Onun yaxın çevrəsinin ermənilərlə hansı əlaqəsi var?

Son zamanlar həyata keçirilən kadr islahatları Azərbaycan Respublikasının Diasporla İş üzrə Dövlət Komitəsindən də yan keçmədi və komitə sədri Nazim İbrahimov postunu itirdi. Ümumilikdə isə artıq bir neçə il idi ki, İbrahimov qardaşlarının adı mətbuatda çox hallanırdı və bu hallanma heç də müsbətə doğru deyildi. Bunun nəticəsi olaraq İbrahimov qardaşlarından biri həbs edildi, birinin ölkədən çıxışına qadağa qoyuldu, biri isə vəzifəsini itirdi. Bundan sonar isə Azərbaycan Respublikasının Diasporla İş üzrə Dövlət Komitəsinin yeni sədri Fuad Muradov oldu. GundemXeber.az saytına daxil olan məlumata görə, Fuad Muradov işə başladığı ilk gündən gülməli durumla üzləşib. Bir neçə gün ərzində komitənin uzun illər əməkdaşlıq etdiyi diaspora təşkilatlarının rəhbərləri ilə əlaqə qura bilməyib. Elə bundan sonra da Fuad Muradov Avropa və ABŞ-a səfər edərək məsələnin yerindəcə həllinə təşəbbüs göstərib və maraqlı səhnə ilə üz-üzə qalıb. Aydın olub ki, komitənin əməkdaşlıq etdiyi təşkilatlar əslində Nazim İbrahimovun biznes ortaqları olublar və onların diaspora fəaliyyətləri yoxdur. Məsələn, aydın olur ki, keçmiş MDB məkanında Nazim İbrahimovun fəxr etdiyi və sıx əməkdaşlıq etdiyi şəxslər sadəcə olaraq kənd təsərüfatı məhsullarının satışı ilə məşğul olublar və daha çox kartof biznesində ad çıxara biliblər. Sadəcə olaraq bizneslərinin daha yaxşı getməsi üçün komitənin imkanlarından yararlanıblar ki, buna görə də Nazim İbrahimov öz faizini alıb. Və yaxud Nazim İbrahimov dəstəsinin daha çox “uğur” qazandığı bölgə Şərqi Avropa, son illər isə Avropanın özü olub. GundemXeber.az-a daxil olan məlumata görə, daşınmaz əmlak biznesinə başlayan Nazim İbrahimov burada da komitənin imkanlarından yararlanıb. Adı çəkilən ölkələrdən Azərbaycana daha çox geyim gətirən dəstə qısa müddət ərzində müəyyən imkanlara sahib ola biliblər. Amma Nazim İbrahimovun işləri işdən çıxarılmamışdan bir il qabaq tamam korlanıb. Belə ki, bizneslə məşğul olan diaspora “təşkilat”larının rəhbərləri Nazim İbrahimovu öz bizneslərindən sıxışdırıb çıxartmağa başlayıblar. Faktiki olaraq bir neçə ay ərzində Nazim İbrahimov tam bankrot durumuna düşüb. Məhz bu zamanda onun Bakıdakı biznesində də çöküş yaranıb. Hətta sonuncu dəfə üst-üstə Nazim İbrahimovun 30 milyon manata qədər banklara borcu yaranıb. Hər zaman villa, təmtaraqlı bağ, mənzil həvəskarı olan Nazim İbrahimov bundan sonra bağını və Bayıl istiqamətində, dənizkənarında yerləşən bir neçə hektar torpağından da imtina etməli olub. Bütün bunlara baxmayaraq onun hələ də borcları tam ödəyə bilmədiyi söylənilir. Nazim İbrahimov üçün daha ağır ittihamlardan biri isə onun yaxın çevrəsinin erməni iş adamları ilə təmaslarının ortaya çıxmasıdır ki, bununla da bağlı araşdırmamızı gözləyin.

GundemXeber.Az