Oktyabr ayında Azərbaycanda yeddinci prezident seçkisi keçiriləcək. “Media forum” saytının ilkin məlumatlar əsasında apardığı hesablama bu prezident seçkisində namizədlərin sayının əvvəlkilərlə müqayisədə rekord həddə olacağı ehtimalını ortaya çıxarır.

Liberal Demokrat Partiyasının sədri Fuad Əliyev “Gündəlik Teleqraf” qəzetinə açıqlamasında oktyabrda keçiriləcək prezident seçkisinə qatılacağını bəyan edib. Fuad Əliyev 2008-ci ilin prezident seçkisində də iştirakçı olmuş və rəsmi nəticələrə görə, 0.78% faiz səs toplamışdı.

5 il əvvəlki seçkinin qalibi olmuş (88.73%) dövlət başçısı İlham Əliyev də prezident seçkisinə qatılır. Hakim Yeni Azərbaycan Partiyası onun namizədliyini üçüncü dəfə irəli sürüb.

2008-ci il seçkisində iştirak etmiş daha 4 nəfərin bu dəfə də prezidentlik yarışına qatılacağı gözlənir:

Böyük Quruluş Partiyasının başqanı, deputat Fazil Mustafa (2008-ci il seçkisində 2.47% səs toplayıb);

Bütöv Azərbaycan Xalq Cəbhəsi Partiyasının sədri, deputat Qüdrət Həsənquliyev (2.28%);

Müasir Müsavat Partiyasının sədri Hafiz Hacıyev (0.65%);

Ümid Partiyasının sədri İqbal Ağazadə (2.86%).

Demokratik Qüvvələrin Milli Şurası yazıçı, kino xadimi Rüstəm İbrahimbəyovun prezidentliyə namizədliyini irəli sürüb. Demokratik Qüvvələrin Milli Şurasında Müsavat, Xalq Cəbhəsi, Klassik Xalq Cəbhəsi, Liberal, Aydınlar, Böyük Azərbaycan, Açıq Cəmiyyət, Vahid Azərbaycan Milli Birlik, İslam partiyaları təmsil olunur.

İslam Partiyası seçkiyə lideri, məhbus Mövsüm Səmədovun namizədliyi ilə gedilməsinə qərar verib. İyul ayının üçüncü ongünlüyündə Mövsüm Səmədov Milli Şuranı tərk etdiyini açıqlayıb. Amma Azərbaycan qanunlarına görə, Mövsüm Səmədovun passiv seçki hüququ – seçilmək hüququ yoxdur, azadlıqdan məhrumetmə yerlərində cəza çəkən şəxslər namizədliklərini irəli sürə bilməzlər.

Milli Şurada təmsil olunan Müsavat başqanı İsa Qəmbərin və Klassik Xalq Cəbhəsi Partiyasının sədri Mirmahmud Mirəlioğlunun namizədlikləri də hələ qüvvədə qalır.

Oktyabr seçkisində “Azərbaycan – 2013” hərəkatının rəhbəri, politoloq Ərəstun Oruclu, Demokrat Partiyasının sədri Sərdar Cəlaloğlu, Vətəndaş və İnkişaf Partiyasının sədri Əli Əliyevin də iştirak edəcəyi ehtimalı böyükdür.

2013-cü il marafonunun potensial iştirakçılarından Milli İstiqlal Partiyası (lideri Etibar Məmmədov, sədri Yusif Bağırzadə), Ədalət Partiyası (sədri deputat İlyas İsmayılov), Demokratik İslahatlar Partiyası (sədri deputat Asim Mollazadə), Sosial Demokrat Partiyası (sədri Araz Əlizadə), Vətəndaş Həmrəyliyi Partiyası (sədri deputat Sabir Rüstəmxanlı) hələ qəti qərar verməyiblər.

Hüquqşünas İlqar Altay isə prezident seçkisinə müstəqil namizəd kimi qatılacağını bildirib.

Prezidentliyə potensial namizəd, REAL hərəkatının sədri İlqar Məmmədov isə bu ilin fevralında həbs olunub və onun istintaqı gedir.