Gülağa Aslanlının saxlanılmasının təfərrüatları məlum olub. Bu gün saat 9:30 radələrində Cəmil Həsənlinin MSK-da səlahiyyətli nümayəndəsi yaşadığı mənzildən çıxarkən 20-yə yaxın mülki geyimli şəxs tərəfindən saxlanılaraq Binəqədi rayonu ərazisində yerləşən polis bölməsinə aparılıb. Saxlanılmasının səbəbi kimi ona bildirilib ki, guya bu gün saat 10 radələrində (?) bir nəfər vətəndaşı təhqir edib. Saat 12:00-a qədər polis bölməsində saxlanıldıqdan sonra Gülağa Aslanlıdan izahat alınıb və sabah saat 10-da polis bölməsinə gəlməsi tələb olunub. Gülağa Aslanlı “Azadlıq” qəzetinə açıqlamasında bildirib ki, onun saxlanılmasının məqsədi MSK-nın bu gün keçirilən iclasında iştirakına əngəl törətmək olub: “Mən bu gün MSK-nın iclasında iştirak edib, seçki günü qeydə alınmış qanun pozuntuların əks etdirən aktların orjinalını MSK-ya təqdim etməli idim. Bu aktlar seçkilərin kütləvi şəkildə saxtalaşdırıldığını faktlarla təsdiq edir. Ancaq məni polis bölməsində saxladıqları müddətdə MSK-nın iclası yekunlaşıb və bizim mövqeyimiz əks olunmadan qərar qəbul olunub. Görünür ki, bu əvvəlcədən hazırlanmış bir plan olub”.

***

14.06

Milli Şuranın mətbuat xidməti hadisə ilə bağlı məlumat yayıb. Məlumatda deyilir ki, MSK-da seçki saxtakarlıgı ilə bağlı Cəmil Həsənlinin şikayətinə baxılan vaxt G.Aslanlı həbsdə olub. Bu yolla G.Aslanlının MSK-ya əlavə sənədləri verməsinin qarşısını alınıb.

Saat 15.00-da Müsavat Partiyasının qərargahında bu qanunsuz olayla bağlı mətbuat konfransı keçiriləcək. Bütün KIV-lər dəvətlidir.

***

13.48

Bu gün səhər saatlarında prezidentliyə namizəd Cəmil Həsənlinin səlahiyyətli nümayəndəsi, Müsavat Partiyası başqanının müavini Gülağa Aslanlını polis saxlayıb. Musavat.com-un məlumatına görə, Gülağa Aslanlı Yasamal rayonu ərazisindəki evindən çıxaraq, MSK-nın iclasına gedirmiş.

MSK-nın iclasında Milli Şuranın prezidentliyə namizədi Cəmil Həsənlinin seçki saxtakarlıqları ilə bağlı şikayətinə baxılmalı idi. Gülağa Aslanlının saxlanılması şikayətə normal qaydada baxılmasına manne olub. Belə ki, MSK katibi Arifə Muxtarova iclasda bildirib ki, Milli Şuranın prezidentliyə namizədi Cəmil Həsənlinin səlahiyyətli nümayəndəsi Gülağa Aslanlı tərəfindən bəzi seçki məntəqələrində qanun pozuntuları baş verməsi iddia edilən şikayət xarakterli müraciətlər təqdim edilib: “Lakin həmin şikayətlərin istinad olunduğu müvafiq aktların əsilləri deyil, sürətləri təqdim olunduğundan şikayətin hüquqi baxımdan əsası olmadığı qənaətinə gəlinməlidir. Çünki qanunvericiliyə uyğun olaraq araşdırma aparılması üçün sənədin əsli təqdim olunmalıdır”. MSK katibi əlavə edib ki, G. Aslanlı ilə dəfələrlə əlaqə saxlanılıb və o aktların özünün gətirilməsi istənilib.

Gülağa Aslanlı da tələb olunan sənədlərin əslini MSK-ya aparırmış. Lakin polis tərəfindən saxlanılan səlahiyyətli nümayəndənin iclasda iştirakına imkan verilməyib. Gülağa Aslanlını MSK-nın iclası başa çatdıqdan sonra sərbəst buraxıblar.

Bu gün saat 15.00-da baş vermiş hadisə ilə bağlı mətbuat konfransının keçiriləcəyi gözlənilir.

Mövzuya qayıdacağıq.