Mərkəzi Seçki Komissiyası (MSK) prezident seçkilərinin hazırlanıb keçirilməsi üzrə əsas hərəkət və tədbirlərin “Təqvim Planı”nı açıqlayıb. MSK-nın mətbuat xidmətindən APA-ya verilən məlumata görə, Təqvim Planında seçki qanunvericiliyində nəzərdə tutulan əsas hərəkət və tədbirlərin ardıcıl və keyfiyyətlə həyata keçirilməsi, seçki subyektlərinə metodiki yardım göstərilməsi və sair məsələlər daxildir.

Təqvim Planında qeyd olunur ki, seçkilərin elan edilməsi haqqında qərar rəsmi dərc olunduqdan sonra prezidentliyə namizədlərin irəli sürülməsinə başlanır. Aktiv (passiv) seçki hüququ olan vətəndaşlar, seçicilərin təşəbbüs qrupları, siyasi partiyalar, siyasi partiyaların blokları namizəd irəli sürə bilər. Təqvim planına əsasən, namizədin qeydə alınması üçün zəruri olan seçki sənədlərinin təqdim edilməsi prosesi avqustun 20-dən sentyabrın 9-dək aparılacaq. Seçkiqabağı təşviqatın aparılması prosesinə isə səsvermə gününə 23 gün qalmış, yəni sentyabrın 16-da başlanacaq, oktyabrın 8-dək davam edəcək. “Exit-poll” keçirmək niyyətində olan təşkilatlar isə akkreditasiya üçün sentyabrın 19-dan başlayaraq, 10 gün müddətində müvafiq sənədləri təqdim etməlidir.

Seçkiqabağı təşviqatın aparılması üçün 23 günün ayrılması da seçki imkanlarını məhdudlaşdıran nüanslardan biridir. Bu müddət ərzində prezidentliyə namizədlər cəmiyyətə platformalarını elan etməli və bütün bölgələrə səfər edərək, seçicilərlə görüşlər keçirməlidir. Bu müddət təşviqat üçün kifayət edəcəkmi?

AXCP Ali Məclisinin sədri Həsən Kərimov bildirdi ki, qanunvericiliklə ayrılan müddətin 125 dairənin hamısında seçcilərlə görüşmək mümkünsüzdür. Qanunda təşviqat üçün bu qədər məhdud zamanın ayrılmasının təsadüfi olmadığını deyən H.Kərimov bildirdi ki, hakimiyyət ilk günlərdən müxalifətin seçki təbliğatının qarşısını almağa çalışır: “Hakimiyyət çox gözəl bilir ki, Milli Şuradan prezidentliyə vahid namizədin xalqla təmasda olması və ölkə reallıqlarını çatdırması, hakimiyyətə olan nifrəti daha da artıracaq. Amma bütün maneələrə baxmayaraq Milli Şuradan prezidentliyə vahid namizəd Azərbaycanın bütün bölgələrinə səfər edə bilməsə də, onun səlahiyyətli vəkilləri təbliğat kampaniyasının tam formada keçirilməsinə çalışacaq”.

ALP sədri Əvəz Temirxan isə bildirdi ki, təşviqat üçün qanunla ayrılmış 23 gün ölkə rəhbərliyinin Azərbaycanı idarə etməyə layiq olmadığını xalqın diqqətinə çatdırmaq üçün kifayətdir: “Hakimiyyətin qanunsuz addımları o qədərdir ki, onları yalnız sadalamaqla təşviqat kampaniyasını uğurla aparmaq olar. Bu mənada 23 gün bəs edəcək. Yəni iqtidara inamsızlığı təşviq etməyə heç ehtiyac da yoxdur. Amma rayonlara getmək, seçicilərlə görüşmək üçün bu zaman yetərli deyil”. /Azadliq.info/