Az qala bir aya yaxındır ki, İranla gərginlik açıq fazaya keçib və tərəflər öz “kart”larını nümayiş etdirməkdədirlər. Tehran gah ali dini lider Xameneinin Ərdəbil üzrə nümayəndəsi olan Amili vasitəsi ilə Bakıya dil uzadır, “şirin quyruğu” ilə oynamaqdan dəm vurur, gah Arazın o tayında SEPAH qüvvələri hərbi təlimlər keçirir, şpaqat açıb “əzələ” göstərirlər.

Və bütün bu mərəkə İran şirkətlərinin Azərbaycanın ermənilər yaşayan ərazilərinə icazə almadan yük daşımalarına görə qopub. Çünki Xankəndinə gedən TIR-ların dayanması üçün Bakı Tehrana nota göndərdi, xəbərdarlıq etdi, gördü ki, qulaqardı edilir, Gorus-Qafan yolunun bizə aid 21 km-lik hissəsində post qurduq, maşınları yoxlamağa, sürücüləri saxlamağa başladıq, onda İran “şir”ə dönüb qızışdı.
Bunun aşması belə idi ki, necə yəni Azərbaycan tərəfi mənə dirsək göstərir, yükləri Qarabağa daşımağıma imkan vermir. Ona görə molla Amilinin dili ilə bizi hədələməyə başladılar. Eyni zamanda Türkiyə ilə birgə təlimlərdən xofa düşərək sərhəd yaxınlığında təlimlərə başladılar.
Olsun, bu təlimlərin zərrə qədər qorxusu yoxdur. İranın əslində Zəngəzur dəhlizi açılarsa, bu prosesdən kənarda qalacağını bildiyi üçün özünə əl qatdığı da aydın məsələdir.
Gundemxeber,Az anaxeber.info-ya istinadən bildirir ki, burada başqa bir vacib nüans var – İran ayətullahının təhdidlərinə azərbaycanlı din alimlərindən cavab verən yoxdur.
Xüsusən də “Xameneinin fətvası bizi 44 gündə qələbəyə apardı” bəyanatı vermiş Qafqaz Müsəlmanları İdarəsinin sədri Allahşükür Paşazadənin tükü tərpənmir.
Bütün Qafqazın şeyxi ayətulla Amilinin hədyanlarına, bizə açıq şəkildə dil uzatmasına görə indiyə qədər bir dəfə səsini çıxarmayıb. Xameneinin fətvasını qələbəyə apardığını deyən, Şuşada onun nümayəndəsi Ocaqnecatı qabağa verib Gövhər Ağa məscidində pişnamazı arxasında qılan Şeyx, indi gəlsin cavab versin!
Əgər Şeyx azərbaycanlıdırsa, dövlətin maraqlarını hər şeydən üstün tutursa, niyə cənubdan gələn təhdidlərə susur? Əksinə, onun kəskin reaksiyasına böyük ehtiyac var.
Şeyx nüfuzlu bir din xadimi kimi mövqeyini bəyan edərsə, digər din alimlərinə də təsir etmiş olar, o cümlədən Azərbaycanın əlini gücləndirər. Bu zaman cəmiyyətdəki bütün şübhələrə də son qoya bilərdi.
Nə üçün Azərbaycan İranı hər addımında nəzərə aldığı halda, fars-molla rejimi xislətindən dönmür? Müharibə vaxtı düşmənə silah daşıdılar, Bakı xahiş etdi, nəzərə alıb guya dayandırdılar, nota göndərdik, məhəl qoymadılar, Azərbaycan İrana görə İsraildə səfirlik açmır, Tehran yenə dostluq və qonşuluq niyyətimizi, siyasətimizi xəbiscəsinə görməzdən gəlir.
Ona görə artıq yumşaq dildə diplomatiya siyasəti keçərli deyil, molla rejiminin cavabı adekvat olmalıdır. Amma QMİ sədri A.Paşazadə özündə o gücü tapa bilmir ki, Xameneinin Ərdəbil üzrə nümayəndəsinin cavabını versin, özü də olmasa, idarənin adından bir bəyanat yayıla bilərdi.
Nəticədə Şeyxin Xameneinin fətvası dediyi “sehirli güc” çevrilib “şirin quyruğu” oldu. Buyurun, hörmətli Paşazadə, indi aydınlıq gətirin. Biz Ocaqnecatı başımıza çıxarıb Şuşada pişnamazda ön cərgəyə dəvət edirik, ayətullah Amili isə bizi təhdid edir.
İran da susur, Tehran da cavab vermir, nə prezident İbrahim Rəisi, nə ali lider Əli Xamenei bu gərginliyə münasibət bildirir.
Şeyx yəqin ki, indi bizi 44 gündə qələbəyə aparan qüvvənin kim olduğunu müəyyən edə bilib. Hərçənd, buna da şübhə var, çünki vicdanın nə olduğunu bilmədiyini deyən QMİ sədri artıq müharibənin başlanmasının 1-ci ildönümü yaxınlaşır, hələ də torpaqların əhəmiyyətli hissəsinin işğaldan azad edilməsində hansı gücün əsas rol oynadığını təyin edə bilməyib. Azərbaycan Prezidenti də, xalq da, bütün dünya da qəbul edir ki, Qarabağı rəşadətli əsgərlərimiz, qəhrəman ordumuz, Şuşanı bıçaq-süngü ilə dağlara dırmaşan xüsusi təyinatlılarımız azad edib, Paşazadə isə hələ də İranın ali dini liderinin fətvasının bizi qələbəyə apardığı qənaətindədir.
Təəssüf olsun ki, bu sınaq müddətində Şeyx özünü doğrulda bilmədi. Cəmiyyətin ondan ən böyük gözləntisi xalqımıza dil uzadan mollabaş Amilinin cavabını verməsi idi, amma QMİ sədri sükuta üstünlük verdi.
Niyə - hansısa deputat, jurnalist, partiya sədri İrandan bu təhdidlərə ən sərt şəkildə cavab verə bilir, Şeyxi susmağa vadar edən nədir???