Müsavat Başqanı Rüstəm İbrahimbəyov qarışıq hamını onu gözləməyə məcbur etdi; Vahid namizədlə bağlı ictimai rəydə yaranan suallara son qoymaq üçün Rüstəm İbrahimbəyovla İsa Qəmbərin ikilikdə görüşü olacaq

Müxalifətin Tiflis zirvəsi öncəsi ölkə siyasətində yeni proseslər cərəyan etdi. İqtidar müxalifətlə dialoqa hazır olduğunu açıqladı. Hakimiyyət seçkiqabağı gərginliyə son qoymaq üçün Milli Şurada təmsil olunan partiyalarla təmas qurmağa hazırlıq görür. Hakimiyyət Milli Şuranı rəsmi təbliğatda legitim saymasa da, nəzarətində olan KİV-lər, iqtidaryönlü deputatlar, YAP mənsublarının çıxışları məhz bu quruma köklənib. Odur ki, dialoq labüddür və tərəflər arasında belə bir toplantı olacağı mütləqdir.

Dialoq olacaq

Belə bir vaxtda isə Milli Şuranın 15 nəfərlik nümayəndə heyəti Tiflisə - Rüstəm İbrahimbəyovla görüşə getdilər. Görüşün yekun nəticələrinə nəzər yetirməzdən əvvəl vurğulamaq yerinə düşər ki, yaxın günlərdə iqtidar-müxalifət dialoqu baş tutacağı rəsmən təsdiqlənib. Hətta görüşdə R.İbrahimbəyovun da iştirak istisna deyil.
“Seçkilərin elə mərhələsinə daxil oluruq ki, müxalifət partiyaları ilə təmaslar qaçılmazdır”. Bu açıqlamanı jurnalistlərə Prezidenti Administrasiyası (PA) İctimai-siyasi məsələlər şöbəsinin müdiri Əli Həsənov verib.
PA rəsmisi bu cür təmaslara ehtiyac olduğunu deyib: “Biz bu sahədə ATӘT-lə danışıqlar aparırıq. ATӘT-in müxtəlif partiya funksionerlərini bir araya toplayaraq seminarlar keçirməsi, seçkilərlə bağlı narahatlıq doğuran məsələlər olanda, onların şəffaf müzakirə olunub qərar qəbul edilməsi təcrübəsi mövcuddur. Yəqin ki, biz seçkilər ərəfəsində bütün siyasi partiya rəhbərləri və funksionerləri ilə görüşlər keçirəcəyik”.
YAP-çı deputat Siyavuş Novruzov dialoqa qarşı çıxıb. Onun sözlərinə görə, bundan öncə daxili məsələlərlə bağlı bir neçə dəfə dialoq təklif edilsə də, müxalifət tərəfi buna reaksiya verməyib.
Hakim partiya funksioneri bildirib ki, builki prezident seçkiləri ilə bağlı dialoqa ehtiyac yoxdu: “Seçki prosesi Azərbaycan Respublikasının qanunvericiliyinə uyğun keçirilir. Burada heç bir dialoqa ehtiyac yoxdu. Hər bir partiya qanunvericiliyə uyğun olaraq öz namizədini irəli sürə bilər. Seçkiöncəsi görüş olsa da, söhbət seçkidən getmir. Biz öz mövqeyimizi ortaya belə qoyuruq”.

MŞ üzvü buraxıldı, Arif Hacılı ad çəkdi

İyulun 29-na keçən gecə Bakı aeroportunda saxlanılan və 19 saat dindirmədən sonra sərbəst buraxılan Milli Şuranın Ukrayna nümayəndəliyinin rəhbəri Yalçın Qəhrəmanoğlu “Yeni Müsavat”a müsahibə verib. Dediyinə görə, Mütəşəkkil Cinayətkarlığa Qarşı Mübarizə İdarəsində (MCQMİ) onunla çox norma davranılıb və hər hansı təzyiqlə üzləşməyib.
Saxlanılmasının səbəblərinə gəldikdə, Y.Qəhrəmanoğlu deyib ki, bu barədə konkret bir söz deyilməyib: “Amma sözsüz ki, saxlanmağım siyasi fəaliyyətimlə əlaqədar idi. Məqsəd odur ki, məni siyasi fəaliyyətdən çəkindirsinlər, sındırsınlar, proseslərdən uzaqlaşdırsınlar. Bu da mümkün deyil, olmayacaq da”.
Saxlanması ilə bağlı təfərrüatları bölüşən Y.Qəhrəmanoğlu Azərbaycana gəlişinin səbəbləri, buradakı görüşləri, planları, həmçinin Milli Şuranın Ukraynadakı təşəbbüs qrupunun görəcəyi işlərlə bağlı ətraflı danışıb. Qeyd edib ki, saxlanması həbsdə olduğu saatlarda Kiyevdəki məsləkdaşları böyük bir yığıncaq keçirib və narahatlıqlarını ifadə ediblər.
Müsavat Partiyası Mərkəzi Aparatının rəhbəri Arif Hacılı bildirib ki, İbrahimbəyovun namizədliyinin qeydə alınmasında problem olarsa, digər namizədlər barəsində düşünülməlidir: 2 illik keçid hökumətində təmsil olunmaq baxımından namizədlər var ki, onları Milli Şurada hər kəs qəbul edə bilər. Mehman Əliyev, Cəmil Həsənli, Milli Şurada təmsil olunmayan akademik Rafiq Əliyev müxalifətin vahid namizədi ola bilər. Amma mən ümid edirəm ki, Rüstəm İbrahimbəyovla bağlı məsələ müsbət həllini tapacaq”.
Rəsul Quliyev: “Rüstəm bəy düz elədi Bakıya gəlmədi”
“Tiflisdə görüş hökmən lazım idi. Çünki vahid namizədin həbsinin nə ilə nəticələnəcəyini bilən bir sıra Milli Şura üzvləri Rüstəm İbrahimbəyovla onun ölkəyə qayıdışı və digər məsələlər barədə müzakirə aparmalıdırlar. Ona görə bu görüş hökmən olmalı idi. Təəssüf ki, görüş Azərbaycanda yox Gürcüstanda keçir”.
Bu sözləri açıqlamasında Milli Məclisin keçmiş sədri Rəsul Quliyev bildirib. MM-nin sabiq sədri R.İbrahimbəyovun Azərbaycana gəlməməsinin düzgün addım olduğunu deyib: “Rüstəm İbrahimbəyov Azərbaycana gəlib saxlanılsaydı, şansını itirərdi. Rüstəm İbrahimbəyov əgər prezident seçkilərində iştirak etmək fikrindən daşınmasa, hökumət onu həbs etmək niyyətindədir. Bu məsələnin belə olmadığını iddia etmək gülüncdür. İbrahimbəyovun rəhbərlik etdiyi Kinematoqrafçılar İttifaqının bir ildə 30 min manat vergidən yayınması barədə cinayət işi sözsüz ki, ona qarşı qondarma cinayət işidir. Bu külli oğurluqda müqayisədə 0,30 min qəpikdir. Özü də bu təşkilat pulu qaytarmaq istədiyini də elan edib”.

APA-nın informasiya təxribatı

Milli Şuranın Tiflis toplantısının keçiriləcəyi “Vere Palace” oteli erməni mənşəli Gürcüstan vətəndaşı Andrey Nersesyana məxsus olması və hazırda onun oğlu tərəfindən idarə edildiyi barədə məlumatlar yayılıb. APA-nın məlumatına görə, A. Nersesyan SSRİ dövründə Gürcüstanın ticarət naziri vəzifəsində işləyib. Onun hazırda Ermənistan prezidenti Serj Sərkisyanla yaxın əlaqədə olduğu və Gürcüstanda əsas dayaqlarından biri sayıldığı bildirilir. Minval.az isə məlumat verdi ki, otel milliyyətcə gürcü Manana Şaraçidzeyə məxsusdur, direktoru isə Serqo Kapanadzedir.
Musavat.com Tiflisdə olan müxbiri Aygün Muradxanlı ilə əlaqə saxlayıb, otellə bağlı iddiaların hansısa bir əsasının olub-olmamasını soruşub. Müxbirimiz deyib ki, səhər saatlarında jurnalistlər arasında Azərbaycan müxalifətinin toplandığı otelin erməni iş adamına məxsus olması barədə xəbərlər dolaşıb: “Lakin axşam saatlarında, məsələnin artıq ciddi ittiham xarakteri aldığını gördükdən sonra biz sahibkarı dəqiqləşdirmək qərarına gəldik. Otel rəsmiləri şəxsən mənə bildirdilər ki, bura Vera məhəlləsi adlanır, burada ancaq cürcülər və azərbaycanlılar yaşayırlar. Otelin rəsmi sahibi isə Manana Şaraçidzedir. Otelin direktoru da gürcüdür - Serqo Kapanadze”

ADR-in zalında iclas

Nəhayət görüş Tiflisin mərkəzində yerləşən “Vera Palace” otelində təşkil olunub. Milli Şuranın sədri Rüstəm İbrahimbəyovu gətirən Moskva-Tiflis uçağı axşam saatlarında Tiflisə çatıb. Eldar Namazov musavat.com-un əməkdaşına deyib ki, otel rəhbərliyi ilə aparılan danışıqlardan sonra Milli Şuranın yığıncağının Vere Palasda keçirilməsi qərara alınıb. Onu da bildirək ki, Milli Şura üzvləri Tiflis toplantısını 1918-ci ildə Azərbaycan Xalq Cümhuriyyətinin elan edildiyi zalda keçirmək istəsələr də, Gürcüstanın hökumət qurumları bunun üçün rəsmi müraciət istəyib:
“İndi həmin bina muzey kimi istifadə olunur. Biz bu gün Milli Şura sədri Rüstəm İbrahimbəyovun imzası ilə gərəkli müraciəti ünvanına çatdıracağıq. Böyük ehtimalla sabah Milli Şura üzvləri Azərbaycan Xalq Cümhuriyyətinin elan edildiyi tarixi binada toplantı keçirəcək”.
E.Namazovun sözlərinə görə, Rüstəm İbrahimbəyovla Milli Şuranın toplantısından sonra təkbətək görüşləri də nəzərdə tutulub: “Müsavat başqanı İsa Qəmbərlə, eyni zamanda digər partiyalardan olan təmsilçilərlə Milli Şura sədrinin təkbətək görüşləri nəzərdə tutulub. Mənim də Rüstəm müəllimlə təkbətək görüşüm olacaq”.
Milli Şuranın Tiflis toplantısının keçiriləcəyi “Vere Palace” oteli erməni mənşəli Gürcüstan vətəndaşı Andrey Nersesyana məxsus olması və hazırda onun oğlu tərəfindən idarə edildiyi barədə məlumatlar yayılmışdı. Onun hazırda Ermənistan prezidenti Serj Sərkisyanla yaxın əlaqədə olduğu və Gürcüstanda əsas dayaqlarından biri sayıldığı bildirilir. Minval.az-ın məlumatına görə, otel milliyyətcə gürcü Manana Şaraçidzeyə məxsusdur, direktoru isə Serqo Kapanadzedir.

İsa Qəmbərin jesti, İbrahimbəyovun susqunluğu

Tiflis vaxtı ilə saat 18.00-da Milli Şura üzvləri Vere Palaced-nin toplantı zalına toplansa da, yığıncağı başlamaq mümkün olmadı. Səbəb Müsavat başqanı İsa Qəmbərin toplantı keçirilən zala gəlməməsi idi. 20 dəqiqə sonra yığıncağa qatılan İsa Qəmbər bildirdi ki, ona toplantının 18.30-da keçiriləcəyi bildirilib və o, yığıncaq zalına deyilən vaxtdan 10 dəqiqə tez gəlib. Yığıncağa gecikən şəxslər sırasında Turan İA-nın direktoru Mehman Əliyev də var. Mehman Əliyev bu saata qədər də yığıncağa qatılmayıb.
Yığıncaq başlanan zaman jurnalistlərin zaldan görüntü almasına icazə verildi. Daha sonra toplantının qapalı keçiriləcəyi bildirilərək jurnalistlər zaldan çıxarıldı. Onu da qeyd edək ki, Gürcüstandakı yerli və beynəlxalq media Azərbaycan müxalifətinin toplantısına ciddi maraq göstərir. Çoxsaylı jurnalistlər Azərbaycan media təmsilçiləri ilə bərabər yığıncağın başa çatmasını gözləyir.
İsa bəyin gəlişi gözlənilən zaman jurnalistlər Rüstəm İbrahimbəyova sual vermək istəsələr də o, yumşaq şəkildə cavabdan imtina etdi: “Sual verə bilərsiz, ancaq cavab olmayacaq”.

Qərarsız müzakirə

Milli Şuranın toplantısında İcra Aparatının rəhbəri Eldar Namazov söz alıb. O, nümayəndə heyətini təqdim edib. Bildirib ki, bu tədbirdə Şuranın daha çox üzvü iştirak etmək istəyib, lakin razılığa gəlinib ki, quruma daxil olan siyasi qüvvələrin təmsilçilərindən ibarət yığcam heyət seçilsin.
Sonra Milli Şuranın sədri Rüstəm İbrahimbəyov geniş çıxış edib. O, deyib ki, Bakıya gəlməməsi qətiyyən nədənsə çəkinməsi ilə bağlı deyil. Sadəcə, Rusiya vətəndaşlığından çıxmaq üçün lazım olan sənəd hazırlanır və bu prosesdə şəxsi iştirakı tələb olunur. İbrahimbəyov bu sənədi almadan Bakıya gələcəyi təqdirdə hakimiyyətin onu ölkədən buraxmaya və beləliklə də onu seçkidən kənarda saxlamaq üçün hüquqi əsas qazana biləcəyini deyib. İbrahimbəyov onu da əlavə edib ki, həbs oluna biləcəyindən çəkinmir. Əksinə düşünür ki, bu istiqamətdə ortaya atılan tezislər hakimiyyətin əndişəsini göstərir.
ACP sədri Sülhəddin Əkbər və ALP-dən Eldar Muradov çıxışlarında Rüstəm bəyin fikirlərinə dəstək veriblər və Milli Şuranın qarşısında duran cari vəzifələr, görə biləcəyi işlər barədə danışıblar. AXCP sədrinin müavini Fuad Qəhrəmanlı deyib ki, Milli Şuranı və onun reallaşdırdığı vahid namizəd ideyasını gözdən salmağa çoxlu cəhdlər var. O, Milli Şuranın idarə olunması üçün kollegila orqanın yaradılmasını təklif edib. Fuad Qəhrəmanlı həmçinin, Şuranın komissiyalarının fəaliyyətinin gücləndirilməsi zərurətini də diqqətə çatdırıb. AXCP yetkilisi Milli Şuranın təbliğatı ilə bağlı fikirlərini də bölüşüb.
Çıxışlarda belə fikir səslənib ki, Milli Şuranın vahid namizədi ilə bağlı ictimai rəydə yaranan suallara son qoymağın zamanıdır və buna görə Rüstəm İbrahimbəyovla İsa Qəmbərin ikilikdə görüşsün.
Hüquqşünas Vidadi Mirkamal da Milli Şuranın təşkilati işlərinin gücləndirilməsi haqda danışıb və təkliflərini verib. Milli Şuranın komissiya sədri Nurəddin Mustafayev bildirib ki, başlıca vəzifə hakimiyyəti nəzərdə tutduğu, edə biləcəyi qanunsuzluqlardan çəkindirə biləcək müqaviməti yaratmaq olmalıdır. Müzakirələr digər iştirakçıların çıxışları ilə davam edib.

Aslan