Prezidentin, Ayaz Mütəllibovun, Fərhad Əliyevin, yoxsa?...

O, vaxtilə Lənkəran rayonunun hakimi mütləqi idi. Bu gün isə daha böyük vəzifə kürsüsündə əyləşib. Ali məktəbi bitirdikdən sonra Əzizbəyov rayonundakı 12 saylı internat məktəbində işə düzəlib, sonra peşə məktəbində komsomol katibi, Azərbaycan Komsomolunun MK-da şöbə müdiri, Lənkəranın icra başçısı və s. vəzifələrdə çalışıb. Yəqin söhbətin cənab Zeynal Nağdəliyevdən getdiyini bildiniz. O, 2001-ci ildə Rusiya azərbaycanlıları Konqresinin icraçı direktoru vəzifəsində çalışıb. Lakin onun 1994 – cü ildən 2001 – ci ilə qədər nə ilə məşğul olduğu barədə heç bir məlumat verilmir.
Deyilənə görə, Zeynal Nağdəliyevin həyatının qaranlıq səhifələrinin bir qismi də 1990-cı illərə təsadüf edir. Belə ki, 1990– cı ilin 20 yanvar faciəsi baş verərkən bu hadisələr ona heç bir təsir göstərməmişdir. Belə ki, o, bu ərəfədə SSRİ-yə daha böyük xidmətlər göstərirmiş, bunun nəticəsində mükafat olaraq vəzifəsini komsomol şöbə müdirliyindən Mərkəzi Komitəyə qədər yüksəltməyi də bacarıb. Qeyd olunur ki, bu, Z.Nağdəliyevin 90-cı il “qəhrəmanlığı” idi. Amma hamıya məlum həqiqətdir ki, həmin illərdə mərhum prezident Heydər Əliyev qanlı qanlı yanvar faciəsinə etiraz edərək partiya biletindən imtina etmiş və Kommunist Partiyasını tərk etmişdi. Z.Nağdəliyev isə 1991-ci ildə Kommunist Partiyasının sıralarına qatıldığı, kommunist vəsiqəsini ürəyinin başında daşıdığı söylənilir.
Zeynal Nağdəliyevin bundan sonra taleyində də bir çox qaranlıq məqamlar var. Belə ki, barəsində məlumat verənlər onun 1995-ci ildə Rusiyaya getdiyini bildirir. Belə ki, o, 1995-ci ilin mart hadisələrindən, XTPD-nin süqutundan sonra Moskvaya üz tutmuşdur. Aldığımız məlumata görə Heydər Əliyevin hakimiyyətə qayıdışı zamanı Z.Nağdəliyev Azərbaycan Sahibkarlar Partiyasının təşkilat şöbəsinin müdiri postunu tutub. Partiyanın dirçəlməsi istiqamətində gördüyü işlər sırasında onun Lənkərana gələrək iclas keçirdiyi, yerli təşkilatın özəyini yaratdığını xəbər verirlər. Maraqlıdır, görəsən, həmin illərdə əhalinin kütləvi şəkildə YAP-a üz tutduğu dövrdə ona rəqib olan siyasi partiyanın yerli təşkilatını yaratmaq cənab Nağdəliyevin nəyinə lazım imiş? Bəlkə o, Heydər Əliyevin siyasətini bəyənmirmiş? Elədirsə, onda bəs niyə indi bu ideologiyaya xidmət göstərməsiylə fəxr edir? Bəlkə vəzifədə olduğuna görə?
Lənkəranda olan zaman isə Z.Nağdəliyev “Burda mənəm, Bağdadda kor xəlifə” prinsipi ilə işləyib. Onun Lənkərana icra başçısı təyin edilməsində də müxtəlif müəmmalı məqamlar var. Belə ki, o, keçmiş XTPD-nin yüksək çinli məmurların vasitəsilə Lənkarana icra başçısı təyin edildiyi haqda informasiyalar var. Bu təyinatda daha çox Fərhad Əliyevin əməyi olduğu barədə bilgilər dolaşır.
Aldığımız məlumata görə, vaxtilə Z.Nağdəliyev dövlətə 200 milyon manat ziyan vurub. Belə ki, o, icra başçısı kimi icra aparatının üzvlərilə elə ilk görüşündə Lənkəran şəhərinə daş–kömür gətirilməsi məsələsini qaldırmışdı. Bundan sonra isə Sumqayıtda yerləşən “Alternativ enerji” MMC şirkəti Lənkərana 700 ton daş–kömür verib. Bu daş – kömürlər büdcə təşkilatlarına zorla paylanılıb. Yararsız olan daş – kömür üçün şirkətə 200 milyon manat məbləğində vəsait ödənilib. Yararsız halda olan daş – kömürdən isə heç istifadə olunmayıb. Beləliklə, dövlətə 200 milyon manat məbləğində ziyan dəyib.
Bu gün Z.Nağdəliyevin adı çəkiləndə yada onun Həzi Aslanovla bağlı dedikləri düşür. Deyilənə görə, Z.Nağdəliyev Lənkəranda vəzifə başına gəldikdən təxminən bir ay sonra Həzi Aslanovun büstünü götürdərək, bunun Baqramyanın büstü olduğu iddiasını irəli sürüb. Z.Nağdəliyevin Rəsul Quliyevlə əlaqəsi olması da deyilir. Bunun nə dərəcədə doğru olub – olmadığını deyə bilmərik. Amma Z.Nağdəliyevin Lənkəranın icra başçısı olduğu vaxt Ayaz Mütəllibovla əlaqəsi olduğu faktdır. Bildirilir ki, Moskvada yaşadığı illərdə Z.Nağdəliyev A. Mütəllibovla tanış olmuş, onlar arasında münasibətlər yaranmışdır. Bildirilir ki, Z.Nağdəliyevin Lənkəranın icra başçısı keçməsində Fərhad Əliyevin böyük rolu olub. Z.Nağdəliyev icra başçısı olan zaman iqtidar adamı olsa da, qardaşı Sahib Nağdəliyev AMİP-çi olub və parlament seçkiləri zamanı Etibar Məmmədovun vəkili qismində çıxış edib. İndi isə o da vəzifədədir-bələdiyyə sədridir. Bir ailədən iki nəfər ayrı – ayrı mövqelərə xidmət edib.
Bu gün Zeynal Nağdəliyev daha böyük vəzifələr arzusundadır. Onun ABŞ və Avropa dövlətlərinin bəzi təşkilatları ilə münasibəti olduğu, Fərhad Əliyevin müdafiəsi üçün gizli şəkildə xahişlər etməsi də verilən xəbərlər sırasındadır. Son aldığımız məlumata görə son hədəf baş nazir postudur. Amma...
Çinarə VÜQAR