Müştərək SES İran və Ermənistan üçün siyasi alət, ölkəmizə qarşı növbəti təzyiqdir

gundemxeber.az Bir neçə il bundan əvvəl İran prezidenti Mahmud Əhmədinejad Araz çayında Su Elektrik Stansiyası (SES) tikmək niyyətini həyata keçirmək üçün Azərbaycanın razılığını almağa çalışsa da, rədd cavabı almışdı. Üstündən bir müddət keçəndən sonra Əhmədinejat Yerevana səfər edərək, Azərbaycanın mövqeyini nəzərə almadan həmin ölkə prezidenti ilə tikintinin inşasına dair saziş imzaladı. İndi də bu layihənin reallaşması istiqamətində işlər görülür.
Qeyd edək ki, stansiya məhz Araz çayından bəhrələnərək tikilir. Bu da təbii ki, Azərbaycan üçün arzuolunmaz bir hadisədir. Ekspertlər bunu İranın son vaxtlar ölkəmizə qarşı özünü azğın arparmasının, provokasiyaya çəkməsinin növbəti bir göstəricisi kimi qiymətləndirirlər. Onların sözlərinə görə, İranın Ermənistanla əlaqələri tamamilə anti-Azərbaycan əlaqələridir.
İranın müsəlman dövləti olduğunu, eyni zamanda İranın dövlətçiliyində azərbaycanlıların rolunu, siyasi politikasında və elitasında hakimiyyətə malik olan, sözü qəbul edilən etnik azərbaycanlıların təmsil olunduğunu nəzərə alaraq bu, yolverilməzdir. Araz çayı üzərində tikilən SES-in Azərbaycana ziyanlı olub-olmamasını kənara qoysaq, bunun siyasi tərəfləri istənilən halda Azərbaycan üçün çox zərərlidir. Bu da İranın Ermənistanla sıx şəkildə əməkdaşlıq və bundan Azərbaycana qarşı siyasi bir təzyiq kimi istifadə etməsinin göstəricisidir. Digər bir tərəfdənİran da bizi günahlandırır ki, Azərbaycanİranla məsləhətləşmədən, dost münasibətlərini nəzərə almadan İsraillə, ABŞ-la əməkdaşlıq edir. Ona görə də hesab edirəm ki, bu məsələləri ayırmaq lazımdır. Çünki mən inanmıram ki, Azərbaycan dövləti nə vaxtsa İrana qarşı bir addım atsın və İrana qarşı olan hücumlarda iştirak etsin. Azərbaycan sadəcə, müstəqil dövlət olaraq özünün iqtisadi maraqları çərçivəsindəİsrail və ABŞ-la əməkdaşlıq edir. Bundan heç bir halda İrana qarşı istifadə etmir və etmək niyyətində də deyil. Çünki bu, Azərbaycana yaraşmayan bir hərəkət olardı.
Azərbaycan həmişə İran tərəfindən Ermənistanda elektrik stansiyasının tikintisinin əleyhinə olmuş və buna sərt münasibət göstərmişdir İranın indiki addımını da rəsmi Bakı cavabsız qoymamalıdır. İran tərəfindən bu cür addımların atılması, Ermənistanla əməkdaşlıq etməsi, üstəlik bilməsi ki, Azərbaycanın 20 faiz torpağı işğal altındadır, 1 milyona yaxın azərbaycanlı öz torpaqlarından didərgin düşüb, bu addımlar yolverilməzdi. Mənə belə gəlir ki, Azərbaycanın Xarici İşlər Nazirliyi bununla bağlı bir neçə dəfə münasibət bildirdiyi kimi, yenə də bildirməlidir. İranı Azərbaycanın maraqlarına zidd gedəcək və iki ölkə arasında əməkdaşlığa xələl gətirəcək addımlardan çəkinməyə çağırmalıdır.

Sevil Yaqubova