirlər ki, Azərbaycanda bələdiyyələrin əsl müstəqil, dövlət orqanından asılı olmayan, güclü idarəetmə strukturu olması üçün ilk növbədə azad və şəffaf seçkilər keçirilməlidir. Bələdiyyənin büdcəsi indikindən bir neçə qat artıq olmalı, azad sahibkarlıq inkişaf etdirilməli, sahibkarlıqda monopoliya tamamilə ləğv olunmalıdır ki, bələdiyyələr öz ərazilərindəki kiçik iş yerlərini, istehsal sahələrini genişləndirməklə maliyyə imkanlarını artırsınlar.
Korrupsiya, rüşvətlə mübarizə elə aparılmalıdır ki, heç bir bələdiyyə sədri və nümayəndəsi vətəndaşın haqqına əl uzatmağa cəsarət etməsin. Vətəndaş da bələdiyyəni öz həyəti, məhəlləsi, kəndi, şəhəri bilib onunla sıx, həm də aydın münasibətlər əsasında işləməlidir.
Amma o da reallıqdır ki, bələdiyyə sədrləri özbaşına torpaq satmırlar. Onlar aylıq və illik “hesabat” verir və komitəyə “paket” göndərirlər. Qərib Məmmədovun isə onları ittiham etməsi “gözdən pərdə asmaq”, özünü təmizə çıxarmaq cəhdidir. Ölkədə elə bir sistem formalaşıb ki, aşağılar yuxarıların icazəsi olmadan heç bir qanunsuzluğa yol verə bilməz, rüşvət almazlar. Sadəcə, “günah keçisi” axtarmaq lazım gələndə komitə sədri bələdiyyələri qurban verir. Onun son açıqlaması da sallaqxanaya gedəcək bələdiyyə sədrlərinə bir xəbərdarlıqdır….

Aslan