Demokratik Azərbaycan Dünyası Partiyasından M.Əliyevanın namizədliyinin dəstəklənməsi barədə məsələyə münasibət bildirilib. Partiyanın sədr müavini Sevda Xurşudova virtualaz.org-a açıqlamasında deyib ki, DADP 8-9 illik fəaliyyətində Mehriban Əliyevanın namizədliyini həmişə dəstəkləyib: “Hər partiyanın öz lideri olduğu kimi bizim də namizədimiz Mehriban xanım Əliyevadır. Partiyamızın qurultayı keçiriləcək və Mehriban xanımın namizədliyi irəli sürüləcək. Prezident seçkiləri ərəfəsində işlərimizi bu istiqamətdə davam etdirəcəyik. Biz dövlətimizin siyasi kursunu dəyişməyən insanlarıq. Biz dövlətimizi layiqincə təmsil edən insanın adını çəkirik”.

YAP-çı deputat Aydın Mirzəzadə isə hakim partiyanın prezidentliyə namizədi olduğu halda digər bir iqtidaryönlü partiyanın M.Əliyevanın özünün razılığı olmadan onun namizədliyinin irəli sürməsini “yolverilməz addım” adlandırdı. A.Mirzəzadə virtualaz.org-a açıqlamasında bildirib ki, M.Əliyevanın YAP sədrinin müavini olması faktı da unudulmamalıdır: “YAP sədrinin prezidentliyə namizədliyi isə artıq rəsmi şəkildə irəli sürülüb”.

Saytın əməkdaşı Mehriban Əliyevanın prezidentliyə namizədliyinin DADP adlı iqtidaryönlü partiya tərəfindən irəli sürülməsi məsələsinə münasibət öyrənmək üçün birinci ledinin rəhbərlik etdiyi Heydər Əliyev Fondu ilə əlaqə saxlayıb. Qurumdan bildiriblər ki, onlarda DADP adlı partiyanın bu qərarı haqda heç bir məlumat yoxdur və buna görə də sözügedən məsələni şərh edə bilməzlər.

***

15.01

Azərbaycanın “ikinci iqtidar partiyası” adlandırılan Dünyəvi Azərbaycan Partiyası prezident seçkiləri ilə bağlı sensasion qərar qəbul edib. Musavat.com Veteninfo-ya istinadən xəbər verir ki, partiyanın toplantısında Azərbaycanın birinci xanımı, Heydər Əliyev Fondunun prezidenti Mehriban Əliyevanın namizədliyi irəli sürülüb.

Qeyd edək ki, hakim Yeni Azərbaycan Partiyası prezidentliyə İlham Əliyevin namizədliyini irəli sürüb. Mütəxəssislərin fikrincə, DADP-nin qərarı isə hakimiyyətin yeni strategiyasından xəbər verir. Təbii ki, bu partiya “yuxarılar”ın arzusu və razılığı olmadan birinci xanımın namizədliyini irəli sürə bilməzdi.

Topantıdan çəkilmiş videogörüntüləri təqdim edirik.