Kimlər namizəd olmağa hazırlaşır?

Müsavat Partiyasının Divanı 2013-cü ilin oktyabr ayında keçiriləcək prezident seçkisində iştirakı məqsədəuyğun sayaraq Məclisin növbəti toplantısına başqan İsa Qəmbərin namizədliyinin irəli sürülməsini tövsiyə edib. Məclisin toplantısı 2013-cü il yanvarın 4-nə təyin olunub. Ümüd partiyası da İqbal Ağazadənin namizəd olacağı haqda qərar qəbul edib.
Aparıcı müxalifət partiyalarından olan AXCP seçki ilə bağlı yekun qərarını gələn ilin ortalarında verəcəyini açıqlayıb. Bəs digər müxalif partiyaların seçkiyə münasibəti necə olacaq?

Əvəz Temirxan, Liberal Partiyasının sədri:
- Liberal Partiyasının namizədi liderimiz Lalə Şövkətdir. Seçkiyə gedəcəyiksə, onunla gedəcəyik. Hamını Lalə Şövkətə səs verməyə çağıracağıq. Hesab edirəm ki, ən yüksək reytinqli namizəd Lalə Şövkətdir.
Araz Əlizadə, Sosial Demokrat Partiyasının sədri:
- Bizim partiyanın öz namizədi olacaq. Əgər Mərkəzi Seçki Komissiyası namizədimizi qeydiyyatdan keçirsə, partiya onun üçün işləyəcək. Namizədimiz qeydiyyatdan keçməsə, partiya üzvləri müstəqildir: kimə istəsələr səs verəcəklər.

Mirmahmud Mirəlioğlu, Klassik Xalq Cəbhəsi Partiyasının sədri:
- Partiya 2013-cü il seçkisində iştirak edəcək. Mənim namizədliyim irəli sürüləcək.

Yusif Bağırzadə, Milli İstiqlal Partiyasının sədri:
- Milli İstiqlal Partiyası prezident seçkisində öz namizədi ilə iştirak edəcək. 2013-cü ilin əvvəlində partiyanın qurultayı olacaq və namizəd müəyyənləşəcək. Amma çox istərdim ki, müxalifət seçkiyə böyük koalisiyada getsin. İctimai Palatanın, Məşvərət Məclisinin, Ziyalılar Forumunun və digər qüvvələrin seçkiyə birgə, vahid namizədlə getməsi yaxşı olardı.
Nurəddin İsmayılov, Azərbaycan Demokrat Partiyasının sədr müavini:
- Bu günlər partiyada belə bir məsələ müzakirə olunmayıb. Ümid Partiyası ilə birgə təmsil olunduğumuz “Qarabağ” blokunda da kimin namizəd olacağı məsələsi gündəmdə deyil. Bu günə qədər yalnız müxalifətin birliyi istiqamətində addımlar atılıb ki, vahid namizəd məsələsi gündəmə gəlsin, vahid komanda formalaşsın. Təəssüflər olsun ki, bu cəhdlər alınmayıb.
Samir Əsədli, Vətəndaş Həmrəyliyi Partiyasının şöbə müdiri:
- Hazırda partiyada 2013-cü il seçkisi ilə bağlı müzakirələr aparılır. Hesab edirik ki, müxalifət düşərgəsi seçkiyə vahid namizədlə getməlidir. Əgər müxalifət seçkiyə vahid namizədlə qatılmasa, partiya öz namizədini irəli sürəcək. Partiyanın sədri Sabir Rüstəmxanlı öz fikrini bildirməyib. Sabir Rüstəmxanlı seçkiyə qatılmasa, partiya başqa namizədi irəli sürəcək. Ali Məclisin sədri Rafiq Manaflı, Siyasi Şuranın üzvü Əlövsət Əliyevin namizəd olmaq ehtimalı da var.
Partiyamız seçkiyə qatılmaya da bilər. Bəzi VHP-çilər hesab edir ki, indiki Seçki Məcəlləsi, seçki komissiyaları ilə seçkiyə getmək olmaz. Seçki qanunvericiliyi təkmilləşdirilməli, seçki komissiyaları ədalətli şəkildə formalaşdırılmalıdır.
Fazil Mustafa, Böyük Quruluş Partiyasının başqanı:
- 2013-cü ilin prezident seçkisində iştirak partiyamızın qərarları sırasındadır. Çox güman ki, mənim namizədliyim irəli sürüləcək. Seçkinin demokratik standartlara nə dərəcədə cavab verməsi, seçkiqabağı mühitin nə dərəcədə sağlam olması qərarımıza təsir göstərəcək. İndiki ümumi atmosfer qəti bir söz deməyə imkan vermir. Bu baxımdan bir qədər gözləyəcəyik. Yəqin ki, gələn ilin mart ayında qərarımızı dəqiqləşdirəcəyik.
Asim Mollazadə, Demokratik İslahatlar Partiyasının sədri:
- Hazırda partiyada prezident seçkisində iştirak edib-etməməyimiz barədə müzakirələr gedir. Müzakrələr bitdikdən sonra partiyanın qərarı açıqlanacaq.

İlyas İsmayılov, Ədalət Partiyasının sədri:
- 2013-cü ilin prezident seçkisinə 9 aydan çox vaxt qalıb. Hələ tezdir bu barədə danışmaq.

Qulamhüseyn Əlibəyli, Aydınlar Partiyasının sədri:
- Partiyamız 2013-cü il seçkisində iştirak edəcək. İştirakın forması ilə bağlı məsələni müzakirə etməmişik. Amma mənim namizədliyim üzərində dayanılıb.
Sülhəddin Əkbər, Açıq Cəmiyyət Partiyasının sədri:
- Bizim partiyanın lideri Rəsul Quliyev Azərbaycana gəlmək və prezident seçkisində iştirak etmək niyyətini bəyan edib. Amma bu gün Azərbaycanda olan vəziyyət bu namizədliyin irəli sürülməsinə və məsələnin rəsmiləşməsinə imkan vermir. Azərbaycanda seçkiqabağı vəziyyət dəyişməsə, Azərbaycan hakimiyyəti səhnələşmiş seçki oyunu oynasa, bu seçkidə iştirak etmək sual altına düşür. İndi Açıq Cəmiyyət Partiyasının prioriteti azad və ədalətli seçkinin keçirilməsinə şərait yaradılması və müxalifətin geniş koalisiyasının yaranmasıdır. Bizim üçün namizəd irəli sürülməsi məsələsi aktual deyil. Çünki mövcud şərtlər buna imkan vermir.
Fərəc Quliyev, Milli Dirçəliş Hərəkatı Partiyasının sədri:
- Hələ ki, partiyanın qurultayı keçirilməyib. Amma böyük ehtimalla mənim namizədliyim irəli sürüləcək. Partiyanın başqa şəxsi namizəd göstərməsi də mümkündür. Son qərarı qurultay verəcək.
Elçin Mirzəbəyli, Bütöv Azərbaycan Xalq Cəbhəsi Partiyası sədrinin müavini:
- Partiyamız bütün hallarda prezident seçkisində iştirak edəcək. Bütün seçkilərdə iştirak etmək partiyanın vəzifəsidir. Bu, partiyanın ideyalarının təqdim olunması üçün çox önəmlidir. 2013-cü ilin prezident seçkisində namizədin irəli sürülməsi haqda qərarı partiyanın qurultayı verəcək. Qurultayın qərarı partiyanın rəsmi qərarı sayılır.