"Ümid edirik ki, Azərbaycanda prezident seçkiləri ən yüksək beynəlxalq standartlar səviyyəsində keçiriləcək"

Azərbaycan prezidenti İlham Əliyev iyunun 21-də Brüsseldə Avropa Birliyi rəsmilərilə görüşlərə başlayıb.İlk görüş Avropa Birliyi Şurasının prezidenti Herman Van Rompuy ilə keçirilib. Görüşdən sonra onlar jurnalistlərə bildiriblər ki, regional təhlükəsizlik və sabitlik, həmçinin enerji təhlükəsizliyi məsələlərini müzakirə ediblər.
İlham Əliyev çıxışında demokratik inkişaf sahəsində dəstəyə görə Avropa qurumlarına təşəkkür edib. O bildirib ki, Azərbaycan Avropaya mümkün qədər yaxın olmaq istəyir və Şərq Tərəfdaşlığı Proqramının fəal üzvüdür: “Avropaya nə qədər yaxın olsaq, inkişafa daha çox imkanımız olar, o cümlədən demokratik inkişaf üçün. Mən Avropa qurumlarına bu sahədə əməkdaşlığına görə təşəkkür edirəm.
Məncə, demokratiyanın inkişafı, insan haqları sahəsindəki əməkdaşlıq ən yüksək beynəlxalq standartlara uyğun siyasi islahatlar həyata keçirməkdə Azərbaycana kömək edir. Sözsüz ki, sizin bu gün söz açdığınız məsələlər ətrafında da əməkdaşlığı davam etdirəcəyik”.
İlham Əliyev görüşdə regional təhlükəsizlik və sabitlik, münaqişələrin həlli məsələlərini də müzakirə etdiklərini deyərək, Dağlıq Qarabağ münaqişəsi ilə bağlı ATƏT-in Minsk qrupu həmsədrlərinin son bəyanatını yüksək qiymətləndirdklərini və Helsinki prinsiplərinə diqqət çəkilməsindən məmnunluq duyduqlarını deyib. O bildirib ki, Helsinki prinsiplərinə görə, millətlərin öz müqəddəratını təyin etmə hüququ dövlətlərin ərazi bütövlüyü prinsipini pozmamalıdır. “Erməni xalqının artıq Ermənistan dövləti var. Azərbaycan ərazisində erməni xalqının öz müqəddaratını ikinci dəfə təyin etməsi yolverilməzdir.
Azərbaycan münaqişənin beynəlxalq hüququn norma və prinsipləri çərçivəsində tezliklə həllində və BMT-nin bu münaqişə ilə bağlı qəbul etdiyi 4 qətnamənin icrasında maraqlıdır, erməni qüvvələrinin Azərbaycanın beynəlxalq miqyasda tanınmış sərhədlərindən dərhal çıxarılmasını tələb edir” – deyə prezident bildirib.
Enerji təhlükəsizliyi barədə müzakirəyə toxunan İlham Əliyev deyib ki, TANAP layihəsinin elan edilməsi Cənub Qaz Dəhlizinin icrasına əlavə imkanlar açır və yaxınlarda qəbul ediləcək qərarlar bu vacib enerji layihəsinin icrasına gözəl şərait yaradacaq. Layihə həmçinin Avropanın enerji xəritəsini tamamilə dəyişəcək: “Bu, hər tərəf üçün sərfəli vəziyyətdir. Azərbaycan bununla Avropada uzunmüddətli etibarlı qaz bazarı əldə edir. Avropa isə qarşıdakı onillər ərzində Azərbaycandan alternativ qaz mənbəyi əldə edir. Xüsusilə Cənub Qaz Dəhlizi layihəsinin vaxtında icrası sahəsində sıx əməkdaşlıq olduqca həyati əhəmiyyətlidir”.
Avropa Şurasının Prezidenti Herman Van Rompuy isə bildirib ki, Azərbaycan prezidenti ilə regional və beynəlxalq təhlükəsizlik, enerji əmnəkdaşlığı, Azərbaycanda demokratik islahatlar və əsas azadlıqların təmin olunması məsələlərini müzakirə ediblər: “Mən Avropa Birliyi prezidentinin demokratiya və müştərək dəyərlərin, xüsusilə də insan haqları və fundamental azadlıqların təmin olunmasında Azərbaycanla uzunmüddətli assosiasiya razılaşması barədə fikirlərini xatırlatdım. Xüsusilə də qarşıdan gələn prezident seçkisini müzakirə etdik. Ümid edirik ki, 2013-cü ilin sonlarına nəzərdə tutulan prezident seçkisi yüksək standartlara uyğun təşkil ediləcək”.
Herman Van Rompuy əlavə edib ki, Şərq Tərəfdaşlığı proqramının icrasında daha çox uğurlar görmək istədiklərini diqqətə çatdırıb: "Mən Avropa Birliyinin Cənubi Qafqazda sabitliyin Qarabağ münaqişəsinin ədalətli həlli olmadan mümkün olmadığını qeyd etdim. Biz bu münaqişənin həllinə dair ATƏT-in Minsk Qrupunun həyata keçirdiyi vasitəçilik missiyasına dəstəyimizi davam etdiririk. Mən Minsk Qrupu ölkələri prezidentlərinin bu həftənin əvvəlində Qarabağ münaqişəsinə dair birgə bəyanatlarına dəstəyimi ifadə etdim".
Avropa Birliyi Şurasının prezidenti deyib ki, Avropanın qaz təchizatına dair Cənub Qaz Dəhlizi layihəsinin icrasını da müzakirə ediblər. Onun fikrincə, Avropa Birliyi ilə Bakı enerji sahəsində əməkdaşlıqda indiyə qədər xeyli uğurlar əldə edib, amma görüləsi işlər də hələ çoxdur.
Ilham Əliyevin sonrakı görüşü Avropa Komissiyasının prezidenti Joze Manuel Barrozo ilə olub. Görüşdən sonra onlar birgə brifinq keçirib. İlham Əliyev deyib ki, Avropa Komissiyasına Azərbaycanın demokratik inkişafında , insan haqlarını qorumaqda , siyasi islahatlarda göstərdiyi köməyə, həm siyasi, həm də iqtisadi islahatlara dəstəyə görə minnətdardır.
Barrozo isə İlham Əliyevlə “Çox açıq və dostcasına” müzakirə apardığını bildirib. O, müzakirə olunan məsələləri də qısaca sadalayıb. “Azərbaycan bizim üçün çox mühüm və etibarlı tərəfdaşdır. Biz enerji məsələsini müzakirə etdik. Biz Cənub Qaz Dəhlizi layihəsində 2011-ci ildən bəri böyük tərəqqi əldə etmişik. Qaz kəməri ilk olaraq ildə Avropaya 10 milyard kub metr qaz gətirəcək. Bu, Avropada qazın miqdarına, qiymətlərinə, iqtisadi inkişafa töhfəsini verəcək.
Ümid edirik ki, Azərbaycanda prezident seçkiləri ən yüksək beynəlxalq standartlar səviyyəsində keçiriləcək. Azadlıqlar, güclü vətəndaş cəmiyyəti uzunmüddətli rifahın zəminidir”.

“Siyasət şöbəsi”