Yaxud, kimdir saxtakar: Cəmil Həsənlimi yoxsa hakimiyyətmi?

Seçki prosesinə start verilərkən bəlliydi ki, müxalifətin yeganə birliyi olan Milli Şuranın president seçkilərində irəli sürəcəyi vahid namizəd üçün heç də asan olmayacaq. Hər halda bu rejimin mahiyyətini, nəyə qadir olduğunu bilənlərin hamısı həmin namizədə qarşı əvvəlki seçkilərdə müşahidə olunan “qara piar” kampaniyasının təkrarlanacağını gözləyirdi. Onlar üçün fərqi olmayacaqdı; namizəd kimdir, necə adamdır-bütün potensiallarını işə salaraq ucuz anti-təbliğat vasitəsilə gözdən salmağa çalışacaqdılar. Qərarlıydılar və mütləq belə olacağına kimsənin də şübhəsi yox idi.
Hələ Rüstəm İbrahimbəyovun vahid namizəd olduğu çox da uzaq olmayan keçmişi xatırlayın. Sanki hakimiyyətin hər şey yadından çıxmışdı-onlar üçün bircə hədəf vardı: Rüstəm İbrahimbəyov. İqtidar bütün şər aparatını kinorejissorun üzərinə yönəıltməklə az qala hər gün yeni bir “kompramat” icad edirdi. Rüstəm İbrahimbəyov geri çəkildi, Milli Şura bundan sonar Cəmil Həsənlinin namizədliyi üzərində dayandı. Onun namizədliyi bir neçə aspektdən uğurlu seçim idi-başlıcası isə bu şəxs haqqında iqtidarlı-müxalifətli hər kəs hörmətlə danışmağa məcbur idi. Professor kiməsə bunun əksini etmək üçün kiçicik bir səbəb belə verməmişdi. Amma rejimin mahiyyətindən tam xəbərdar olanlar yenə deyirdi: Hətta Cəmil müəllim haqda da nəsə “tapacaqlar”. Hamı maraqdaydı: axı nə? Bu adam siyasətdə olan azsaylı şəxslərdəndir ki, reputasiyası tamamilə ləkəsizdir, professordur, beynəlxalq aləmdə alim kimi böyük nüfuza malikdir və s. Amma hakimiyyətin “ideya generatorları” bu sınaqdan da “üzüağ” çıxdılar. Uzun axtarışdan sonar “tapdılar” və həmin “tapıntı” Əli Əhmədovun iştirakıyla hamıya nümayiş olundu. Nə tapmışdılar? Guya Cəmil Həsənlinin vaxtından qabaq pensiyaya çıxmasında saxtakarlıq olub və bu “çox böyük və bağışlanmaz günah” imiş. Sanki özləri İsa Məsihin yerdəki kölgələridir.
İTV-də təşkil olunan debatda YAP-ın “namizədi” Cəmil Həsənlinin xəstə olduğunu, onun vaxtından qabaq təqaüdə çıxdığını bildirmişdi. Ardından da sənədləri payladılar. Nəymiş, nə var o “sənəd”lərdə? İddia edirlər ki, Milli Şuranın vahid namizədi “diabetik angiopatiya” xəstəliyinə mübtəla olduğundan uzun-uzun işləyə bilməzmiş. Demə, prezident olan şəxsin işi çox uzun olurmuş. Etiraz etməyəcəyik, amma biz hər gün keçmiş “Moskva” prospektinin səhər 11, axşam 18 radələrində bağlandığını gördüyümüzdən bu işin nə qədər asan olduğunu fikirləşirdik.… Sən demə, belə deyilmiş.
Sonra iddia edirlər ki, Cəmil Həsənli bu xəstəliklə çox işləyə bilməz, olmaz, sağlamlığı imkan verməz. Amma nədənsə demirlər ki, o, bu diaqnoz qoyulandan sonra gözünü zilləyib neçə kitab yazıb. Demirlər ki, el üçün ağlayan iki gözdən olar. Demirlər… Demək istəyirlər ki, professor Cəmil Həsənli saxtakarlıq edib, həkimdən saxta arayış alıb. Amma yenə də necəsini demirlər. Deyə bilmirlər!..Çünki “necəsini” demək, bunu açıqlamaq özlərinin ifşasıdır. Lap tutaq ki, səsləndirilən ittihamlar həqiqətdir, bu zaman cavabının hökmən verilməsi tələb olunan bir sıra suallar yaranır. Axı, saxta olduğu ehtimal edən həmin sənədi Cəmil Həsənli özünə özü düzəltməyib, bu mümkün deyil. Həmin sənədi bu hakimiyyətin müvafiq işlərlə məşğul olan rəsmi strukturu verib Cəmil Həsənliyə. İndi kimdir saxtakar: Cəmil Həsənlimi yoxsa bu sənədi ona verən hakimiyyətmi? Sualın cavabı o qədər sadə və bəllidir kid aha bu istiqamətdə hansısa araşdırma aparmağa belə lüzum qalmır. Amma bunların həyasızlığı o həddədir ki, əlavə olaraq bir sıra qaranlıq nüanslara da işıq salmağa ehtiyac yaranır.
İxtisasca həkim deyilik, adıçəkilən xəstəliyin müalicəsinin mümkün olub-olmadığını da bilmirik. Amma dəqiq bilirik ki, bu gün Azərbaycanda sağlam adama “xəstə” diaqnozu qoyan həkimlər sonsuz saydadır. Onu da bilirik ki, xəstə gənci “sağlam” adı altında hərbi qulluğa yollamaq da dəbdədir. Hər halda bununla bağlı çoxsayləı faktlar da göstərmək olar. Belə bir ölkədə yaşayırıq və hesab edirik ki, bu məmləkətdə kiməsə “sənin həkimdən aldığın arayış saxtadır” demək nanəciblikdir. Əslində həkimdən aldığımız arayışın doğruluğuna şübhə etməliyik. Əlbəttə, vicdanını para-pula satmayan ağ xalatlı soydaşlarımız da yox deyil. Amma neyləyək ki, daim qarşımıza çıxmırlar… Bəs bunun günahkarı kimdir? Həkimini, müəllimini, ziyalısını ələbaxan öyrədən, rüşvətlə yaşamağa məcbur edən hakimiyyət yoxsa Cəmil Həsənli? Cavab hər kəsə aydın olduğundan təkrarçılıq etmək niyyətində deyilik.
Hakimiyyət illərlə tər töküb savadsız zümrə yetişdirib. İndi o zümrənin meyvəsindən nübar edirlər! Aldığımız həkim arayışından tutmuş, şəxsiyyət vəsiqəsinədək hər şey əleyhimizə işləyə biləcək durumdadır. Və birdəfəlik anlamaq lazımdır ki, bunun günahkarı vətəndaş deyil və ola da bilməz. İndi
Azərbaycanda minlərlə insan həqiqi diaqnozunu bilmədən yaşayır. Cəmil Həsənli də onlardan biridir. İllərlə bəlkə də ona “biçilən” xəstəliyin adını belə bilməyib. Bəlkə də hakimiyyətdə qaz vurub – qazan dolduran erməni əsilli məmurlar onu Azərbaycan tarixini dürüst yazmasından əndişələnib vaxtından əvvəl təqaüdə yollayıblar!
Yenə yazımızın ənənəvi sualına qayıdaq, indi kimdir saxtakar? Xalqı üçün gözünün nurunu itirən, amma yenə də bu yolda irəliləyən Cəmil Həsənlimi, yoxsa ona və onun kimi sadə azərbaycanlıların hər birinə qeyri-dəqiq diaqnoz qoyulmasına səbəbkar olan hakimiyyətmi? Kimdir xalqı aldadan? İllərlə xəstəliyinin adını belə bilməyən elm adamımı, yoxsa hər sahəni rüşvətə bulayıb bununla varlanan zümrəmi? Cəmil Həsənli həm də ona görə prezident olmalıdır ki, o da hər bir sadə azərbaycanlı kimi bu problemləri yaşayan birisidir! O da hamı kimi BƏSDİR deyən birisidir!
Əslində, hakimiyyət elm adamı və ziyalı olan Cəmil Həsənlidən bu qədər böyük siyasi iradə və istedad gözləmirdi. YAP-ın ideoloqları müsahibələrində də eyham vururdular ki, liderlərlə müqayisədə Cəmil Həsənliylə mübarizə aparmaq onlara sərf edir. Amma Cəmil Həsənli İTV-dəki ilk teledebatca onlara yanıldıqlarını xatırlatdı. Milli Şuranın namizədi Cəmil Həsənlinin ilk televiziya çıxışı hakimiyyət üçün tərs sillə effekti yaratdı. Hər kəsin alim, araşdırmaçı-tarixçi kimi , mülayim təbiətli insan kimi tanıdığı Cəmil müəllim millət və dövlət məsələsi müzakirə mövzusu olduğu zaman heç kəsə mülayim davranmayacağını ortaya qoydu. Kitablarından gerçək tarixi oxuduğumuz alim Milli Şuranın namizədi seçildiyi gün elan etdiyi "Yolumuz Rəsulzadə Elçibəy yoludur” şüarına sadiq qaldığını göstərərək zülmkar bir sistemin birbaşa pik nöqtəsini hədəf aldığını isbatladı: "Korrupsiyanın başında İlham Əliyev durur”...

Hakimiyyətin “qara piar” maşını anındaca hərəkətə keçdi və Əli Əhmədov danışdı. Sən demə, Cəmil müəllim özünə saxta pensiya düzəldibmiş. Ayıbdı! Görün millətin ziyalısın nədə ittiham edirsiz. Kitablarının çəkisi bəlkə də YAP funksionerinin fiziki çəkisindən çox olan alim buna ehtiyac duymamalıydı. Hanı bəs "anoloqu olmayan” ölkənin sosial proqramları, hakimiyyətin ziyalıya qayğısı...
Görünür Ə.Əhmədovun çıxışı ilə rejimin qəzəbi soyumayıb və bu cılız ittihamı öz media təmsilçisi olan Eynulla Fətullayev vasitəsi ilə ictimailəşdirdi... və həmkarımız da bu fakta özünəməxsus bəzək vurub. Sənədləri şərh edən virtualaz.org yazır: "Burada nəsə yerində deyil deyə ziddiyyət yaranır. Cəmil Həsənli ya demək olar ki, kordur, ya da yalançı. İstənilən halda ikinci variantdır”. Yəni Cəmil müəllim yalançıdı...
“Gündəm-xəbər” olaraq biz də araşdırma apardıq və E.Fətullayevin "yalançı” adlandırdığı Cəmil müəllimin 2009-cu il sentyabrın 30-da millət vəkili kimi parlament tribunasından etdiyi çıxışı tapdıq. Həmin çıxışdan bir hissəni olduğu kimi diqqətinizə çatdırırıq: "Qənimət Zahidin üzünə duran şəxsin axtarışda olduğu hələ o dövrdə bəlli idi. Digər baş redaktor Eynulla Fətullayev də eyni saxta ittihamla bu gün həbsdədir. İstedadlı gənclərin susdurulması üçün hüquq mühafizə orqanları neçə belə saxta ittiham uydururlar. Belə işlə məşğul olan orqan işçiləri ilə bağlı ciddi qərarlar verilməlidir”.
Bəli, ciddi qərarlar verilməlidir! Həm də dünənini unudanlar haqda…
Sonda bir vacib məqamı vurğulamaq istərdik. Bəllidir ki, həm dünyada, həm də MDB məkanında fəaliyyət göstərən istiqlalçı deputatlara xüsusi diqqət və qayğı var. Eks prezidentlərlə bağlı qəbul olunan qərarlar kimi, istiqlalçı deputlarla bağlı da qərar qəbul olunur. Xaricdə bu deputatlara seqment deputalar deyilir. Azərbaycanda isə istiqlalçı deputatlara nəinki bu güzəştlər yoxdur, əksinə aşağılayıcı bir münasibət göstərirlər.
Bu səbədən də Azərbaycanda bu kimi imtiyazları olan deputatlara nəinki imtiyaz, heç pensiya da verilmədi. Məsələn, 45 deputatın içində yeganə xanım olan 75 yaşlı Məryəm Həsənovaya verilən 100 manat pensiya nəinki özünü dolandıra bilmir, hətta bu ahıl yaşında xəstəliklərinin də müalicəsinə imkan vermir. Bu məsələ zaman-zaman gündəmə gətirilsə də Azərbaycan hakimiyyəti çox laqeyid münasibət bəsləyib. Milli Məclisə verilən o imtiyazlar uğrunda mübarizə aparan deputatlar özləri bu imtiyazlardan məhrum olublar. Bu absurddur. Bu hakimiyyətin istiqlalçı deputatlara bir başa qərəzi ilə bağlıdır. Haqq ədalət bu gün də olmasa, hakimiyyət dəyişikliyindən sonra bərpa olacaq. Cəmiyyətdəki qarşıdurmalıq aradan qalxması üçün, sistem dəyişilməlidir və demokratik cəmiyyət qurulmalıdır.
Həm bu, həm də digər taleyüklü problemlərinmizin həlli isə seçicinin 9 oktyabr tarixində seçki məntəqəsinə gələrərək, saxtakar rejimə “yox” deməsi lazımdır. Həmin gün səsləriylə sözünü deyən hər bir vətəndaşımız bununla həm də ağaıdakı sualın da cavabını vermiş olacaq: KİMDİR SAXTAKAR: CƏMIL HƏSƏNLİMİ YOXSA HAKİMİYYƏTMİ? .
Orxan HƏSƏNLİ