Siyasi intiriqalar istası, yoxsa yorulmuş məmur?

gundemxeber.az Onu hakimiyyətin ideoloqlarının ən nəhəngi kimi təqdim edirlər. Özünəməxsus xüsusiyyətləri ilə də çox seçilir. Belə ki, yuxarıdan verilən tapşırıqlara punktual yanaşır və hər vəchlə onu yerinə yetirməyə çalışır. O, öhdəsindən gələ bilmədiyi işləri belə dövlət başçısına «həyata keçirdim» kimi qələmə verməyi bacarır. Müxalif düşərgə təmsilçiləri onun barədə : «qəddar adamdır»- deyir. Sadə vətəndaşlar isə fikirləşir ki, Azərbaycanda onu yıxa biləcək qüvvə yoxdur. Götürdüyü hədəfə heç vaxt boş atəş açmayan bu şəxs rəqiblərinin ən zəif tərəflərinə ciddi, ölümcül zərbələr endirmək bacarığına malikdir. Kifayət qədər tədbirlidir və intriqalar meydanında zərgər dəqiqliyi ilə işləyir. Karyerasının toxunulmazlığı üçün kimi istəsən qurban verər. Yəqin ki, söhbətin kimdən getdiyini anladınız - Prezidentin İcra Aparatının rəhbəri Ramiz Mehdiyev.
Heydər Əliyevin hakimiyyətə dönüşündən sonra formalaşdırdığı komandada səlahiyyət sahibi etdiyi şəxslərdən biri də məhz cənab Mehdiyevdir. O, əvvəllər ümumi şöbənin müdiri, sonra isə Prezidentin İcra Aparatının rəhbəri vəzifəsinə təyin olunur. Deyilənə görə, prezident Heydər Əliyevin kritik anlarında etimadı doğrultmayanlardan biri də Ramiz Mehdiyev olub. Onda sual oluna bilər ki, necə ola bilir ki, Heydər Əliyevə etibarlı olmayan adam yüksək posta yiyələnə bilib? Qeyd etmək lazımdır ki, Ramiz Mehdiyev Heydər Əliyevə qarşı aparılan kompaniyalarda birbaşa iştirak etmir, özünü hadisələrə kənardan müşahidəçi qismində göstərirdi. Onun hakim komandada təmsil olunmaq üçün hər cür metodlara əl atdığı da hamıya bəllidir.

Rusiya qəzetindən Ramiz Mehdiyevə şok ittiham

1995-ci ilin oktyabr ayında «Rossiyskiy fermer» qəzetində «Bir dəfə satılmış» adlı məqalədə Ramiz Mehdiyev Heydər Əliyevi satmış şəxs kimi ittiham olunurdu. Qəzet yazırdı: «Vətənin taleyinə biganə qalmayan ziyalılar ağsaqqal sözünə, müdrik məsləhətinə ehtiyac duyurdu. Bu məqsədlə 1992-ci ilin 2-ci yarısında görkəmli ziyalılar o vaxt Naxçıvan Muxtar respublikası Ali Məclisinin sədri işləyən Heydər Əliyevə müraciət qəbul etdilər. Həmin müraciətə Elmlər Akademiyasının bir qrup ziyalısı da imza atmışdı. O vaxtlar həmin müraciətə imza atması üçün Ramiz Mehdiyevə də müraciət etdilər. Ramiz Mehdiyevin cavabı bu oldu: «Mən Əliyevlərlə çoxdan qurtarmışam. Sizə də bu işləri məsləhət görmürəm. O, siyasi meyitdir. Dirilməsi mümkün deyil. Bu işdən ümumiyyətlə əl götürün».
Doğrusu Rusiya qəzetində Ramiz Mehdiyev haqqında yazılanlara şərh vermək istəməzdik. Çünki həmin məqalənin davamında Rusiya qəzeti Ramiz Mehdiyevə daha böyük ittihamlar edir və bizlər bu ittihamların nə qədər doğru olub olmamasını deyə bilmərik. Sadəcə 1995-ci ilin oktyabr ayında Rusiyada nəşr olunan «Rossiyskiy fermer» qəzetndə Ramiz Mehdiyevə ithaf olunmuş məqaləni onu oxumayanların nəzərinə çatdırırıq. Adı çəkilən qəzet daha sonra yazır: «Ramiz Mehdiyev Ayaz Mütəllibova yollar axtarmaq üçün bütün vasitələrə əl atıb.»

R.Mehdiyev H.Əliyevin qəbuluna niyə getmədi?

Bu gün çoxları R.Mehdiyevi siyasi həyatda çox da müdaxilə etməyən, yalnız sırf idarəçiliklə məşğul olan məmur kimi tanıyır, YAP-a qədərki dövrdə onun digər partiyanın yaradıcısı olmasını bəlkə də ağıllarına belə gətirmirlər. Ancaq hadisələr son 5-6 ildə cərəyan etdiyindən onun bu fəaliyyətini bilməmək, unutmaq mümkün deyil. O günlərin canlı şahidləri indi də siyasi həyatdadırlar. Azərbaycan Kommunist Partiyasının sədri Ramiz Əhmədovun xatirələrində bununla bağlı maraqlı məlumatlar var:
- Ramiz Mehdiyev təşkilat konfransı 1993-cü ilin əvvəllərində keçirilən Azərbaycan Sosial Ədalət Partiyasının yaradıcısıdır. Sol siyasi orientasiya götürən bu partiyanın təşkilində mən də ona kömək etmişəm. Lakin bununla paralel mən Kommunist Partiyasının bərpası ilə məşğul idim. Buna görə də bizim yollarımız tezliklə ayrıldı. 1993-cü ilin noyabrında AKP-nin bərpa-təsis qurultayı keçirildi, bundan sonra Sosial Ədalət Partiyasının üzvlərinin əksəriyyəti AKP-yə keçdi və o partiya daha fəaliyyət gösətərə bilmədi.
AKP-nin sədri R.Mehdiyevə H.Əliyevlə görüşməyi, onu Bakıya dəvət etməyi tövsiyyə edib: «R.Mehdiyevə H.Əliyevlə görüşüb bəzi məsələləri onunla məsləhətləşməyi, razılıq verərsə onun rəhbərliyi altında vahid xalq partiyası yaratmağı məsləhət gördüm. Ramiz Mehdiyev isə mənimlə razılaşdı. Lakin o, nədənsə Naxçıvana gedib H. Əliyevlə görüşməyi dəfələrlə təxirə saldı...» Nəzərə alaq ki,həmin dövrdə hakimiyyətdə AXC idi.
1990-cı ildə İgidliyə görə medalı ilə təltif olunan Hacı Məmmədovun hesabına Qarabulağı tanımayan yoxdur. Bu medal da həmin ildə yaranıb və ilk olaraq Hacı Məmmədova verilib. Qarabulaqda çox izlər açılıb,açılmamış qalanlar da var. Məsələn, bir-birinin yanında inşa edilmiş villalar. Onları müxtəlif şəxslərin adlarına çıxırlar. Bu villalardan birinin Ramiz Mehdiyevin olması söylənilsə də, bizlər buna inanmırıq. Çünki onun belə cinayət ocağında villaya ehtiyacı yoxdur. Xatırladaq ki, R.Mehdiyevin Bakı ətrafında və ya Xəzər dənizinin sahilində yerləşən kəndlərdə gözəl imarətləri çoxdur.

Mehdiyevin səlahiyyətləri və...

Bizlər əgər Ramiz müəllimin 1997-ci ilə qədərki mövqelərinə nəzər salsaq, gərərik ki, onun haqqında sadə bir təqdimat vermək kifayətdir. Hakim dairədən ötürülən məlumatlara əsasən yazılan və ictimayyət arasında gəzən söz-söhbətlər onu deməyə əsas verir ki, indi iqtidarda onun sözünün qarşısında bir kimsə qalıbsa,o da prezidentdir. Ramiz Mehdiyev Azərbaycanda prezidentdən başqa heç kimə tabə olmur, geç kimə hesabat vermir, çoxlarından isə bunu tələb edir. Onun portret cizgilərini yaratmaq zahirən asan görünsə də, kifayət qədər çətindir. Azərbaycandakı bütün vəzifə sahibləri həm vəzifəyə təyin olunanda, həm də vəzifədən çıxarılanda onun qılıncının altından keçir. Akademik Mehdiyev çox danışmağı da sevmir. Ziddiyyətli mülahizələri, siyasi mövqeydə yerdəyişmələri, indiki və keçmiş hakimiyyətdə, dünənki və bugünkü münasibətlərdə fərqli meylləri, ziddiyyətləri də çoxlarına məlumdur. Özünə arxayınlığı ifrat dərəcədədir. Lakin bu arxayınlıq son zamanlar deyəsən fiaskoya uğrayır. Əgər xatırlayırsınızsa, Heydər Əliyev Mərkəzinə Ramiz Mehdiyevin gedəcəyi gözlənilirdi. Lakin gözlənilənlərin əksi oldu. Yorulmuş məmurun yerinə gənc kadr gətirildi. Deyilənə görə, daxili narahatçılıq son zamanlar onu qarabaqara izləyir. Məmurlar arasında onun üzünə gülüb, sevməyənlər də çoxluq təşkil edir. Mənbə Ramiz Mehdiyevi Tikinti qladeatoru da adlandırır. Deyilənə görə Bəy Mamedin bəylik etməsinə də şəraiti məhz Ramiz Mehdiyev yaradır.

Regionçuluq və...

Azərbaycan cəmiyyəti, xüsusən də onun yüksək təbəqəsi sağalmaz xəstəliyə düçar olub - yerlibazlığa. Bu xəstəliyin sağalma ehtimalı sıfra bərabərdir. Gərək ki, həmin xəstəliyin daşıyıcısı olan məmurlar dezinfeksiya və vaksinikasiya olsunlar. İlk öncə idarələrdə, daha sonra nazirliklərdə və dövlətə məxsus şirkətlərdə özünə yer alan yerlibazlıq sonradan öz simasını dəyişdi. Tibbi xarakteristika versək, adi soyuqdəymə tuperklyoz xəstəliyinə gətirib çıxartdı. İndi hakim dairələrdə Bakı, Naxçıvan, Qərbi Azərbaycan, Şirvan və s. qruplaşmalar arasında narazılıqlar o qədər geniş vüsət alır ki, bu KİV vasitəsilə birinin digərini ittihan etmək səviyyəsinə qədər qalxır. Belə bir vəziyyətdə ilk növbədə yada düşən Prezidentin İcra Aparatının rəhbəri Ramiz Mehdiyevdir. Çünki o, bu komandada çoxdandır və eyni zamanda hakim ideologiyanın baş icraçısıdır. Qruplararsı təbliğat savaşı, birinin digərinə üstün gəlməsindən çox, hakim komandanın mövqeyinə zərbə vurur. Bu səbəbdən də həmin qruplaşma üzvlərinin susdurulması və hakim komandanın monolitliyi üçün vahid ideologiyaya xidmət göstətilməsinə məcbur edilməsi tələb olunur. Bu işi isə ilk növbədə ideologiyanın baş icraçısı həyata keçirməlidir. Lakin qruplararası mübarizəni «bir nağıl» adlandırdı. Görəsən cənab Mehdiyevin o zamanlar bunu nağıl adlandırması nə ilə bağlı idi? Onu tanıyanlar deyirlər ki, hər şeyin qarşısını vaxtında və şərait olanda almağa adətkar olmuş Mehdiyev yalnız iki səbəbdən reallığı nağıl kimi qələmə verə bilərdi. Bunlardan biri budur ki, Mehdiyevin hakimiyyət daxilindəki qruplaşmadan hər hansı birinə gücü çatmır. 2-ci səbəb isə Mehdiyev özünün də belə qalmaqallı vəziyyətin yaranmasında maraqlı olmasıdır. Kim nə deyirsə desin,ramiz Mehdiyev artıq müasir tələblərə cavab verən kadr sayıla bilməz. Çünki o, artıq yorulub, özü də lap çox.
P.S. Bildiyimiz kimi Cənab Mehdiyev korrupsiyaya qarşı mübarizə idarəsinə rəhbərlik edir. Odur ki, ona bir sual ünvanlamaq istəyirəm. Ramiz müəllim, 2005-ci ilin payız ayında yüksək çinli məmurlarımızdan biri uşaq evlərinin birindən 15 yaşlı əlil uşağı götürüb özü ilə Almaniyanın «Charite» klinikasına apararaq, onun orqanını özünə 330 min evroya transplantasiya etdirmiş, Almaniyadan tək qayıtmış, həmin uşağın taleyi mücərrəd qalmışdır. O vaxtdan indiyədək ildə iki dəfə həmin məmur «Charite» klinikasına gedərək trasplantasiya olunmuş orqanın vəziyyətini yoxladır, bunun üçün küllü miqdarda pul xərcləyir. Siz korrupsiyaya qarşı mübarizə aparan bir şəxs kimi həmin məmurun 330 nin evronu haradan almasını araşdıra bilərsinizmi? Bir də, həmin 15 yaşlı oğlan uşağının taleyinin necə olduğunu araşdıra bilərsinizmi? Çünki biz həmin uşağın öldüyünü eşitmişik.

Alim