Sensasion və qorxulu iddia; Ölkəmizə qarşı ciddi təxribat planları var; ABŞ-ın Suriyaya zərbə endirməyə hazırlaşdığı ərəfədə Rusiya-İran-Suriya xüsusi xidmət orqanları Azərbaycanın üzərinə gəlir; iqtidar əndişədə...
Azərbaycan hakimiyyətinin son günlər Bakıda təhlükəsizlik tədbirlərini gücləndirməsinin ən əsas səbəbi bəlli olub. Qeyd edək ki, “Yeni Müsavat”ın dünənki sayında dövlət orqanlarının mühafizəsinin gücləndirilməsinin səbəblərindən biri ilə bağlı redaksiyamıza daxil olan məlumatlar əsasında “Azərbaycanda "dövlət çevrilişi" həyəcanı" başlıqlı yazı dərc etmişdik. Həmin məqalədə təhlükəsizlik tədbirlərinin gücləndirilməsinə səbəb olan amillərdən biri kimi hakimiyyətin seçki öncəsi narahatçılığı göstərilib, eyni zamanda bunun ənənəvi “dövlət çevrilişi” şousunun tərkib hissəsi olmasının mümkünlüyü vurğulanıb. Lakin əslində məsələ ciddidir, yalnız “şou” xarakterli deyil; və yalnız hədəf olaraq Azərbaycan müxalifəti götürülməyib. Azərbaycanı gerçəkdən də qarışdırmaq istəyən güclü qüvvələr, hətta dövlətlər var. Bunların başında heç şübhəsiz, Rusiya gəlir. Buraya mövcud iqtidara xüsusi mənfi münasibət bəsləyən İranı, bizimlə əbədi düşmən olan Ermənistanı da əlavə etmək lazımdır.
Lakin son aylar Azərbaycanın düşmənləri sırasına daha bir uzaq ölkə - Bəşər Əsəd Suriyası da qatılıb. Vurulmaq ərəfəsində olan rəsmi Dəməşq, himayədarı Rusiya və İranla birlikdə özünün əsas düşməni olan Amerikaya hər yerdə və bütün imkanlarda cavab vermək üçün ciddi hazırlıqlara start verib. Bu məlumatı “Yeni Müsavat”a Qərb ölkələrindən birinin diplomatı verib. O deyib ki, Suriya, Rusiya və İranın xüsusi xidmət orqanları (onlara bağlı olan radikal hörgütlər) dünyanın bir sıra ölkələrində, o cümlədən də Azərbaycanda Amerika, İsrail və rəsmi Bakının özünə qarşı (bu ölkələrlə yaxın əməkdaşlıq etdiyinə görə) təxribat və cəza xarakterli tədbirlər hazırlayıblar. Diplomat iddia edib ki, bu təxribatlar barədə rəsmi Bakı məlumatlandırılıb: “Bunlar terror xarakterli təxribat planlarıdır və olduqca təhlükəlidir. Burada bir neçə ölkənin xüsusi xidmət orqanları və onlara bağlı radikal hörgütlər də rol alıblar. Onların Azərbaycanda da müəyyən insani resursları var... Bu səbəbdən də xüsusi təhlükəli vəziyyətin yarandığını qəbul etmək lazımdır. Onlar Amerika və onun müttəfiqlərinin Xəzərdəki, Azərbaycandakı bütün obyektlərini hədəfə götürüblər. Artıq bir mesajlarını da veriblər - əgər Amerika və onun yaxın müttəfiqləri Suriyanı, onunla paralel olaraq İranı vursa, onları Xəzərdə və Bakıda nələrin gözlədiyini açıq bir dillə ifadə ediblər”. Diplomat deyib ki, söhbət “Bulla-dəniz” yatağının şimal-şərq qanadında baş verən partlayışdan və bunun nəticəsində hələ də söndürülməsi mümkün olmayan yanğından (17 avqustdan bu yana - 15 gündür!) gedir.
Qərb paytaxtlarına aid kifayət qədər mötəbər olan başqa bir qaynaq da “Yeni Müsavat”a 4 gün əvvəl demişdi ki, bu partlayış qəza deyil, terror hadisəsidir və ehtimal olunur ki, onu Rusiyanın xüsusi xidmət orqanları törədiblər. Sensasion və qorxunc olan bu məlumata rəsmilərin necə yanaşdığını Bakıda hər gün artan təhlükəsizlik tədbirləri ilə anlamaq mümkündür.
Bu məqamda deyək ki, nə qədər rəsmi Bakı ilə anlaşmış görünsə də, əslində Rusiya Əliyev iqtidarına neqativ münasibətini hələ də sıfırlamayıb.
Xatırlayırsınızsa, bir müddət əvvəl “Yeni Müsavat” Rusiyanın Azərbaycanı qarışdırmağa hazırlaşdığını yazmışdı. Avqustun 16-da dərc olunan 215 (5573) N-li ayımızda yenə də Qərb ölkələrindən birinin paytaxtımızdakı təmsilçisinə istinadən qeyd etmişdik ki, guya sosioloqlardan ibarət olan gizli missiyalı bir rus heyəti Bakıya gəlib. Məlumat o qədər təfərrüatlı idi ki, hətta heyətin yerləşdiyi hotelin ismi də yazılmışdı. Qeyd olunurdu ki, ruslar niyyətlərinin rəsmi şəkildə və beynəlxalq missiya bayrağı altında seçkiqabağı durumun monitorinqini aparmaq olduğunu bildiriblər. Mənbə isə iddia edirdi ki, əslində “çağırılmamış qonaqlar”ın əsas missiyası seçki bəhanəsi ilə regionları gəzərək, əhalinin əsasən nədən narazı olduqlarını öyrənmək, xüsusilə Rusiya ilə sərhəddə yaşayan etnik toplumların həyat şəraiti ilə maraqlanmaqdır. Yazıda göstərilirdi ki, onlar Azərbaycan bölgələrindəki “zəif nöqtələri” - xalqın ən çox narazı olduğu 30 bölgəni öyrənib, xüsusi siyasi xəritə düzəldəcəklər. Məlumatda bildirilirdi ki, ölkəmizin hansı bölgələrində insanların problemi daha çoxdur, hökumətin harada daha ciddi boşluğunun olduğu öyrəniləcək və sonradan bu bölgələrdən xaosa start vermək planı qurulacaq. Bu plan seçkidən əvvəl də, sonra da işə düşə bilər, deyə Qərb paytaxtlarından birindən gəlmiş mənbəmiz bildirirdi.

***

Həmin məlumatları bizə ötürən mənbələr indi iddia edirlər ki, Azərbaycan qəzetlərində müvafiq yazılar gedəndən sonra həmin qrup Bakını tərk edib. Lakin elə həmin gün rəsmi Bakıya və Azərbaycan sərvətlərinə ortaq olan konsorsium dövlətlərinə “qazlı mesaj” da buraxıblar: “”Bulla-dəniz" yatağındakı terrorun iki məqsədi var: 1. Ruslar və müttəfiqləri Xəzərin əsil sahibinin kim olmasını göstəriblər; 2. Müttəfiqlər Amerika və onun dostlarına mesaj veriblər ki, savaş olsa, yalnız Suriyada, İranda olmayacaq - hər yerdə və hər vasitə ilə cavab veriləcək. Bu, kifayət qədər açıq və təsirli mesajdır..." Sitat bizə verilən məlumatın mənbəsindəndir...

***

Ruslar niyə belə edir - əgər onlar Azərbaycan iqtidarı ilə anlaşıblarsa və seçkilərə rəsmi müdaxilə imkanlarından, İlham Əliyevə qarşı irəli sürdükləri namizəddən, bütün layihələrdən imtina ediblərsə, nədən Azərbaycanı qarışdırmaqda, anlaşdıqları rejimə qarşı təxribatlarda maraqlı olsunlar? Qaynağımızın cavabı təxminən budur: - “Ruslar Azərbaycan iqtidarından elə şeyləri tələb edirlər ki, onların hamısını vermək mümkün deyil. Lakin çox şeylər də aldılar. Burada isə Azərbaycan və onun iqtidarı ona görə hədəfə düşür ki, rəsmi Bakı ABŞ-la heç zaman olmadığı qədər yaxınlaşıb və tamamilə onun himayəsinə girib, bütün regional və hərbi planlarında yer alır, əməkdaşlıq edir, bundan sonra da daha böyük əməkdaşlıqlar planlaşdırılır. Rusiya, İran (son olaraq da Suriya) Əliyevin Azərbaycanına deyil, həm də və əsasən buraya tam kontrol iddiasında olan Amerika və onun müttəfiqlərinə qarşı cəbhə açıblar”. Soyuqqanlı Qərb janrında olan bu təhlilin qorxunc tərəfi budur ki, bu savaş bizim torpaqlarda açılıb və bizə baha başa gələ bilər.

***

Beləliklə də, qəzetimizin 16 və 31 avqust tarixli saylarında gedən manşetlərin mahiyyətində dayanan proses aydın olur. Hakimiyyət həm hər gün daha da fəallaşan siyasi müxalifətin basqısından, həm də Rusiya-İran- Suriya kəşfiyyatlarının, onlara bağlı hörgütlərin təxribat planlarından rahatsızdır və əndişədədir.
Buna uyğun da təhlükəsizlik tədbirləri, eyni zamanda “çevriliş şou-ssenariləri” hazırlanmaqdadır. Bu baxımdan, əlimizdə olan, lakin heç də hamısının dərci mümkün olmayan səhih məlumatlar əsasında deyə bilərik ki, ölkə ictimaiyyəti və müxalifəti bir sıra təlatüm xarakterli olaylara, basqı və repressiyalara hazır olmalıdır...
Yekunda onu deyək ki, Qərb paytaxtlarından rəsmi Bakıya ciddi anti-terror və “lojistik” dəstək var. Azərbaycanın xüsusi xidmət orqanları ilə birlikdə, olası təhlükələrin xəritəsi və buna qarşı tədbirlər planı hazırlanıb. Azərbaycan hakimiyyəti ABŞ-dan gələn terror təhlükəsi xəbərdarlığını həddən artıq ciddiyə alıb və son illərdə heç zaman olmadığı kimi, təhlükəsizlik tədbirlərini gücləndirib.
Bu barədə aldığımız məlumatda deyilir ki, faktiki olaraq hakimiyyət hüquq-mühafizə orqanlarını və təhlükəsizlik qüvvələrini bir nömrəli antiterror hazırlığı vəziyyətinə gətirib.
Mövzu davam etdiriləcək.