Qiymətlər artdıqca "makler"lər də acıdil olmağa başlayırlar

Kirayə evlərin qiyməti günü-gündən bahalaşır.Bunu kirayə bazarı ilə bağlı araşdırma apararkən kirayə axtaran vətəndaşlardan eşitdik.Onların dediklərinə görə, kirayə bazarında qiymətlər artdıqca "makler"lər də acıdil olmağa başlayırlar.Nəticədə müştəri "makler"ə möhtac olur.

Ev alqı-satqısı ilə məşğul olan satış mərkəzlərində apardığımız monitorinqlər də deyilənləri təsdiqləyirdi. Qeyd edək ki, yeni təhsil ili başlayanda tələbələrin Bakıya axını nəticəsində də kirayə evlərin əksəriyyəti tutulub. Bəlkə də elə bu səbəbdən bir çox alqı-satqı yerlərində durğunluq müşahidə olunur.Amma əsas durğunluq mənzillərin satışı ilə bağlıdır."Makler"lər bizimlə söhbətdə bildirirdilər ki, kirayə məsələsində vəziyyət alqı-satqıya nisbətən yaxşıdır.Çünki gün ərzində onlara ən azı 4-5 nəfər kirayə üçün müraciət edir. "Maklerlər"in, satış menecerlərinin əksəriyyəti problemin səbəbini mənzillərin qiymətinin həddən artıq baha olması ilə əlaqələndirdilər: "Qiymətlər baha olduğu üçün insanlar ev ala bilmirlər. Pulu çox alan adamlar da ancaq firmalar vasitəsilə alqı-satqı edirlər. Onlar "makler"lə alqı-satqı etməyi xoşlamırlar.Bizi fırıldaqçı kimi tanıyırlar.Halbuki, belə məqamda heç kimi aldatmaq olmaz.Bizi o qədər belə təqdim ediblər ki, hamının da beynində bu formada qalıb".

Ev alqı-satqısı ilə məşğul olan "makler" Nazim də qiymətlərin bahalığından şikayətlənirdi. O, məhz bahalığa görə müştərilərin azaldığını vurğulayırdı: "Şəhərin mərkəzi istisna olmaqla, ətraflarda üç otaqlı mənzillər 70-80 min manat arasında satılır. Ancaq elə yerlər var ki, oradakı qiymətlərlə buradakı qiymətlər fərqlənir. "Günəşli"də 2 otaqlı evləri 70-75 min manat, Qaraçuxur ərazisində 4-5 otaqlı evləri 75 min manata deyirlər, amma aşağı qiymətə də verirlər. Sadəcə, hər şey danışıqdan asılıdır, hər şey razılaşma yolu ilə olmalıdır".

Müştərilərin şikayətlərinə gəldikdə, Nazim bunları əsassız adlandırdı: "Müştərilər hər zaman hər şeyi öz xeyirləri üçün danışırlar. Amma məsələlərə real baxmaq lazımdır.Etiraf edirəm ki, pul qazanıram.Etiraf edirəm deyəndə, bu, göz qabağındadır.Tək mən yox, bütün "makler"lər bu işdən pul qazanır. Mən ev satanda o pulun neçə faizini götürəcəyimi həm ev sahibinə, həm də müştəriyə qabaqcadan deyirəm. Əgər onları qane etmirsə, bizimlə işləməsinlər, heç bir məcburiyyət yoxdur. Əgər kimisə məcbur etsəm, "alqı-satqını yalnız mənimlə et" desəm, onda məni günahlandırarsız. Kimə sərf edirsə bizimlə işləsin, etmirsə işləməsin".

Ancaq müştərilər tam əksini deyir. Kirayə üçün ev alqı-satqı mərkəzlərinə üz tutan Tünzalə Həsənova deyir ki, indiyədək 5 "makler"ə müraciət edib: "Ancaq hamısının fırıldağı ilə üzləşmişəm. Onlar ancaq insanları aldatmaqla məşğuldurlar. Nə olsun ki, "makler"siniz, halal pul qazanın da... Öz başıma gələnləri danışım.Bir aydır kirayə mənzil axtarıram.İndiyədək 5 alqı-satqı yerinə müraciət etmişəm.Demək olar ki, hamısında eyni hadisə ilə üzləşmişəm. "Makler"ə deyirəm ki, mənə azı 50 kvadratmetrlik üç otaqlı ev tapsın. Hamısı "baş üstə" deyir.Gedib evə baxıram, məlum olur ki, 40 kvadratmetrdir.50 kvadratmetrlik yeri isə mənə 60 kvadrat adı ilə verirdi.Ev sahibləri bir, "makler"lər başqa söz deyirlər. Bundan əlavə, deyirlər ki, filan yerdə yaxşı bir ev var, şəraiti də superdir. Uzun bir yolu qət edib adamı həmin evə aparırlar.Gedib baxanda görürsən ki, yalan deyirlər.Evə ya su gəlmir, ya da şəraiti pisdir. Bundan əlavə, ev sahibinin dediyi qiymətin də üstünə əlavə qiymət qoyurlar. "Makler"lərdən biri mənə əvvəlcədən nə qədər zəhmət haqqı alacağını deməmişdi. Gedib ev sahibi ilə razılaşdım. Evi kirayə götürən zaman dedi ki, mənə 80 manat pul ödəyəcəksən. Halbuki 80 manatlıq iş görməmişdi. Yenə 40-50 manat istəsə, adama bir o qədər də təsir etməz".

"Makler"lərin fırıldağından cana doyan Tünzalə Həsənova axırda hər şeydən imtina edərək internetdə axtarışa başlayıb. Dediyinə görə, bu dəfə ev alqı-satqısı və kirayəsi ilə məşğul olan firmaya rast gəlib: "Mənə hər dəfə deyirdilər ki, internetdə axtarış elə, firmalarla əlaqə saxla, "makler"lər yalançı olur. İnanmırdım.Ancaq "makler"lərin bu yalanlarını görəndən sonra internetdə axtarışlara başladım.Gördüm ki, düz deyirmişlər.Kirayə ilə məşğul olan firmalar hər şeyi dəqiq edirlər.Hətta kirayə verilən evin ünvanını, şəklini də çəkib saytlarına yerləşdirirlər. Hətta dedilər ki, biz müştəridən yox, ev sahibindən pul alırıq. Mənə bir neçə ev göstərdilər. Sonda birini bəyəndim.Məndən bir qəpik də olsun pul almadılar. Ancaq evə kirayəçi tapdıqlarına görə ev sahibindən 90 manat pul aldılar. Hətta kirayəçi ilə ev sahibi arasında müqavilə də bağladılar. İndi hər hansı problemim olanda həmin firmaya müraciət edirəm.Adını xatırlamıram, ancaq bilirəm ki, onların ofisi "Xaqani" Ticarət Mərkəzindədir.Hamıya məsləhət görürəm ki, "makler"lərdən uzaq olsunlar.Xüsusən də ev alanda belə firmalara müraciət eləsinlər ki, sonradan aldadılmasınlar".

Elmin BƏDƏLOV