Bakıda idman adına rəzalət;Biləcəridəki “Lokomotiv” kompleksi kafeyə çevrilib

“Lokomotiv” İdman-Sağlamlıq Mərkəzi Zaqafqaziya Dəmir Yolu “Lokomotiv” Yol könüllü İdman Cəmiyyətinin rayon şurasının qərarı ilə 1936-cı ildə yaradılmışdır. Sonralar 1989-cu ildə “Lokomotiv” Yol bədən tərbiyə və idman klubu kimi formalaşmışdır. 1998-ci ildə “Lokomotiv” Yol bədən tərbiyə və idman klubunun bazasında “Lokomotiv” İdman-Sağlamlıq Mərkəzi yaradılmışdır.
“Biləcəridəki “Lokomotiv” İdman-Sağlamlıq Mərkəzinin cüdo məşqləri üçün nəzərdə tutulan zalı çayxana kimi fəaliyyət göstərir. Bu barədə redaksiyamızı özəl mənbə məlumatlandırıb. Mənbənin sözlərinə görə, artıq uzun müddətdir ki, öz qanuni təyinatından kənar şəkildə fəaliyyət göstərən “Lokomotiv” idman-Sağlamlıq Kompleksi Biləcəri ərazisindəki ən məşhur kafelərdən biri kimi fəaliyyət göstərməkdədir: “Kompleksin bir hissəsi formal da olsa idman müəssisəsi kimi fəaliyyət göstərsə də, mərkəzin cüdo məşqləri üçün nəzərdə tutulan bölümü kafe kimi fəaliyyət göstərir. Hər gün yüzlələrlə insana çay, pivə və s. təklif edən kafenin əslində idman müəssisəsi kimi fəaliyyət göstəməli olduğuni çox adam bilmir. Halbuki, bütün rəsmi məlumatlarda kompleksin bir hissəsinin çayxanaya çevrildiyi haqqında bir kəlmə də olsun məlumat verilmir. Əksinə idman-sağlamlıq kompleksinin tam gücü ilə fəaliyyət göstərdiyi, yeniyetmə idmançılar yetişdiridiyi qeyd olunur”.

800 manatlıq arenda və ya “pul olan yerdə nə idman”?

Mənbənin bildirdiyinə görə, kompleks rəhbərliyi cüdo zalının çayxana kimi fəaliyyətinin ona daha çox qazanc gətirdiyini gizlətmir və açıq şəkildə bunun idmançı hazırlığından daha gəlirli olduğunu qeyd edir: “Kompleksin təyinatının qanunsuz olaraq dəyişdirilməsini müəssisə rəhbərliyi idmanın “gəlirsiz sahə” olması ilə izah edir. “Pul olan yerdə nə idman” şüarını əsas götürən kompleks rəhbərliyi açıq şəkildə bildirir ki, çayxana fəaliyyəti ona idman fəaliyyətindən dəfələrlə artıq pul qazandırır. Ayda 800 manat məbləğində arenda haqqı aldığını qeyd edən müəssisə rəhbərliyi bildirir ki, çayxananın fəalityyətinə xitam vermək fikrində deyil. Əksinə, yaxın gələcəkdə idman zalında fəaliyyət göstərən çayxananın öz fəaliyyətini daha da genişləndirməsi nəzərdə tutulur. Artıq kompleksdə spirtli içkilərin verilməsi həyata keçirilir ki, bu da idman sektorundakı rəzalətdən xəbər verir”.

İdman zalındakı çayxananı kimlər niyə himayə edir?

Bilgili qaynağın sözlərinə görə, kompleksin çayxanaya çevrilməsi bəzi vətəndaşlar tərəfindən narazılıqla qarşılansa da, müəssisə rəhbərliyi bu narazılığa əhəmiyyət vermək fikrində deyil. “Yuxarılarda” güclü himayədara malik olduğunu bildirən kompleks rəhbərliyi kimsənin ona “gözün üstə qaşın var” deyə bilməyəcəyini qeyd edir: “Sağlam bədən və sağlam ruhun formalaşdırılmalı olduğu yerdə spirtli içkilər satdıran müəssisə rəhbərliyi “yuxarılarda” güclü himayədara malik olduğunu gizlətmir. Kompleksin rəhbərliyi bildirir ki, ona bu cür fəaliyyət üçün “yuxarılar” şərait yaradır və buna görə də kimsə ona hansısa şəkildə maneçilıik törədə bilməz. Habelə, kompleks rəhbərinin sözlərinə görə, “yuxarılarda” ona münasibət yaxşıdır, çünki “hörmət etməyi” bacarır”.
Mənbənin sözlərinə görə, sözügedən himayədarın konkret olaraq kim və ya kimlər olduğu bilinməsə də, baş verən rüsvayçılığın arxasında hansısa himayədarın olduğu birmənalıdır və əgər rəsmi qaydada müəyyən araşdırılma aparılarsa, o zaman gizli himayədarın kimliyi ortaya çıxar.

Idman zalını çayxanaya döndərənlərin ölkə başçısına xəyanəti

Mənbənin bidirdiyinə görə, “Lokomotiv” İdman-Sağlamlıq Mərkəzində cüdo məşqləri üçün nəzərdə tutulan zalın çayxana kimi fəaliyyəti yalnız adi bir qanun pozuntusu deyil, həm də ölkə başçısının idman siyasətinə xəyanət etmək deməkdir: “Şübhəsiz, əgər belə bir fəaliyyətə qanunla, rəsmi şəkildə icazə verilsəydi, baş verənləri normal qarşılamaq olardı. Lakin bu fəaliyyət qanunsuz olaraq, ölkə başçısının idmanın inkişafı ilə bağlı prinsipial mövqe ortaya qoyduğu bir zamanda baş verir ki, bu da yolverilməzdir. “Lokomotiv”də baş verən olaylar göstərir ki, rəhbərliyin etimadından sui-istifadə edən bəzi qüvvələr öz maddi maraqlarını təmin etmək üçün ölkə başçısının elan etdiyi dəstə-xəttə xəyanət etməkdən də çəkinmir, öz himayədarlarının köməyinə arxayın olaraq heç kimdən çəkinmədiklərini açıq şəkildə dilə gətirirlər. Nəticədə, idman zalında gənc nəslin sağlam inkişafına zərbə vuran, onlarda zərərli vərdişlər aşılayan kafelər meydana gəlir ki, bunun bütövlükdə xalqın gələcəyinə hansı zərərlər vəd etdiyini məxsusi olaraq şərh etməyə yəqin ki, ehtiyac yoxdur”.

İlqar