Fond rəhbəri 2013-cü il “qurbanlıqları”nın sırasında

gundemxeber.az Artıq on ildir ki, Dövlət Sosial Müdafiə Fonduna rəhbərlik edən Səlim Müslümovun hədəfə alınması ilə bağlı məlumatları bir müddət əvvəl diqqətinizə çatdırmışdıq. İndi isə bu münaqişənin miqyası daha da böyümək üzərədir. Bu barədə qəzetimizə məlumat verən hakimiyyət içindəki qaynaq iddia edir ki, Səlim Müslümovun əslində PA ilə toqquşmasında səbəb kimi göstərilən arqumentlərin heç biri əsas olanı deyil. Xatırladaq ki, bu günlərdə DSMF ilə Prezident Administrasiyasının işlər idarəsi arasında bir məhkəmə qalmaqalının baş verməsi ilə bağlı məlumat vermişdik və bildirmişdik ki, fonda köçürmələrdə borclanan PA-nın sözügedən qurumuna qarşı iddia qaldıran Səlim Müslümovun idarəsi, eyni zamanda PA-nın digər təşkilatlarına qarşı da anoloji ittihamları irəli sürməyə hazırlaşır.
Bunun isə PA rəhbərliyində qəzəb yaratdığı söylənilir. Mötəbər mənbələrin bilgisinə görə, artıq Səlim Müslümova qarşı hərəkətə keçən bəlli cinah hətta Səlim Müslümovu əvəz edəcək kadrı da hazırlamaqla məşğuldur.

Fond rəhbəri iki gücün çəkişməsində

Dövlət Sosial Müdafiə Fonduna rəhbərlik edən Səlim Müslümova qarşı kampaniyanın miqyası daha da böyümək üzərədir. Bu barədə qəzetimizə məlumat verən hakimiyyət içindəki qaynaq iddia edir ki Fond rəhbəri həm də Mehdiyev üçün rəqibə çevrilən FHN şefi Kəmaləddin Heydərovun kadrı kimi də hədəfə gəlib. Bildirək ki, Səlim Müslümov DSMF-yə qədər Dövlət Gömrük Komitəsində sədr müavini postunu tutub və günü bu gün də keçmiş Gömrük Komitəsinin sədri, indiki fövqəladə hallar naziri Kəmaləddin Heydərovla gözəl münasibətləri var. Hələ də gömrük orqanlarının general-mayoru olan Səlim Müslümova birbaşa dəstək də hər zaman FHN şefindən gəlib və indi də belə olacaq. Bu barədə danışan mənbəmiz iddia edir ki, Səlim Müslümova qarşı kampaniyanın durdurulması üçün Kəmaləddin Heydərov nəzarəti altında olan mətbuatı müvafiq qaydada təlimatlandırıb. Bu barədə mənbənin söylədikləri: «Bəllidir ki, iqtidara birbaşa və dolayı yollarla bağlı olan mətbuatı kimin maliyyələşdirməsindən, hansı qüvvənin bu maliyyəni ayırmasından asılı olmayaraq, istənilən halda siyasi yönlü təlimatlar PA-dan verilir. Amma Kəmaləddin Heydərov bu müstəvidə hər zaman əlahiddəliyini qoruyub və bu dəfə də fond rəhbərinə qarşı start düyməsi verilən kampaniyaya qarşı ən böyük əngəl rolunu elə FHN şefinin özü oynayıb. Hər halda, bu gün Kəmaləddin Heydərov böyük bir KİV şəbəkəsini maliyyələşdirən əsas fiqurlardan biridir». Əldə etdiyimiz məlumatlarda o da deyilir ki, amma PA rəhbərliyi bu məsələni heç də unutmaq fikrində deyil və DSMF rəhbərliyinə qarşı fərqli problemlərin yaradılması gözlənilir.

Antikorrupsiya şousunun baş qəhrəmanı

Hökumət içindəki məlumatlı mənbənin sözlərindən belə məlum olur ki, əslində antikorrupsiya tədbirlərinin daha çox DSMF sistemində cərəyan etməsi də ilk başdan planlaşdırılıb. Hər halda, hansısa dövlət qurumu zəif bənd kimi seçilməli idi. Və prosesə nəzarət edən qüvvələrin DSMF rəhbəri Səlim Müslümovla ədavətdə olmaları bu strukturlara daha çox təlaşlı anların yaşadılması ilə müşaiyət olundu.
Hər halda, bu gün korrupsiyaya qarşı mübarizə idarəsi üçün ən münbit fəaliyyət ünvanları yetərincədir. Yəni boğaza qədər korrupsiyaya bulaşmış gömrük, səhiyyə, təhsil sistemlərinin varlığı şəraitində DSMF-nin bir nömrəli hədəf kimi müəyyən olunması heç də təsadüfi deyil və burada konkret sifariş var. Məlumatlı mənbə bildirir ki, həmin sifarişin müəllifləri indi də Səlim Müslümovun özünü hədəfə alıblar: «Artıq vaxt yetişib. Bu vaxta qədər yalnız var-gəl edən rəqibləri Səlim Müslümova həlledici zərbəni vurmağa hazırdırlar». Məlumatlara görə, məhz korrupsiyaya uğraması səbəbindən DSMF-nin özündə yoxlamaların həyata keçirilməsi planlaşdırılır:»Hazırda korrupsiyaya qarşı mübarizə idarəsinin əlində ciddi faktlar var və bu materiallar əsasında fondda yoxlamalar aparılacaq. Buna paralel olaraq isə Səlim Müslümov vəzifəsindən azad ediləcək. Hətta ola bilsin ki, fondun ümumiyyətlə ləğv edilərək əmək və əhalinin sosial müdafiəsi nazirliyinə birləşdirilməsinə qərar verilsin. Bu məsələyə sonradan aydınlıq gətirilə bilər». Mənbəmiz bütün bunların sentyabr ayına qədər cərəyan edəcəyini də xüsusi olaraq vurğuladı.

Büdcədən mənimsənilən 23 milyon

Redaksiyamıza daxil olan məlumata görə Dövlət Sosiai Müdafiə Fondunun bir neçə mərkəzində Respublika Prokurorluğu yanında korrupsiyaya qarşı mübarizə idarəsi tərəfindən yoxlamalara başlanılır. Mötəbər qaynaq iddia edir ki, artıq bu yoxlama anonsundan Dövlət Sosial Müdafiə Fondunun prezidenti Səlim Müslümovun da xəbəri var: «Xəbərinin olması bir yana, aldığı məlumat DSMF rəhbərini əməlli-başlı şoka salıb. Çünki yoxlama qərarı ilə birdən-birə fonda aid təxminən 20 struktur təftiş olunacaq».
Mənbəmiz iddia edir ki, konkret şikayətlər olsa da, DSMF-də korrupsiya yoxlamalarının həyata keçirilməsi hər halda, siyasi sifariş olmadan imkansızdır: «Əslində DSMF-nin strukturları hakimiyyətin başlatdığı atikorrupsiya tədbirlərinin ilk hədəflərindən oldu. Amma bu dəfə total yoxlama həyata keçirilə bilər ki, bunun da nəticəsində nəinki yerli idarə müdirləri, hətta DSMF-yə aid rəhbər şəxslər, habelə qurumun prezidenti Səlim Müslümovun özü də hədəfə çevrilə bilər».
Mənbəmiz bildirir ki, söhbət təxminən büdcəyə aid 23 milyon manatın mənimsənilməsindən gedir: «Bu qədər vəsait pensionerlərdən oğurlanıb. Davamlı olaraq edilən şikayətlər əsasında aparılan yoxlamalar nəticəsində müəyyən olunub ki, əslində həmin pullar banklara yatırılmayıb və DSMF rəhbərliyi tərəfindən mənimsənilib. Bu işdə isə DSMF-yə aid 20-yə yaxın struktur əlbir olub, proses isə rəhbərliyə aid şəxslərin nəzarəti altında həyata keçirilib».

Səlim Müslümov həbs oluna bilər

Məlum olduğu kimi bir müddət əvvəl prezident İlham Əliyev «Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı»nı təsdiqlədi. Bildirək ki, artıq belə bir sərəncamın imzalanması bir çox hakimiyyət dairələrində böyük narahatçılıq yaradıb. Təsadüfi deyil ki, bəzi ekspertlər 2013-cü il prezident seçkiləri ərəfəsində atılan bu addımı seçkiqabağı dönəm üçün hakimiyyət daxilində yeni təmizləmə kampaniyasının əsas açarı kimi təqdim etməkdədirlər.
Nazirlər Kabinetindəki bilgili qaynaq tərəfindən ötürülən informasiyada deyilir ki, əslində sözügedən fəaliyyət planı birbaşa olaraq rəsmi Bakının antikorrupsiya tədbirlərinin birinci dalğasının yekunu kimi də qiymətləndirilə bilər: «Birinci dalğa boyunca daha çox hədəfə alınanı Dövlət Sosial Müdafiə Fondu və hərbi komissarlıq işçiləri oldular. Bu dəfə isə sözügedən cinah üzrə antikorrupsiya hərəkətlənməsi daha da yuxarı instansiyalara doğru irəliləyəcək».
Konkret olaraq 2013-cü ilin prezident seçkiləri ərəfəsində Dövlət Sosial Müdafiə Fondunun sədri Səlim Müslümovun hədəfə alınacağını bildirən mənbəmiz vurğuladı ki, hətta DSMF şefinin həbsi belə gözləniləndir: «Çünki beynəlxalq qurumlar da daha samballı tədbirlər tələb edir. Və belə bir şəraitdə artıq birinci antikorrupsiya sezonunda qol-budağı yetərincə budanmış Səlim Müslümov ən uğurlu «qurbanlıqdır»..